Polítika Eviksaun ! Germano : La Presiza Mate Ba Dezenvolvimentu, Tempu Atu Hadia

SAPNews TL, Díli – Hafoin hala’o eviksaun ba komunidade sira iha Ai-Tarakan laran, Merkadu Comoro, Bidau, no Terminal Becora, Sekretáriu Estadu Asuntu Toponímia no Organizasaun Urbanu (SEATOU), Germano Santa Brites Dias, relata progresu servisu bá Primeiru-Ministru (PM), Kay Rala Xanana Gusmão.

Tuir informasaun ne’ebe SAPNews Timor-Timor-Leste asesu liu husi komikandu imprensa, Sekretáriu Estadu Asuntu Toponímia no Organizasaun Urbanu (SEATOU), Germano Santa Brites Dias hateten, objetivu sorumutu ida ne’e hodi atualiza progresu serbisu SEATOU nian iha terenu durante implementasaun.

“Sorumutu ida ohin ho Primeiru-Ministru tanba iha asuntu servisu balun ne’ebé ha’u persiza atu koordena no ko’alia nune’e servisu ne’ebé ekipa SEATOU ho liña, Ministeriál sira bele halo ami-nia servisu iha terrenu”.Dehan Sekretáriu Estadu Asuntu Toponímia no Organizasaun Urbanu, Germano Santa Brites Dias, ba Jornalista sira, hafoin hala’o sorumutu ho Primeiru-Ministru (PM), Kay Rala Xanana Gusmão, iha Palásiu Governu, Segunda (29/04/2024)

Sekretáriu Estadu afirma, despezu administrativu sira ne’ebé halo durante ne’e tuir Lei ne’ebé iha tiha ona. Tanba ne’e Xefe Governu husu ekipa atu halo servisu bazeia ba Lei Nú 6/2017 19 de Abril, Ordenamentu territóriu no kompeténsia ne’ebe Governu atribui ba nia hodi dezenvolve sidade.

“Daudaun ne’e ekipa hosi Ministériu Administrasaun Estatál (MAE), liu hosi Autoridade Munisípiu Díli mak rekolla hela dadus hosi ita nia maluk vítima afetadu sira, tanba sira mak hasai notífikasaun, ne’ebé ekipa ida-idak hala’o hela servisu, SEATOU nia servisu maka haree espasu públiku sira ne’ebé la organizadu, la moos hodi hasai, Tenke foti dadus hodi hatene populasaun hira mak kona despezu administrativu. Kona-bá indemnizasaun ka la’e ne’e ekipa seluk nia servisu, SEATOU nia servisu maka hamoos de’it,”

Governante ne’e afirma, Atividade despezu administrativu nafatin la’o iha fatin-fatin to’o sidade Díli organizadu no moos los ona,
Kona-bá despezu iha área tasi-tolu molok atividade ne’e hala’o hahú loron ida (1) fulan-Maiu 2024, ekipa ida sei ba ko’alia uluk ho populasaun hafoin hala’o serbisu.

“Hanesan sidadaun tenke koopera ita la persiza ko’alia tun-sa’e, prontu mate ne’e ita-nia rain ukun-an ona, más ha’u hanoin la persiza mate tanba dezenvolvimentu, ita tenke haka’as-an atu hadi’a rai ne’e, la persiza mate tanba dezórden, foer hanesan ne’e, hela ho lixu tama to’o tasi-laran ne’e mós ita hakarak bá mate tuir, ne’e ha’u hanoin ladún di’ak, area tasi-tolu ne’e tama iha área protejida, povu tenke koopera ho Estadu no Governu atu ita bele hadi’a ita-nia sidade ne’e ho didi’ak,”

Nia hatutan, SEATOU mós husu populasaun sira ne’ebé okupa rai iha eis merkadu Becora tenke hamamuk ona, Area sira ne’ebé Governu liuhosi SEATOU halo despezu administrativu mak hanesan, Bidau Pasar Sengol, Bidau Santa-Ana, Aitarak-laran no Terminál Becora no sei kontinua ezekuta orden iha espasu publiku sira ne’ebe ita idenfitikadu.

“Dehan sira vítima krize 2006 ne’e loos duni maibé, Estadu fó netik ona osan ruma bá sira tenke bá harii uma iha ita-nia rain, Labele kontinua okupa fatin ne’e, tanba área ne’ebá merkadu nu’udar fatin bá ema hotu bele uza atu fa’an sasán. Ita labele bá hela permanente iha merkadu laran, depois okupa tiha ita solda tutan hodi fó-fali bá ema seluk aluga. Ne’e ladún di’ak. Ne’ebé, ha’u hanoin la’ós ha’u de’it mak la kontente más ema seluk mós ladún kontente karik sé ita halo buat ida-ne’e tanba daudaun Governu planeia ona atu hadi’a merkadu sira iha Dili laran,”

Entertantu, ekipa konjunta ezekuta serbisu bazeia ba Dekretu-Lei númeru 3/2024, 17 janeiru, alterasaun dahuluk Dekretu-Lei númeru 33/2008, 27 agusto, kona-bá ijiene no órden públiku. Nune’e mós, iha Dekretu-Lei númeru 51/2016, 28 dezembru kona-ba lisensiamentu mesajen publisitária, no Dekretu-Lei númeru 2/2027, 22 marsu kona-bá sistema jestan rezidu sólidu urbanu, inklui Dekretu-Lei númeru 3/2017, 22 marsu kona-bá rejime zona estasionamentu durasaun limitadu.

Jornalista : Guilhermino Ramos da Cruz.