Prevene Misinformasaun ! MS & UNICEF Realiza Treinamentu Ba Pessoal Saúde
SAPNewsTL, Dili-Ministériu Saúde (MS), no Instituto Nasional Saúde Públika servisu hamutuk ho United Nations Children’s Fund (UNICEF), organiza treinamentu da-huluk kona-ba reforsa kapasidade atu responde ba misinformasaun iha Timor-Leste.
Tuir Diretór Jeral Saúde Ferderico Bosco hateten, Treinamentu refere ho objetivu oinsa atu halo kapasitasaun ba pessoal saúde sira iha nivel nasional
“Objetivu husi treinamentu ne’e atu hasa’e kapasidade pessoal saúde sira nian iha nivel nasional, liu-liu iha servisu sentral iha Instituto Nasional Saúde Públika. Husi treinamentu ne’e atu hasa’e kapasidade Profisionál oinsa atu mellora di’ak liu hodi resposta hasoru misinformasaun sira,”
“Tanba dala ruma diriji sala ba Komunidade sira nia komportamemtu iha saúde nian. Husi kazu ida ne’e koalia kona-ba misinformasaun no deziniformasaun hanesan Momentu Covid-19, hasoru impodemia. Husi situasaun ida ne’e atu prepara di’ak liu tan, Profisionais.” Dehan Diretór Jerál Frederico Bosco iha Aula Orchid, Timor Plaza,09/10/2023
Nia hatutan, iha treinamentu ne’e husi parte saúde sira mak hanesan, servisu sentral husi Ministériu Saúde (MS), Promosaun edukasaun Saúde, Diresaun Nasional materna infatil, Media Komunikasaun, Protokolu, nomós Instituto Nasional Saúde Públika.
Reprezentante UNICEF iha Timor Leste Ainhoa Jaureguibeitia kongratula Governu Timor-Leste tanba liuhusi lideransa Ministeriu Saúde nian, no Institutu Nasional Saúde Públika hodi organiza treinamentu dahuluk kona-ba reforsu kapasidade Ministériu Saúde kona-ba Desinformasaun iha Timor-Leste.
Bainhira COVID-19 deklara nu’udar pandemia globál iha fulan Marsu 2020, Governu sira iha mundu tomak servisu hamutuk ho parte interesada sira inklui Ajensia Nasoins Unidas no Organizasaun Sosiedade Sivil sira, hodi buka solusoins atu bele kontrola krize ne’e ho susesu.
Iha tempu ne’ebá, iha mós medida importante oioin atu hapara virus ne’e no atu salva ema sira ne’ebé moras ne’e nia moris, maibé mundu hasoru problema oioin – mak Infodemia.
Organizasaun Mundial Saúde esplika Infodemia ida tan informasaun barak liu mak sirkula durante surtu moras ida mosu, inklui informasaun falsu ka la loos iha ambiente dijitál no fíziku.
“Susar tebes, plataforma balun ne’ebé uza atu asesu ba informasaun hamosu informasaun falsu no avizu ne’ebé dala barak hamosu ta’uk, konfuzaun, no ta’uk iha ema nia leet. Aleinde ne’e, infodemia ida bele rezulta hahalok-aat no risku entre ema”. Hatete Reprezentante UNICEF Timor-Leste Ainhoa Jaureguibeitia
Iha Timor-Leste, ta’uk ne’ebé kria husi informasaun ne’ebé la loos ka desinformasaun, kontribui maka’as ba númeru tun kona-ba ema ne’ebé asesu ba servisu saúde esensiál sira hanesan servisu saúde inan no labarik, servisu imunizasaun, servisu planeamentu familiár no tratamentu ba malnutrisaun.
Lukru iha saúde inan no oan bele troka se ema la simu informasaun ne’ebé loos, ne’ebé sei fó konfiansa ba sira atu kontinua hahalok buka saúde pozitivu maske durante tempu pandemia. Ba razaun ne’e mak nasaun barak hari’i ona kapasidade jestaun infodemia durante pandemia COVID-19, ne’ebé ohin loron uja hodi monitoriza no rezolve impaktu at husi infodemia relasiona ho surtu seluk.
Timor-Leste iha inisiativa globál atu rezolve informasaun ne’ebé la loos. Inisiativa ne’e introdús iha tinan 2022, ho apoiu husi UNICEF iha kolaborasaun ho Projetu Diak Publiku (PGP) uja plataforma Observatoriu ba Ezijensia ba Vasina (VDO). Inisiativa ida-ne’e rezulta estabelesimentu Grupu Traballu Jestaun iha Ministeriu Saude.
UNICEF sente orgullu atu apoia formasaun ne’e iha Timor-Leste hodi kapasita Ministériu Saúde iha nivel nasionál no sub-nasional. UNICEF sei suporta treinamentu ba Ofisial Saúde Públika Munisipal husi ekipa Promosaun Saude, jestor sira husi programa imunizasaun, no pontu fokál sira husi hospital munisipal no sentru saúde komunitária sira.
“Ami halo estimasaun katak ema liu 150 sei hetan benefísiu husi treinamentu ne’e iha nasaun laran tomak, husi trienamentu ida-ne’e, ami espera katak Ministeriu Saúde sei bele ofisialmente lansa ba Grupu Traballo Desinformasaun atu nune’e sira sei serbisu sistematikamente no lalais atu responde ba desinformasaun ka informasaun la loos, iha komunidade nia let, no fó impaktu ba ema nia desizaun sira atu asumi servisu saúde.”Nia informa
Iha treinamentu semana ida ne’e, fasillita husi Ministériu Saúde (MS), Instituto Nasional Saúde Públika servisu hamutuk ho United Nations Children’s Fund (UNICEF), suporta mós husi United States Agency For Internasional Development (USAID), Departement of the Foreign Affairs and Trade (DFAT), hodi fó apoiu ba iha Prosesu kapasitasaun ida ne’e.
Jornalista : Ermelinda Soares