Prepara Joven Ba Servisu, SEFOPE Asina Kontratu Ho Sentru Formasaun 16

SAPNewsTL, Dili : Sekretariu Estadu Formasaun Profisional no Empregu(SEFOPE), hamutuk ho sentru formasaun 16 asina akordu hodi bele halo investimentu nune’e bele fo aprendijajem ne’ebe diak ba joven sira. Tuir Sekretariu Estadu Formasaun Profisional Sr. Alarico do Rosario hateten fo kontratu ba sentru formasaun sira atu nune’e bele kesi metin sira hodi serbisu.

“Ohin SEFOPE asina kontratu ho sentru formasaun sira tanba orsamentu governu nian maka hodi apoiu no reforsa ba sentru formasaun sira no ita tenki iha kontratu ida atu kesi metin sira bele serbisu no ita mos bele halo monitorizasaun, ”dehan Sekretariu Estadu Formasaun Profisional Alarico do Rosario ba jornalista sira, iha Salaun SEFOPE, Caicoli-Dili, (17/04/23)

Nia reforsa tan katak kada tinan sira realiza programa ida ne’e atu nune’e sentru formasaun sira bele iha kbi’it no forsa kualifikadu hodi fo aprendijajem ne’ebe diak ba joven sira.

“Programa ida ne’e kada tinan iha no tinan ida ne’e mak ita nia investimentu ba Sentru Formasaun sira mak ohin asina ona kontratu ne’e no tinan oin mos sei hanesan ne’e tanba ida ne’e la’os ba tempu maibe ida ne’e politika investimentu ba rural ne’e mak ita fo apoiu ba sentru formasaun sira oinsa sira bele hetan kbi’it no forsa kualifikadu ba formasaun no mos hodi bele fo aprendijajem ne’ebe di’ak ba ita nia joven sira,” Tenik Sr.Alarico do Rosario.

Nia hatutan tan sentru formasaun hirak ne’ebe hetan kontratu husi SEFOPE mak hanesan Sentru Formasaun Komunitariu, Rejistradu no mos Akreditadu.

“Sentru Formasaun ne’ebe mak hetan kontratu husi sentru formasaun komunitariu rua (2), sentru formasaun rejistradu rua (2) no mos sentru formasaun akreditadu sanulu (12), formasaun ne’e prioridade liu ba Agrikultura, Hospitalidade no Konstrusaun ho orsamentu hamutuk rihun Atus-haat-ualunulu resin-ida dolares Amerikanu (USD 481.000), ”Hakotu nia.

SEFOPE fo apoiu kontratu ba Sentru Formasaun sira hodi nune’e sira bele iha kbi’it hodi fo formasaun ba joven sira atu nune’e bele kapasita joven sira liu husi tipu area formasaun hirak ne’ebe sira hili.

Lembra fali katak Iha tinan 2023, iha inisiu publikasaun vaga ho totalidade aplikante hamutuk nain (131) kompostu husi Mane (66) no Feto (65) no husi rezultadu selesaun dokumentus no intrevista komprova katak aplikante nain (70) mak passa iha faze ida ne’e, no rezumu estagiadu kompostu husi aplikante nain (67) no nain (3) mak lakon kontaktu no iha estajiadu nain (7) mak mai husi ema defisiensia ne’ebe mak sei tuir mos estajiu nasoinal no kompostu husi Sentru ADTL Ahisaun no Sentru CDITL.

Jornalista: John Marito