Preokupa Mídia Sira Halo Live Streaming Iha Kampanha, KI Sei Dada Hikas Karteira Profisional

SAPNewsTL, Dili : Consellu Imprensa(CI), hala’o konferensia imprensa ho tema “Reportajen Eletoral Midia no Jornalista iha periodo kampanha politika no elesaun lejislativa 2023”, objetivu husi kmunikadu ne’e  hodi husu responsabilidade no dever Midia ho jornalista sira nian kumpre kode etika jornalizmu iha kampanha no eleisaun parlamentar

Tuir Porta Voz Konsellu Imprensa, Konselleiru Exepedito Loro Dias Ximenes katak, konellu imprensa monitoriza nafatin ba produtu jornalistiku sira no sei fo karta notifikasaun ba jornalista ne’ebe mak viola kode etika Jornalista durante eleisaun parlamentar

“Konsellu Imprensa iha kedas eleisaun prezidensial hasai ona matadalan ida atu ita bele kaer hanesan giaun, nune’e bele hala’o kna’ar ho imparsial, ne’ebé hakerek ona iha kode étika jornalismu nian no kuandu jornalista sira ne’ebe mak viola kóde étika jornalista, primeiru fo notifikasaun para atu nia bele hadia, se notifikasaun mak nia nafatin kontinua viola nia karteira professional, Konsellu Imprensa sei foti fila fali, no la fo tan”.Dehan Representante Presidente Konsellu Imprensa,Exepedito Loro Dias Ximenes, ba Jornalista sira iha Salaun CI, Quarta-feira (19/04/2023)

Haktuir nia katak, bainhira jornalista sira viola infrasaun sira iha tempu kampanha eleitoral, sei notifika mídia, no dada hikas karteira profesional. Alende ne’e nia mos hateten, Konsellu Imprensa iha eleisaun sira liu ba, sempre halo advokasia makas kona-ba direitu jornalista sira nian oinsa bele vota hanesa sidadaun iha fatin ne’ebe halo kobertura.

“Konsellu Imprensa sente katak presiza nafatin Konsellu Imprensa nia intervensaun katak, CI sei haruka karta ofisial ida ba órgaun Eleitorál CNE ho STAE, atu tau atensaun makas liu ba servisu ne’ebe jornalista sira halo liu-liu iha prosesu eleitoral”, tenik nia.

Iha fatin hanesan, Konselleiru Francisco Simões mos hatutan, Jornalista sira presija la’o tuir nafatin kode etika Jornalista nian iha eleisaun parlamentar atu nune’e labele halis ba partidu sira

” Konsellu Imprensa nafatin fo hanoin ba jornalista sira atu kontinua tane kóde étika jornalista nian, bainhira halo kobertura iha eleisaun Parlamentar,hodi nune’e ita la halis ba partidu ou lider partidu balu, imparsial ne’e importante”, dehan nia.

Entertantu, Konselleiru ne’e mós preokupa ho mídia sira ne’ebé mak rejistu ona iha Konsellu Imprensa depois halo live streaming iha atividade Partidu Politiku sira, tanba live streaming ne’e divulga informasaun ne’ebe mak fontes sira ko’alia barak mak viola kode etika Jornalista

Journalista: John Marito