PR Horta Kondekora Nicolau Lobato, Rekunhese Lasama & Assanami Nu’udar Defensor Direitu Umanu
Imajem : Presidente Repúblika José Ramos Horta entrega medalla kondekorasaun ba Nicolau Lobato nia mane José Lobato iha Tasi-Tolu, 20/08/2025. Foto : Média GPR
SAPNewsTL, Dili : Prezidente Repúblika Demokratika Timor-Leste (RDTL)
Jose Ramos Horta kondekora Saudozu Nicolau Lobato ho Ordem de Timor-Leste liu hosi entrega ba nia-oan mane José Lobato.
Ermelinda Soares – SAPNewsTL
Jose Ramos Horta hatete saudozu Nicolau Lobato nu’udar mos Primeiru Ministru dahuluk no segundu Prezidente RDTL (1977-1978), hamutuk ho luta na’in no patriota sira termina sira-nia sakrifísiu no destiñu ba independénsia Timor-Leste nian.
“Nicolau Lobato, Primeiru-Ministru no Komandante-Jerál, mate iha kombate iha 31 Dezembru 1978, símbolu ikus sakrifísiu nian; iha loron 16 fulan Agostu ha’u hala’o viajen ba fatin ne’ebé nakonu ho raan ne’ebé Nicolau Lobato monu ho eroízmu no dignidade. Ha’u akompaña husi Nicolau Lobato nia oan-mane mesak, José Lobato”.
“Ha’u agradese ba Governu, Xefe Forsa Defeza, Vise Xefe Forsa Defeza, autoridade munisípiu Manufahi (Same), no Jeneral reformadu Lere Anan-Timor ba esforsu ne’ebé halo hodi prepara ha’u nia vizita”.Dehan Prezidente Repúblika José Ramos Horta iha Tasi tolu, Kuarta 20/08/2025.
Xefe Estadu ne’e dehan, “simplesmente atu to’o iha fatin ne’ebé Nicolau Lobato monu no propoin dignifikasaun ida ba sítiu ne’e. Ema rihun ba rihun ne’ebé haraik-an no simples mai iha fatin ne’e. Ha’u lakohi atu perturba ka fó todan ba autoridade sira no populasaun lokál ho ha’u nia vizita”.
“Ita hanoin hikas ho respeitu kle’an líder sira ne’ebé sobrevive iha okupasaun no forma rekonstrusaun nasionál, Kay Rala Xanana Gusmão no sira ne’ebé la’o hamutuk ho nia dezde 1975 liuliu dezde 1981 ne’ebé to’o iha Tasi-Tolu iha meia-noite 20 Maiu 2002”.
FALINTIL halo rezisténsia iha foho, Rede Klandestina ne’ebé kompostu husi operativu anónimu sira, mane, feto no foin-sa’e sira ne’ebé barani mak asegura ligasaun sira entre funu-na’in sira no sidade okupadu sira hodi mantein rezisténsia moris iha vijilánsia konstante nia okos. Sira nia asaun sira permite sobrevivénsia lojístika no polítika luta armada nian.
Nune’e mos RENETIL (Resistensia Nasional Estudante Timor Lorosa’e), moris iha universidade Indonezia, hala’o papel krusial hodi mobiliza juventude Timoroan sira. RENETIL sai forsa estratéjiku rezisténsia nian, hodi artikula frente polítika no diplomátika ne’ebé projeta Timor-Leste nia luta ba palku internasionál.
“Entre ninia líder sira ne’ebé notavel liu, saudozu Fernando de Araújo “Lasama”, figura karizmátiku no defensór inkansável ba direitu povu timoroan nian, no Mariano Assanami Sabino Lopes, lian ativu no organizadór ba mobilizasaun desizivu sira, simboliza joven sira-nia kontribuisaun ba libertasaun nasionál”.
Iha komemorasaun loron FALINTIL, Presidente Repúblika José Manuel Ramos Horta kondekora Nicolau Lobato liu hosi entrega medalla kondekorasaun Ordem de Timor-Leste ba nia representantente família José Lobato.