Polémika Indultu ! Estudante UNTL Konsidera Xefe Estadu Kria Injustisa

SAPNewsTL, Dili : Associação Acadêmica Estudantil Universidade Nacional Timor Lorosa’e, Lamenta ho Desizaun Prezidente da Repúblika da RDTL, José Ramos Horta ne’ebe fo Indultu ba kondenada nain rua hanesan Sra. Emilia Pires no Madalena Hanjam.

Desizaun ne’ebe  Prezidente da RDTL, Sr. Dr. José Ramos Horta, fó indulto ba kondenada nain rua hanesan Sra. Emilia Pires no Madelena Hanjan bazeia ba Dekretu do Prezidente da Repúblika Nú. 125/2023, de 14 de dezembru, hodi liberta total sira nain rua husi responsabilidade criminal ka la kumpri total pena ne’ebe Tribunal aplika ba kondenada nain rua.

Associação Acadêmica Estudantil Universidade Nacional Timor Lorosa’e preokupa no konsidera desizaun refere la justu no kria injustisa ba povu Timor-Leste

“Desizaun Prezidente da Republika nian hodi fo indultu ba kondenada nain rua nee la justu ka kria hela injustisa ba povu Timor-Leste tanba sidadaun nain rua refere Tribunal kondena ho pena prizaun efetiva ho krime korupsaun maibe Presidente fo indultu hodi liberta sira husi pena ne’ebe tribunal atribui ba sira”. Tenik porta voz Jopra Fernandes Amaral liu husi komunikadu imprensa iha kampus sentral UNTL, 20/12/2023

Lider Estudante UNTL ne’e konsidera Prezidente da RDTL fo indultu ba kondenada Emilia Pires no Madalena Hanjam  ne’ebe komete Krime Korupsaun ne’e fo prejuízu ba Estadu RDTL iha neebe afeta diretamente ba Dezenvolvimentu Sosial no Ekonómika. Alem de ida ne’e, kondenada refere durante iha prosesu nunka koopera ho autoridade judisiariu no halai ba estranjeiru hodi hases an husi justisa ka hases an hodi lakohi asumi responsabilidade criminal ba aktu ne’ebe sira prátika hasoru Estadu RDTL.

Desizaun Prezidente da Republika, hodi fo indultu ba kondenada nain rua, hatudu puramente Prezidente da Republika lakohi atu, eis governante sira ne’ebe korupta osan povu nian durante iha mandatu governativu atu hetan kastigu hanesan sidadaun baibain sira seluk neebe oras nee daudaun kumpri hela pena iha estabelesimentu prizional sira iha Timor.

Alem de ida ne’e, Prezidente da Repúblika mos halo diskriminasaun ba povu Timor-Leste liuliu ba prizioneiru sira ne”ebe agora daudaun kumpri hela pena iha prizaun tanba Prezidente la fo indultu ba rekluzu ka prizioneiru sira neebe mak durante prosesu judicial lao sira kolabora no respeita desizaun Tribunal nian hodi ba kumpri iha Prizaun.

Associação Acadêmica Estudantil Universidade Nacional Timor Lorosa’e (UNTL) husu Presidente Republika hodi labele repete fo indultu ba sidadaun sira ne’ebe komete korupsaun tanba fo prejuizu ba estadu nia dezenvolvimentu.

“Ami rekomenda ba Prezidente da Repúblika, ba oin, atu la bele kontinua fo indultu ba kondenada ou kondenadu sira ne’ebe komete krime korupsaun tanba krime korupsaun nudar aktu neebe estraga ka fo prejuizu ba dezenvolvimentu país nian no aktu imoral neebe kontra kultura Timor-Leste nian no trai prinsipiu husi heroi sira neebe sakrifika ona sira nia vida ba rai ida ne’e hodi hetan Liberdade”. Nia Sublinha

Estudante UNTL mos husu ba Prezidente da Republika atu toma konsiensia katak korupsaun ne’e nu’udar aktu ne’ebe fo ameasa no risku ba destinu nasaun no estadu nian. Nune’e, la bele tolera hodi uza kompetensia konstituisional no legal atu fo indultu ba kondenadu no kondenada sira ne’ebe Tribunal kondena ho krime korupsaun.

Foinsa’e Timor oan ne’e husu Xefe Estadu atu promulga diploma lejislativu sira neebe produz husi Parlamentu tenki análise no estuda didiak antes promulga atu ikus mai la bele fo deit benefisia ba, grupo balun ka elit sira deit hanesan exemplu promulga Lei nu. 20/2023, de 12 de Dezembru, ne’ebe ikus mai kria injustisa social iha rai ida ne’e no diploma neebe la fo benefisiu ba ema hotu la bele promulga maibe tenki VETA, tamba bainhira tama ona iha ordenamentu juridiku ne’e ema hotu tenki kumpri.

Entretantu, antes ne’e Presidente Republika Jose Ramos Horta klarifika kata desizaun ne’e mai husi inisiativa PR nian bazeia ba Konstituisaun RDTL artigu 85 alinea i no dekretu Lei nu. 20/2023 komutasaun de pena tanba razaun umanitaria no seluk tan

Jornalista : Isabel de Deus