Estudante 25.021 Kategoria La Ativu ! Hatudu UNTL Hakiduk Ba Kualidade
Imajem : Estrutura Universidade Nasional Timor Lorosa’e (UNTL) iha sala video konferensia kampus sentral UNTL Kaikoli, 24/04/2024
SAPNewsTL, Dili : Vise-Reitor Asuntu Akademiku no Garantia kualidade (VRAAGQ) Samuel Venancio de Sousa Freitas haktuir Sistema Informasaun Rejistu Akademiku (SIRA) hatudu total husi estudante rejistadu hamutuk 47771, entre sira, ema na’in 25021 mak la ativu ekivalente (52,4%), simu estudante foun UNTL nian tinan 2024 hamutuk ema na’in 3487 maka total estudante UNTL nian aumenta hamutuk ema na’in 51.258.
VRAAGQ Samuel Venancio de Sousa Freitas konsidera atrazu husi tempu ba dadus estudante pasivu rezulta UNTL hakiduk ba kualidade akadémiku iha programa estudu sira.
“Atrazu husi tempu naruk kona-ba dadus estudante la ativu sira nian iha UNTL mak hatudu rekua/hakiduk ba kualidade akademika iha sira nia programa estudu sira”.Tenik Vise-Reitor Asuntu Akademiku no Garantia kualidade (VRAAGQ) –Profesor Doutor Samuel Venancio de Sousa Freitas ba Jornalista sira iha Sala Video Conferénsia UNTL, 24/04/2024
Regulamentu akademika UNTL nian regula rejime preskrisaun, iha artigu 10, maibe kestaun ida ne’e seidauk aplika desde tinan akademiku 2013 hodi rezolve dezafiu sira kona-ba matrikula no iha preskrikasaun.
Tempu regularizasaun matrikula nian sei determina iha loron -29 fulan- feveiru tinan 2024, ne’ebe Diresaun Nasional ba Atendimentu estudane (DNAE) konsege rejista ona la-liuhusi pedidu readmisaun ba estudante la-ativu hamutuk 410,korresponde ba 1.60% husi total 9255 estudante ne’ebe la-ativu.
UNTL deside hodi hamutuk periodu ba regularizasun matrikula ba estudante la- ativu sira husi periodu tinan 2000 to’o 2012, ba periodu fulan-neen tan, entre fulan-Abril no Outubru tinan 2024, hafoin ida-ne’e dadus sira-ne’ebe la-regularizadu sei hasai ofisialmente husi SIRA.
“Regularizasaun matrikula iha UNTL sei hala’o liuhusi prosesu readmisaun (simu fila-fali) ne’ebe regula iha artigu 8 regulamentu akademiku UNTL nian, hanesan akontese ona iha prosesu normal admisaun nian, pedidu readmisaun tenke akompana ho bilete identidade,komprovativu ikus inskrisaun nian iha UNTL no selu propina no kopia transkrisaun notas”. Nia informa
Estudante sira ne’ebe ho matrikula regularizada bele iha asesu ba atividade akademiku sira ne’ebe fornese iha Departamentu Akademiku relevante sira, maibe iha prazu letivu ne’ebe estabelese ona husi kada Fakuldade, ba efeitu ida-ne’e tenke tuir kalendariu Akademiku tinan escolar 2024 nian.
“Matrikula la-regularizada husi estudante la-ativu sira ba period tinan 2000 to’o 2012, sei elimina kedas husi sistema SIRA, hahu husi loron 1 fulan Novembru tinan 2024. Eliminasaun dadus sei hala’o teknikamente husi DJSAA liuhusi despaxu Reitor nian ne’ebe fo sai espesifikamente ba efeitu ida ne’e”.
Entretantu, readmisaun ba estudante la-ativu, ne’ebe UNTL simu hahu husi tinan 2013 no tuir mai hala’o tuir prosedimentu normal ne’ebe previstu iha regulamentu akademiku UNTL, artigu 8, ho Fakuldade ne”ebe sira responsavel ba simu pedidu neebe verifica iha ponto 4 husi artigu 8, regulamento akademiku, no tuir lori ba gabinete VRAAGQ hodi halo validasaun molok haruka ba DGSAA.
“Iha fulan Augustu tinan 2022, liu husi ofisiu sirkular reitor nian NU.006/UNTL/R/VIII/2022 kona –ba Orientasaun jeral sira hodi implementa Rejime preskrisaun nian iha UNTL, deside hodi fo tempu fulan 18 hodi regula matrikula ba estudante la-ativu sira, liu husi prosesu readmisaun”.
Tinan ne’e UNTL sei ba aplika preskrisaun no tuir mai eliminasaun ba dadus sira ne’ebe la-regularizadu, liliu ba estudante la-ativu sira, ne’ebe UNTL simu husi tinan 2000 to’o 2012,ne’ebe ho total ema na’in-9255, kompostu husi Fakuldade Agrikultura hamutuk 1328, Fakuldade Engenharia Ciencia e Tecnologia hamutuk 1160, Fakuldade Edukasaun Artes e Humanidades hamutuk 2796, Fakuldade Medicina e Ciencia da Saude hamutuk 72, Fakuldade Ekonomia no Jestaun hamutuk 1571, fakuldade ciénsia sosiais hamutuk 1926, Fakuldade Direitu 197, Fakuldade Ciensia Ezatas laiha, fakuldade Filosofia hamutuk 15, Fakuldade Turismu, Arte e Industrias Criativas e culturais hamutuk 190.
Jornalista : Dircia Baptista Belo