Manan Ponta Leste 2-0, Assalam FC Lidera Provizoriu Tabela Klasifikasaun

SAPNewsTL, Dili: Assalam manan AS Ponta Leste iha jornada daruak ho skore 2-0 iha jornada daruak divizaun dahuluk Liga Timorense epoka 2023 ne’ebe lidera provizoriumente tabela klasifikasaun ho pontu 6.

Jogu entre Assalam FC kontra AS Ponta Leste hala’o iha Estadium Munisipal Dili sesta 3/03/2023

Iha jogu parte dahuluk ekipa rua halo jogu tuir estratejia idak-idak nian hodi halo presaun no kontra atake ba malu maibe to’o minutu 45 remata skore okulista 0-0 maski ekipa rua iha oportunidade atu halo golu maibe jogador sira la utiliza ho diak.

Kontinua ba jogu parte daruak Assalam FC la hein kleur marka golu husi jogador Lourenço Freitas iha minutu 47  hodi hatuur kedas skore ba 1-0, skore ida ne’e halo ekipa rua aumenta ritmu jogu hodi aumenta tan golu ne’ebe iha minutu 69 AS Ponta-Leste sofre tan golu husi jogador Assalam FC Hasan Costa iha minutu 69 hodi muda kedas skore ba 2-0.

Iha minutu 21 ikus ekipa rua esforsu atu aumenta golu maibe la konsege to’o minutu 90 remata skore nafatin 2-0 hodi rezulta Assalam FC manan AS Ponta Leste hodi hetan pontu tolu nune’e agora Assalam FC agora hetan pontu neen ne’ebe lidera provizoriumente tabela klasifikasaun divizaun dahuluk Liga Timorense epoka 2023.

Depois jogu remata treinador Assalam FC Gaspar Amaral dehan, “Manan AS Ponta-Leste, hau agradese ba hau nia jogador sira ho esforsu tomak tanba antes hau fo korajen ho motiva ba hau nia jogador AS Ponta Leste ekipa ne’ebe bele sai kampiaun ba liga iha tinan 2023 ne’ebe hau kontente tebes jogador sira joga tuir hau nia estratejia jogu nian sira esforsu makaas to’o balun hetan aleja”, tenik Gaspar

Gaspar hatutan, joga tuir mai hau hakarak hadia diak liu tan atu nune’e nafatin lidera tabela klasifikasaun prizoriamente tanba jogu tuir mai hasoru ekipa forte Aitana FC ne’ebe sira halo preparasaun tuir Aitana FC nia jogu.

Iha sorin seluk treinador AS Ponta Leste Edi Fernandes dehan, sira fo parabens ba Assalam FC no sira sofre golu rua tanba jogador sira lakon enerjia husi halo mudansa ba jogador sira.

“Ami fo parabens ba ekipa Assalam FC depois iha jogu parte daruak hau nia jogador sira lakon enerjia tanba ami faila ba troka jogador sira nian ekipa Assalam FC utiliza oportunidade ida ne’e hodi marka golu rua.

Entretantu jogu ohin ne’e ho ritmu sae makaas tanba jogador nain 4  husi Assalam FC hetan kartaun kinur no nain ida hetan kinur rua sai mean no jogador husi AS Ponta Leste nain ida hetan kartu kinur ida no ida hetan kartaun kinur rua sai mean, iha jogu refere Assalam fC halo substituisaun ba jogador nain haat no AS Ponta Leste troka jogador nain lima.

Rezultadu jogu ohin halo Assalam FC hetan pontu neen husi joga manan dala rua provizoriumente lidera tabela klasifikasaun divizaun dahuluk Liga Timorense epoka 2023 no AS Ponta-Leste hetan pontu tolu ida husi jogu dala rua impata ida ho lakon ida.

Reportajen: Augusto dos Santos