Cidália Fo Agradese Ba Povu TL Nia Orasaun & Solidariedade Ba Família Lu-Olo

SAPNewsTL, Dili – Espoza Saudozu Francisco Guterres “Lu-Olo”, Dona Cidália Nobre Guerres hato’o profunda gratidaun ba povu Timor-Leste no ema hotu ne’ebé durante loron 40 akompaña família iha períodu lutu liuhusi orasaun, mensajen kondolénsia, amizade no solidariedade, “Distánsia bele haketak nia fatin, maibé la bele haketak nia sentimentu nu’udar oan Timor-Leste.

Cidália Nobre hateten, perda Lu-Olo sai momentu difísil ba família, maibé prezensa no apoiu husi povu no instituisaun sira fó forsa ba família atu kontinua moris ho fiar no esperansa.

“Falesimentu husi saudosu Francisco Guterres ‘Lu-Olo’ mak momentu difísil ba ami tanba ami lakon ema ne’ebé ami hadomi. Maibé durante dalan ida-ne’e, ami sente katak ami la la’o mesak.” Dehan esposa Saudoso Dr. Francisco Guterres”Lu-Olo”. Cidalia Nobre Guerres liu husi Diskursu iha Igreza Katedral Dili Sabadu, 08/08/2026.

“Ami mos agradecimentu ba Sua Eminénsia Kardeal Virgílio do Carmo da Silva, bispu sira, padre, diáconu, relijiozu no relijioza, seminarista no katekista sira ne’ebé partisipa iha selebrasaun Missa Agradecimentu no kontinua fó akompañamentu espirituál ba família.” Nia hatutan

Cidália Nobre mos hato’o omenajen espesial ba Veteranu no Kombatente Libertasaun Nasionál, antigos komandante, maluk FALINTIL, guerrilheiru no membru Resisténsia ne’ebé durante tinan 24 hamutuk ho Lu-Olo iha luta ba independénsia Timor-Leste.

“Ho respeitu no emosaun kle’an, ami hato’o omenajen no profunda gratidaun ba Veteranu, Kombatente Libertasaun Nasionál, antigos Komandante, maluk FALINTIL, guerrilheiro no maluk Resisténsia sira hotu ne’ebé durante tinan 24 hamutuk ho Lu-Olo iha luta ba independénsia Timor-Leste.” Nia Salienta.

“Ami hato’o agradesimentu ba Sekretáriu-Jerál FRETILIN, membru Komité Sentral, lideransa no estrutura FRETILIN husi nivel nasionál to’o baze, inklui militante no simpatizante sira, tanba akompaña Lu-Olo durante nia trajetória polítika no servisu ba nasaun. No kontinua fó ba ami família iha momentu lutu ida-ne’e.”

“Ita boot sira nia prezensa iha momentu ida-ne’e hatudu katak akompañamentu ne’ebé ita boot sira fó ba Lu-Olo la remata deit ho servisu, maibé kontinua ho amizade, respeitu no solidariedade ba nia família.”

Nia hato’o mos gratidaun ba Prezidente Repúblika, Prezidente Parlamentu Nasionál, Primeiru-Ministru, membru Governu, deputadu Parlamentu Nasionál, ex-titular órgaun soberania, dignitáriu no autoridade Estadu sira ne’ebé marka prezensa, hato’o kondolénsia, halo orasaun no fó apoiu ba família.

“Agradese ba Aero Dili, lideransa, tripulasaun no ekipa tomak ne’ebé fó fasilitasaun ba voo espesial atu lori restu mortais Lu-Olo fila mai Timor-Leste, no ba F-FDTL, PNTL, Bombeiros, EDTL, servisu saúde no emerjénsia, seguransa, tráfiku no ekipa apoiu sira ne’ebé kontribui ba prosesu no atividade sira.”

“la haluha mos autoridade munisipál no lokál, administrador postu administrativu, xefe suku, xefe aldeia, lia-na’in no lideransa komunitária, instituisaun públika no privada, sosiedade sivíl, organizasaun nasionál no internasionál, juventude, grupu feto no setor privadu ne’ebé fó apoiu ba família.”

Cidália konsidera katak, orasaun husi komunidade sira sai fonte forsa ba família durante tempu lutu. “Bainhira ami nia laran todan, ita boot sira nia orasaun fó kmaan. Bainhira ami sente fraku, ita boot sira nia prezensa fó forsa” Nia esplika

Nia mos hato’o agradesimentu ba universidade no instituisaun ensinu superior, eskola, estudante no juventude sira ne’ebé marka prezensa no manifesta solidariedade. Cidália husu juventude atu kontinua aprende no transmite istória, memória no valores Timor-Leste ba jerasaun tuirmai.

Ba jornalista no profisionál komunikasaun sosiál nasionál no internasionál, nia mos hato’o gratidaun tanba akompaña momentu sira ne’e no lori informasaun ba públiku.

Cidália Nobre hato’o mos agradecimentu ba povu Timor-Leste tomak, inklui Timoroan sira ne’ebé hela iha rai-li’ur, ne’ebé husi fatin oioin hato’o kondolénsia, orasaun, ai-funan, mensajen no solidariedade ba família.

“Ba ema barak, Francisco Guterres ‘Lu-Olo’ mak kombatente, líder, estadista no figura importante ida iha istória Timor-Leste. Maibé ba hau, nia mak hau nia kaben. Ba ami nia oan sira, nia mak aman. No ba ami família, nia mak ema ida ne’ebé ami hadomi.” Nia sublina

Nia afirma, maski Lu-Olo la hamutuk ona ho família fisikamente, nia memória, liafuan, ensinamentu no momentu sira ne’ebé fahe hamutuk sei kontinua moris iha família no ema sira ne’ebé konhese nia.

“Lakon nia la fasil atu simu. Maibé durante loron 40 hirak ne’e, ita boot sira nia prezensa hanorin ami katak, maski dok ne’e kle’an, ami bele tahan bainhira ita la’o hamutuk, unidu iha fiar, família, amizade, domin no solidariedade.”

Cidália Nobre, lori família nia naran, hato’o pedidu deskulpa ba ema hotu karik durante tempu lutu família la konsege simu ema hotu ho di’ak, atende telefone, responde mensajen ka hato’o agradecimentu diretamente.

Nia mos husu atu ema hotu perdua Lu-Olo karik durante nia moris iha liafuan, atitude ka hahalok ruma ne’ebé bele halo ema seluk nia laran susar.

“Se durante saudoso Francisco Guterres ‘Lu-Olo’ nia moris iha liafuan, atitude ka hahalok ruma ne’ebé, ho konsiénsia ka la ho konsiénsia, halo ema ruma nia laran susar, ami husu atu perdua nia ho laran luak.” Nia husu.

Tuir Cidália, loron 40 sai oportunidade ida atu lembra katak valor ema ida la’ós deit haree husi tinan ne’ebé nia moris, maibé mos husi valores, servisu, amizade no memória ne’ebé nia husik ba ema seluk.

“Ami harohan atu legadu, memória, valores no servisu husi ami nia saudoso Francisco Guterres ‘Lu-Olo’ kontinua moris iha família, iha nia maluk sira, iha jerasaun foun, iha povu no iha memória Timor-Leste nian.”

“Loron 40 ida-ne’e la’ós loron ida atu haluha, maibé loron ida atu entrega. Ho laran triste, maibé ho fiar no esperansa, ami entrega ami nia saudoso Francisco Guterres ‘Lu-Olo’ ba Maromak nia liman,” Cidália Nobre hateten.

Partispa iha serimónia misa agradesimentu no kari ai-funan maka Eis Primeiru-Ministru Mari Alkatiri, Vise Primeiru Ministru Mariano Assanami Sabino, Tenente Jeneral F-FDTL Falur Rate Laek, Sekretariu Estadu Asuntu Veteranus, kuadrus Partidu FRETILIN no populasaun sira.