Marinho : Lei Suku Atribui Kompeténsia Barak, Maibé Dezenvolvimentu Hakdasak

SAPNewsTL, Dili : Departamentu Dezenvolvimentu Komunitáriu, Fakuldade Siénsia Sosiais, Universidade Nasionàl Timor Lorosa’e (UNTL) nia Estudante Marinho de Deus Pinto konsidera Dekretu Lei Nú. 9/2016, 8 Jullu atribuisaun no kompetensia sira ne’ebé aas ba Xefe Suku sira maibe, realidade la tuir buat ne’ebé hatur iha dekretu lei refere tanba poder sei nafatin iha guvernu sentral nia liman

Estudante Departamentu Dezenvolvimentu Komunitáriu, Fakuldade Siénsia Sosiais, Universidade Nasionàl Timor Lorosa’e (UNTL) Marinho de Deus Pinto konsidera Dekretu Lei Nú. 9/2016, fo atribuisaun no kompetensia sira ne’ebé aas ba Xefe Suku sira maibe, Dezenvolvimentu kontinua hakdasak tanba poder lokal seidauk entre ba Líderansa Komunitáriu sira

“Dekretu Lei Nú. 9/2016 atribui Kompeténsia barak ba Xefe Suku sira, maibe Dezenvolvimentu suku kontinua hakdasak tanba guvernu seidauk entre poder lokal ka desentralizasaun, tanba ne’e eleisaun suku ne’ebe mai, se bele Guvernu Konstitusional dasia ne’e bele implementa ona Polítika Desentralizasaun ba Munisípiu iha tinan oin”. Tenik Estudante UNTL Marinho de Deus Pinto ba SAP News TL iha Kampus Kaikoli, 11/10/2023

Estudante UNTL ne’e mos husu ba Joven intelektual sira hodi Kandidatu an ba Xefe no Xefe Áldeia iha tinan ida ne’e, nune’e bele kontribui ba dezenvolvimentu suku hahu husi baze

“Ha’u hakarak husu ba jovens intelektual sira kandidata an ba Xefe Suku, nune’e bele tama iha prosesu foti desizaun no kontribui direitamente ba dezenvolvimentu suku iha area rural, tanba tempu ona para joven sira hamrik sai ajente transformador no mudansa ba moris populasaun nian”. Marinho de Deus Pinto hateten

Bazeia ba dekretu lei nú. 9/2016, 8 Jullu kona ba Lei Suku fo atribuisaun no kompetensia ne’ebe aas ba Xefe Suku sira hodi hala’o sira nia papel hanesan iha Artigu 5⁰ no 6⁰ kona ba atribuisaun no kompetensia sira ba Xefe Suku

Iha artigu 5⁰ define Atribuisaun sira husi suku tuir lei :
a) Fó kontribuisaun ba koezaun husi membru sira husi komunidade no ba uniaun nasionál;

b) Garante pás no armonia sosiál husi komunidade;

c) Promove solusaun ba litijiu sira ne’ebé mosu iha komunidade nia laran ka entre Aldeia sira husi Suku;

d) Defende, garante no promove uzu no kostume tradisionál sira husi komunidade;

e) Defende no reprezenta interese jerál sira husi komunidade;

f) Promove bein-estár no dezenvolvimentu umanu husi membru sira husi komunidade;

g) Servisu Hamutuk ho órgaun no servisu sira husi Administrasaun Públika iha lala’ok husi
interese públiku iha komunidade nia laran;

h) Promove dezenvolvimentu sósiu ekonómiku husi komunidade, haree ba igualdade
jéneru;

i) Tau matan ba jestaun di’ak ba rikusoin husi komunidade.

2. Lahó prejuízu ba atribuisaun sira ne’ebé prevee iha leten organizasaun komunitária sira hala’o mós atribuisaun sira ne’ebé delega husi órgaun Administrasaun Sentrál Estadu nian ka Podér Lokál liu hosi kontratu interadministrativu sira husi delegasaun ba atribuisaun sira.

Tuir mai, iha artigu Artigu 6⁰ haktuir kona ba Kompeténsia sira Xefe Suku nian :

1. Haktuir ba sira nia atribuisaun Suku sira hala’o kompeténsia sira ne’ebé tuir mai,

a) Promove rezolusaun ba konflitu sira ne’ebé mosu entre membru sira husi komunidade ka aldeia, tuir kostume no uzu sira komunidade nian no respeitu ba prinsípiu igualdade;

b) Promove no defende knua sira hanesan elementu fundamentál kona-ba identidade kulturál
husi Povu Timorense;

c) Prezerva ezistensia uma-lulik ka uma-lisan komunidade nian;

d) Kolabora no partisipa iha organizasaun ba loron festa nian, serimónia, rituál no atividade sira seluk kona-ba afirmasaun husi tradisaun, kostume no uzu sira ne’ebé sai identidade ba komunidade, lahó prejuizu ba ezijénsia sira husi dezenvolvimentu sosiál no ekonómiku husi komunidade;

e) Promove realizasaun husi atividade transmisaun ínter-jerasaun ba uzu, kostume no tradisaun komunidade lokál nian;

f) Fahe informasaun kona-ba lei, regulamentu, debate no desizaun sira ne’ebé mai husi órgaun Estadu nian, no mós regra sira kona-ba direitu konsetudináriu (kostumeiru), ne’ebé iha interese ba komunidade;

g) Promove adosaun ba estilu moris sira ne’e saudável liu entre membru sira husi komunidade no hala’o sensibilizasaun ba nesesidade atu halo prevensaun ba moras hanesan kólera, meningite2, diareia, malária, SIDA, tuberkuloze no dengue;

h) Sensibiliza no mobiliza membru sira husi komunidade kona-ba importánsia saúde materno￾infantil no partisipasaun iha kampaña vasinasaun nian;

i) Sensibiliza no mobiliza membru sira husi komunidade kona-ba halakon violénsia doméstika iha komunidade;

j) Sensibiliza membru sira husi komunidade kona-ba importánsia husi eskola ba labarik no halo mobilizasaun hodi kombate abandonu eskola;

k) Hato’o ba Administrasaun Munisipál kona-ba ezisténsia husi labarik iha risku iha komunidade nia laran, no mós kona-ba ema iha situasaun eskluzaun sosiál ka vulnerabilidade;

l) Habelar no estimula partisipasaun hosi membru komunidade sira iha programa solidariedade no protesaun sosiál ne’ebé Estadu no Munisípiu sira hala’o;

m) Fó informasaun ba servisu rejistu sivíl, asaun sosiál no resenseamentu eleitorál kona-ba ema mate iha Aldeia sira iha Suku;

n) Halo resenseamentu ba membru sira husi komunidade, liu-liu hala’o liu husi “fixa família” no hato’o informasaun ba servisu Administrasaun Lokál kona-ba rezultadu ne’ebé hetan;

o) Halo sertifikadu katak membru komunidade sira iha rezidénsia baibain iha Aldeia sira husi Suku;

p) Halo deklarasaun kona-ba aptidaun pesoál husi membru sira husi komunidade;

q) Sensibiliza no mobiliza membru sira husi komunidade kona-ba atu tuir prátika di’ak kona-ba ijiene no te’in hahán;

r) Sensibiliza no mobiliza membru sira husi komunidade atu tuir regra sira kona-ba seguransa alimentár;

s) Mobiliza membru sira husi komunidade atu partisipa iha atividade edukasaun sívika, edukasaun eleitorál no iha asaun eleitorál no referendáriu sira;

t) Mobiliza membru sira husi komunidade ba prátika desportu no ba partisipasaun iha torneiu desportivu;

u) Sensibiliza no mobiliza membru sira husi komunidade hodi sira tuir sira nia obrigasaun tributária:

v) Sensibiliza no mobiliza membru sira husi komunidade ba manutensaun ijiene, salubridade, konservasaun no kualidade husi espasu públiku sira;

w) Hala’o resenseamentu agríkola no pekuáriu, ho koordenasaun ho servisu Administrasaun Lokál;

x) Sensibiliza no mobiliza membru sira husi komunidade ba importánsia atu proteje meiu ambiente;

y) Apoia atividade Konsellu Polisiamentu Komunitáriu husi Polísia Nasional Timor Leste (PNTL);

z) Fó apoiu ba atividade sira husi servisu kadastrál;

aa) Promove instituisaun husi kooperativa komunitária sira;

2. Governu regula liu hosi dekretu-lei ezersísiu husi kompeténsia sira ne’ebé define iha númeru iha
   leten.
3. Laiha prejuízu ba kompeténsia sira ne’ebé prevee iha númeru 1, suku sira iha mós kompeténsia hirak ne’ebé delega husi órgaun Administrasaun Lokál, liu-hosi kontratu interadministrativu husi delegasaun ba kompeténsia sira.
4. Kompeténsia hirak ne’ebé define iha númeru 1 labele ezerse se karik sei prejudika ba programa no planu nasionál sira ne’ebé hetan aprovasaun husi órgaun Administrasaun Sentrál ka husi órgaun Administrasaun Lokál.

Tuir Observasaun Jornalista SAPNewsTL nota katak, Jovens no estudante intelektual sira barak inklui feto potensial barak mak deside ona hodi kandidata an ba Xefe Suku sira iha territóriu nasionál.

Suku ne’ebe daudaun ne’e registradu iha Guvernu liu husi Ministériu Administrasaun Estatal (MAE) hamutuk 452, daudauk ne’e STAE mos prepara ona buletin votu oin lima ba Kandidatu Xefe Suku, Xefe Aldeia, Delegadu no Delegada sira.

Tuir Kalendáriu, Kandidatu Xefe Suku sira sei submete sira nia dokumentus ba Komisaun Suku iha loron 13 Fulan Outubru no Eleisaun Líderansa Komunitáriu sei hala’o iha loron 28 Fulan Outubru tinan ne’e.

Jornalista : Antonio Tilman