MLPM Sei Fo Pensaun Funu Ba Eleitor 1999, Kria Industria Latarias No Hasa’e Saláriu Mínimu

SAPNewsTL,Dili: Prezidente Partidu Movimentu Libertasaun Povu Maubere (MLPM) Reis Cadalac hateten MLPM sei kumpri nia kumprimisiu wainhira povu fo fiar iha eleisaun parlamentar ne’ebe sei mai hodi liu bareira sei halo mudansa ba governu Timor Leste no hametin  estrututa rejional no postu sira hodi hakbesik ba povu no halo mudansa ba povu nia moris,

“MLPM sei kumpri nia komprimisiu ba povu sira hodi fo votus konfiansa ba Partidu MLPM iha 21/05/2023 hodi bele haka’at liu bareira 4% hodi lori mudansa ba estrutura Governu iha Timor Leste hodi hametin liu tan estrutura rejional no postu administrativu sira hodi lori ukun no osan ba besik povu hodi halo mudansa ba povu nia mois no mehi”. Dehan Prezidente Partidu Movimentu Libertasaun Povu Maubere (MLPM) Reis Cadalac iha Bairopite-Dili,

Reis hatutan karik povu fo konfiansa hodi liu bareira 4% mak sei fo pensaun ba povu sira ne’ebe uluk vota ba independensia Timor Leste, fo mos subsidiu ba vitima sira ba uma sira ne’ebe estragus iha rezistensia hodi sira bele hari’i hikas sira nia uma lulik ida-idak.

“Se liu bareira 4% sei fo pensaun funu ba povu tomak ne’ebe vota hodi hakotu indepedensia ba Timor-Leste iha Loron 30/08/1999, fo pensaun mos ba vitima funu nian ba Timoroan hotu ne’ebe seidauk hetan sira nia direitu, fo subsidiu ba étniku hotu-hotu atu hari’i hikas fali sira nia uma lulik ne’ebe hetan estragus iha tempu rezistensia nia laran fo insentivu ba liurai sira atu asegura ukun iha RDTL no kada tinan sei fo subsidiu 25 mil ba etniku ida-idak”. Nia akresenta

Prezidente partidu ne’e akresenta interese bo’ot ne’ebe MLPM iha mak hakarak lori povu maubere husi moris ki’ak, mukit no sofrementu oin-oin iha rai ida ne’e, nia promete sei hasa’e salariu minimu ba funsionariu no loke kampu traballu ba joven sira.

“Partidu MLPM mos promete hasa’e salariu minimu ba funsionariu sira ba F-FDTL ba Polisia, hasa’e salariu minimu no traballador sira kontinua subvensaun ba relijiozu sira no hasa’e folin kafe, loke fabrika latarias no loke kampu traballu ba joven sira ne’ebe agora abandona”. Nia sublina

Entretantu, Nia fundamenta, Partidu Movimentu Libertasaun Povu Maubere (MLPM) garante sei hetan vitoria iha eleisaun parlamentar 2023 hodi lori moris di’ak ba povu no povu sira asesu ba infraestrutura.
“Liu husi kampana ida ne’e partidu hotu-hotu sei ko’alia konaba sira nia programa hakarak povu sira tenki iha moris di’ak hodi hetan asesu saude,infraestrutura seluk tan ne’ebe povu sira persiza, ho ida ne’e partidu MLPM fiar katak sei hetan vitoria iha eleisaun parlamentar tinan 2023”. Nia hakotu

Jornalista : Ferderita Miranda