Pe. Bernardo : Imi Keta Ta’uk, Nia Moris Hias Ona

Imajem : Sarani Parokia Sagradu Korasaun de Jesus (SAKROJES)Bekora Dili, 30/03/2024

SAPNewsTL, Dili : Administrador Parokia Sagradu Korasaun de Jesus (SAKROJES) Bernardo Paiva hateten Jesus Kristu moris hias ona husi mate, nia moris hias lori perdaun, damen no salvasaun ba humanidade hotu iha mundu.

“Imi keta ta’uk, imi buka Jesus Nazare ne’ebe mate iha kruz ? nia moris hias ona, nia laiha ne’e.Wainhira sira na’in haat halai ba rate, fatuk ne’ebe taka kuak ne’e duir an ona, sira tama ba rate laran hodi haree Jesus nia isin mate, maibe Jesus laiha ona, halo sira laran taridu no laran todan, derepente mane ida ne’ebe tur iha rate laran, dehan ba sira, imi buka se, Nia moris hias ona”. Tenik Pe. Bernardo Paiva liu husi omilia iha Igreja SAKROJES Bekora, 30/03/2024

Padre Selebrante ne’e salienta, Sira na’in haat ne’ebe rona lia ne’e, sira halai ba fo hatene ema hotu katak Jesus moris hias ona husi mate, sira sente haksolok teb-tebes, sira haklaken ba ema hotu, katak Jesus moris hias ona husi mate.

“Sira ne’ebe ba ho laran todan, fila ho laran ksolok, sira ho sentidu orgullu hodi haklaken maromak futar liafuan ba mundu tanba Jesus moris hias duni”. Nia konta

Padre Bernardo hatutan, wainhira sira haklaken Maromak nia liafuan ba mundu, povu Israel barak la fiar no la rona kona ba Maromak.

“Wainhira profeta sira haklaken kona ba Maromak, povu Israel sira la fiar no la rona, maske nune’e, maibe Jesus kontinua ba dere sira nia odamatan no tuku sira nia fuan hodi dehan ‘Ha’u mak imi nia Maromak, ha’u mak ne’e, keta halo tuir sira nia hakarak deit, maibe halo tuir ha’u nia liafuan sira, tanba liafuan ne’ebe Jesus ko’alia liafuan ne’e moris”.

Administrador Parokia SAKROJES Bekora ne’e husu ba sarani sira ho familia ida-idak ne’ebe partisipa misa atu fila ba uma lori ksolok, paz, no naroman ba uma kain sira.

“Ha’u husu ba familia hotu ne’ebe ohin mai misa, atu fila ba uma lori paz, ksolok no naroman ba ita nia uma kain sira, basa momentu espesial ne’e ita selebra maromak nia salvasaun ba ema sira iha mundu rai-klaran”.

Ho promesa sakramentu baptismu nian, Padre Bernardo husu sarani sira hotu hodi hakaas an sai husi nakukun fila ba naroman.

“Kalan ne’e, ho promesa baptizmu nian, mai ita ida-idak hakaas an hodi sai husi nakukun fila ba naroman, ohin ita mai lori lilin no sunu lilin, ne’e katak ita sei hakaas an hodi sai lilin ida iha ita nia moris, fila ba uma sai lilin ba familia no ema seluk iha servisu fatin”. Bernardo husu

Maromak nia liafuan ne’ebe moris, liafuan ne’e sei halo ema hotu moris, wainhira halo tuir no moris tuir Maromak nia liafuan sira iha moris lor-loron.

“Maromak nia liafuan ne’ebe moris, ita presiza moris tuir tanba Maromak dehan nia mak dalan, lialos no moris, Nia mak ai-han moris nian, ema se mak han nia isin no hemu nia ran, ema ne’e sei hela iha Maromak no Maromak hela ho nia, ema ne’ebe la han no la hemu nia isin no ran, Maromak sei la hela iha nia.”

Tuir observasaun SAP News TL iha terenu nota katak misa vizilia paskal ka sabadu aleluia refere la’o ho diak no susesu tanba hetan mos seguransa husi parte Polisia Nasional Timor Leste (PNTL) no Unidade Batallaun Ordem Publika (BOP).

Jornalista : Ekipa Kobertura