Ospitál Maubisse Rejista Bebe Hamutuk 522 Inklui Feto 1 Kous Sedu Ho Idade 15

Imagem : Xefe departamentu Ginecologia no Obstétriku Luizinha da Costa iha nia knaar fatin, Ospital Referál Maubisse,11/08/2025.

SAPNewsTL, Ainaro : Xefe Departamentu Ginecologia no Obstétriku Ospitál Referál Maubisse (ORM) Luizinha da Costa hateten ORM registu bebé moris hamutuk na’in 522 hahú husi fulan Janeiru to’o Agustu 2025, iha ne’ebe kompostu husi partus normál hamutuk 313, Vacon 23 no Cesarian 164.

“Iha Janeiru to’o mai iha Agustu bebe hamutuk 522, ida ne’e mak inan sira ne’ebé maka partus iha ospitál referál Maubisse, depois bebé ne’ebé mak moris ho Cesarian hamutuk 164, partus normál 313, Vacon 23 no opitu fetál 22, ida ne’e lá’os Postu Maubisse de’it maibé husi Munisípiu tolu, inklui mós Suai”.

“Opitu fetál ne’e katak bebé ida ne’ebé mak señóra sira mai mate tiha ona iha kabun laran, ne’e mak ohin hamutuk 22 ne’e, ne’e mós la’os Postu Maubisse de’it maibe husi Munisípiu tolu, husi númeru ne’e iha inan menoridade ida ho idade 15 anos”. Dehan Xefe departamentu Ginecologia no Obstétriku Luizinha da Costa ba jornalista sira iha nia knaar fatin, Ospital Referál Maubisse segunda, (11/08/2025).

Nia informa inan sira ne’ebé mak partus labele, médiku sira iha alternativu oinsa bele ajuda inan sira hodi partus ho diak.

“Inan sira ne’ebé mai bee manas fakar liu tiha ona oras rua, entaun kolega mediku no doutor sira bele halo ventonza para dada sai bebé, agora kona ba bebé sira ne’ebe mak permatur ne’e la barak ida kuaze na’in 20 ida hanesan de’it, maioria mak normál”.

Nia akresenta, fasilidade iha Ospitál Referál Maubisse ba inan isin rua sufisiente, wainhira ai-moruk menuz Diretor Ezekutivu Ospitál Referál Maubisse halo pedidu urjente.

“Ami nia fatin ba inan isin-rua sira partu ne’e sufisiente, wainhira iha ai-moruk ne’ebe menuz ne’e ami nia Diretor halo pedidu urjente ai-moruk mai hela”.

Entretantu, totál Profisionál saúde iha Departamentu maternidade Ospitál Referál Maubessi hamutuk na’in 15 kompostu husi kontratadu na’in haat no funsionáriu permanente hamutuk na’in 11.