MJDAC-FFTL Sei Apoiu 700,000 USD Ba LFTL ! Realiza Liga Timorense 2025
Imajem : MJDAC Nelyo Isaac Sarmento hala’o enkontru ho parte LFTL no FFTL iha Salaun MJDAC Lecidere, 08/04/2025.
SAPNewsTL, Dili: Ministeriu Juventude Desportu Arte Kultura (sigla portuges MJDAC) no Federasaun Futebol Timor-Leste (FFTL) sei apoiu orsamentu ho montante 700,000 USD ba orgaun Liga Futebol Timor-Leste (LFTL ) realiza Liga Timorense epoka 2025.
“Orsamentu ba Liga Timorense epoka 2025, governu apoiu 500,000 USD no FFTL apoiu 200,000, nune’e orsamentu hamutuk 700,000 USD, tan ne’e ami sei halo planu tuir orsamentu 700,000 USD hodi organiza liga epoka 2025”. Dehan Vise-Prezidente LFTL Osorio Florindo da Conceição ba jornalista sira iha edifisiu MJDAC Lecidere, Dili tersa (08/04/2025).
Vise Prezidente ne’e hatutan, teknikamente LFTL preparadu maibe liga atu la’o ne’e presiza finanseiru, nune’e ohin enkontru ho MJDAC ho FFTL atu halo konfirmasaun.
“Nune’e, parte rua sei apoiu 700,000 USD ba realizasaun liga divizaun dahuluk no daruak epoka 2025, tan ne’e liga prepara kalendáriu ezekuta orsamentu ne’e ba liga tinan ne’e”.
Osorio informa, fasilidade infraestrutura naton ona tanba MJDAC autoriza atu utiliza Estadium Munisipal Dili iha tempu kalan, kampu bekora, Estadium Manatutu no Estadium Ermera no mos ho orsamentu 700,000 USD.
Nia dehan, parte orgaun liga sei halo orariu fiksu ida, liga sei lao liu fulan rua la hanesan iha 2023 nian, karik hetan tan patrosinador sira liga bele lao tinan tomak.
Nia afirma tan, subsidiu ba klube sira sei fo bazeia ba kalendáriu jogu nian maske iha kampanha kongresu LFTL ba daruak prezidente LFTL agora halo promesa ona subsidiu ba klube divizaun dahuluk 70,000 USD no divizaun daruak 30,000 USD tanba hakarak liga futebol la’o ho kompetisaun full.
Eis membru governu ne’e salienta tan, agora ba oin orgaun liga hein deit transferênsia orsamentu husi parte MJDAC ho FFTL, karik semana oin mak sira halo tranferensia finanseiru ba konta bankaria orgaun liga nian, orgaun liga mos halo anúnsiu loke janela transferensia jogador nian ba klube sira.
Iha fatin hanesan, Ministru Juventude Desportu Arte Kultura Nelyo Isaac Sarmento hatete, governu la iha duvida ba preparasaun ba liga tanba ne’e liga ne’e LFTL mak organiza, governu so hein deit bainhira mak liga ne’e atu la’o.
“Ohin, ami enkontru trilateral governu ho FFTL no LFTL tanba tinan ne’e ita tenki hahu liga, governu la iha duvida ba preparasaun ba liga tanba ne’e LFTL mak organiza, governu so hein deit bainhira mak liga ne’e atu la’o, governu prepara deit atu finansia.
“Nune’e ohin LFTL ho FFTL mai para atu fo hatene katak governu iha komitmentu atu apoiu liga ho 500,000 USD ba LFTL hamutuk ho FFTL, ho ida ne’e liga bele prepara an organiza liga iha tinan ne’e” Nelyo hateten
Iha sorin seluk, Sekretariu Jeral FFTL Adilson Ribeiro dehan, federasaun iha komitmentu hakarak apoiu masimu ba kontinuasaun liga futebol la’o iha tinan ida ne’e tanba ami hakarak liga iha tinan ne’e.
“Ami ami partisipa enkontru triparte entre FFTL, MJDAC ho LFTL tanba federasaun iha komitmentu hakarak apoiu masimu ba kontinuasaun liga futebol la’o iha Timor-Leste tanba ami hakarak liga la’o iha tinan ne’e, depois ami simu proposta husi LFTL, estrutura FFTL halo kedas reuniaun foti desizaun kedas katak apoiu 200,000 USD ba realizasaun liga tinan ida ne’e maibe sei apoiu fazeadamente”, Tenik Adilson.
Tuir planu, Liga Futebol ne’e sei realiza iha fulan Maiu tinan ne’e, iha ne’ebé sei organiza no responsabiliza hosi Liga Futebol Timor-Leste.
Reportajen: Augusto Dos Santos