Portugal Halakon TL Iha Final Voleibol Praia Femenina
Imajem : Atleta Portugal iha Dili, Timor-Leste
SAPNewsTL, Díli : Jogadora Portugal Matilde Silva no Ines Silva, konsege lori atleta feto Portugal manan atleta uma nain Timor-Leste iha final jogu desportivu CPLP modalidade voleibol praia.
Marcela Mery da Costa – SAPNews TL
Durante jogu hahu ho set dahuluk, Timor-Leste hatudu forsa bo’ot hodi lori pontu dahuluk to’o pontu 8. Maibé, ekipa Portugal konsege reorganiza jogu no muda situasaun, nune’e set primeiru remata ho rezultadu portugal hetan pontu 21 no Timor-Leste 18.
Hafoin deskansa durante minutu balun jogu kontinua hakat ba set segundu, Timor-Leste hetan oportunidade hodi baku bola dahuluk tama ba area Portugal nian, nune’e TL hetan
pontu rua (2) kompara ho Portugal pontu ida, maibé TL la konsege kontinua domina jogu, nune’e iha dinamika feto Portugal hatudu tatika hodi lori pontu to’o remata set segundu
ho rezultadu 21-13.
Tuir observasaun SAPNews iha terenu nota katak, adeptus Timor-Leste hakilar maka’as hodi fó motivasaun ba jogador timoroan Miguela Belo no Agusta da Silva, maibé jogu refere to’o tempu remata TL lakon, Quinta Kampu Volibol Praia Feminina Largo Lecidere (24/07/2025)
Entretantu, iha jogu final feminina Timor-Leste kontra Portugal ne’e, hetan partisipasaun husi Primeiru-Ministru (PM) Kay Rala Xanana Gusmão, Ministru Juventude, Desportu, Arte no Kultura (MJDAC) Nélio Isaac, no adeptus sira.
