Pre-Eskolar Dominiciana Soibada Gradua Labarik 25

SAPNewsTL, Manatuto – Ensino pré-eskolar Dominicana Soibada, realiza serimónia graduasaun etapa segundu ano letivu 2023 ba estudante finalista 25, kompostu husi feto 10 no mane 15 iha Postu Administrativu Soibada.

Ohin inan aman sira mak sai testamuña ba serimónia graduasaun daruak husi pré-eskolar Dominicana soibada, hodi hare no rona, fini ne’ebe pré-eskolar prepara no eduka, karater labarik sira nian hodi muda mentalidade labarik, hanesan sasukat ba kualidade edukasaun iha futuru

“Ha’u hakarak hato’o agradese tebes ba inan ho aman ne’ebe oferese ona sira nia oan hodi mai aprende hamutuk ho ami iha pré-eskolar Dominicana ne’ebe eziste iha ita rain” informa, Diretora pré-eskolar dominicana soibada, Madre Alzira Fatima dos Reis da Costa ba SAPnews-TL, iha resintu koleziu antigu Soibada, Segunda (04/12/2023)

Tuir Diretora pré-eskolar dominicana soibada, Madre, Alzira Fatima dos Reis da Costa, hateten pré-eskolar soibada iha 2022 gradua ona estudante hamutuk 22 no ohin organiza tan serimónia graduasaun daruak ba estudante finalista 25, Nia salienta.

“Serimónia graduasaun ne’ebe ho tema ‘edukasaun ne’ebe diak hahu husi loron ohin’, sai sentidu ba ita nia inan aman sira atu fortifika matenek ne’ebe labarik estudante pré-eskolar sira hetan ona durante tinan ida, hodi haforsa kapasidade oan sira nian iha futuru ho mentalidade edukativa”.

Nia haktuir Pré-eskolar Dominicana Soibada, hetan ona apoiu husi ministeiru edukasaun kona ba kurikulu no merenda eskolar, maibe governu seidauk apoiu mobiliarius eskola nian, aleide ne’e, liu husi reunian edukasaun munisipiu manatuto nian, afirma ona kona ba pré-eskolar, maske la obrigatoriu maibé inan aman sira tenki iha konsiensia oferese oan sira ba aprende iha pré-eskolar

Dirijente pré-eskolar Dominicana ne’e, sujere ba inan aman sira atu labele lakon esperansa hodi oferese nafatin oan sira atu mai aprende iha Pré-eskolar dominicana, tamba save ba futuru maka mobiliza labarik kiik ho idade tinan lima (5) mai kraik atu bele aprende ho diak.

Iha fatin hanesan, representante inan aman, Milenio Jeromanu do Carmo Mendes, ba SAPnews hateten, nia parte agradese ba dedikasaun tomak ne’ebe kontribui ona husi madre ho manorin nain sira seluk ne’ebe ho sita nia kapasidade hodi muda ona mentalidade intelektuais labarik nian.

“Ami apresia, orgulho no agradese tebes ba dedikasaun husi manorin nain sira durante tinan ida hodi trasforma kapasidade intelektual ba ami nia oan sira, oinsa atu kompriende prosesu aprendizajen ho karakteristika ne’ebe maduru brani hambrik iha publiku nia oin”.

Representante inan aman ne’e akresenta, nia iha esperansa ba oan sira, katak matenek ne’ebe sira aprende ona liu husi hare rona no analiza sei la monu deit iha fatin aprendizajen maibe oan sira sei pratika hodi kontinua sira nia estudu ho koiñesementu ida ne’ebe adekuadu hodi atingi sira nia mehi iha futuru ho kualidade, koiñesementu, abilidade, hahalok no valor diak.

Entertantu, serimónia graduasaun ne’e partisipa husi representante administrator postu, representante Komandante eskuadra, vice prezidente veterano soibada, sefi suku sesante, sira no inan aman husi estudante graduadu 25.

Jornalista : Guilhermino Ramos da Cruz