PDHJ & Sosiedade Sivil Konsidera SEATOU Halo Abuzu Poder

Imajem : Provedoria dos Direitos Humanos e Justiça Virgilio da Silva Guterres ba Jornalista sira iha Antigo Komarka Balide, hafoin partisipa iha selebrasaun Revolução dos Cravos ba dala 50 Quinta, (25/04/2024)

SAPNews TL, Dili – Provedoria dos Direitos Humanos e Justiça (sigla Portugués PDHJ), Virgilio da Silva Guterres (Lamukan), konsidera agresaun fisiku hasoru sidadaun iha fatin publiku ne’ebe komete husi Corpo Segurança Pessoal (CSP), Sekretaria Estadu Asuntu Toponomia no Organizasaun Urbanu (SEATOU) abuzu de poder no violasaun direitu humanos.

Provedoria dos Direitos Humanos e Justiça Virgilio da Silva Guterres (Lamukan) hateten,
Bainhira Sekretaria Estadu Asuntu Toponomia no Organizasaun Urbanu (SEATOU) Germano Santa Brites, ho ekipa hala’o eviksaun ba okupante espasu públiku iha area terminal Bekora, Sekretario Estadu ho emosaun hirus joven mane ida tanba hasai liafuan tolok hasoru nia.

“Atitude ne’ebe mak horseik ita nia polisia halo agresaun fisiku hasoru sidadaun mane ida iha fatin publiku ne’e abuzu de poder, asaun ne’e mai husi eskoltu governante ida no violasaun direitu ne’ebe grave tanba nia halo iha fatin publiku hasoru sidadaun ne’ebe mak forsa la iha, la uza kilat, provedor kondena hahalok ida ne’e tanba eskoltu ne’e atu proteje governante laos halo agresaun fisika ba hasoru sidadaun”Dehan, Provedoria dos Direitos Humanos e Justiça Virgilio da Silva Guterres ba Jornalista sira iha Antigo Komarka Balide, hafoin partisipa iha selebrasaun Revolução dos Cravos ba dala 50 Quinta, (25/04/2024)

Nia hatutan, razaun tolok hasoru Sekretaria Estadu Asuntu Toponomia no Organizasaun Urbanu Germano Santa Brites, hanesan difamasaun no bele lori ba tribunal ou ema ne’e sala tau aljema laos polisia halo agresaun fisiku hanesan horseik, aktu ne’e viola prosedimentu no kodiku profisional polisia nian.

“Timor-Leste nu’udar estadu de direitu demokratiku bainhira sidadaun sala polisia iha atu halo atuasaun bazeia ba mandadu Ministreitu Publiku nian no bainhira krime bele ba keixa iha tribunal, labele hatudu iha publiku, aktu ida ne’e hatudu arogansia no hatudu ingnoransia ba lei katak ita la komprende kondiku profisional ne’ebe mak sai matadalan ba atuasaun, tamba ne’e hanesan provedor lamenta ho situasaun ne’ebe akontese” Tenik nia.

Lamukan, salienta la iha ema ida ne’ebe mak kontra inisiativa governu nian atu ordena kapital Dili, maibe estadu nia impozisaun ba sidadaun atu kompri sira nia dever la bele halakon estadu nia komprimisiu respeita sidadaun nia direitu umanu, tanba sidadaun sira mai hela iha ne’e la iha sidadaun ida mak ilegal maibe sira mai hela iha ne’e nu’udar sidadaun ne’ebe tenke projete

Entertantu, iha sorin seluk reprezentante Sosiedade Sivil Inosençio de Jesus Xavier lamenta ho aktu Corpo Segurança Pessoal (SEATOU) hasoru Joven hatudu atitude falta respeitu ba estadu, tanba halo agresaun fisika hasoru joven aposta ba politika edukasaun, no formasaun sira, ou durante ne’e estadu no governu, la investe ba edukasaun ne’ebe laiha kualidade diak.

“Rezultadu tinan rua nulu resin, ita koalia kona ba edukasaun, ikus mai ita la forma joven sira, sai joven ida ne’e forte, joven ida ne’ebe hatene obedese no hakru’uk ba nai ulun sira, Politiku evikasaun ne’e, respeita ba sidadaun sira nia direitu, ema hot-hotu, apoiu ba dezenvolvimentu, maibe dezenvolvimentu ida sai sentru iha ema, ita labele hasai ema husi fatin ida, iha nia hela fatin, depois nia laiha fatin, ne’e politika ida ne’ebe kontribui ba politika “Homeless”, politika Laiha uma”.

Nia salienta politika eviksaun ida ne’e kontribui no halakon ema nia rendimentu, kontribui ba malnutrisaun, kontribui ba ema moras, no ema laiha uma, laiha rendimentu no laiha hahan, laiha fatin seguru, konkretamente ema hotu hare
inan ida foin partus loron tolu, depois hasai ema ne’e ho nia Bebe husi nia hela fatin, tanba deit atu halo sidade, ho intensaun atu halo jardin, ne’e la nessesariu

Enquantu sosiedade sivil rekomenda ba Polisia Nasional de Timor-Leste PNTL atu loke prosesu investigasaun hasoru membru ida ne’ebe, halo asaun hasoru joven iha Terminal Becora tanba aksaun ne’e la hatudu respeitu ba nia sidadaun sira nia direitu umanu.

Jornalista : Guilhermino Ramos da Cruz