Rai Lakan Tarutu ! Hamate Joven Mane Ida Iha Lautém
SAPNewsTL, Lautém : Relasiona ho udan boot ne’ebe akontese durante oras 2 iha Postu Administrativu Luro, Munisipiu Lautém. Derepente mosu rai-lakan tarutu hodi hamate sidadaun mane ida ho naran Aleixo Oliveira iha Aldeia Boanonar Suku Kotamutu.
Tuir informasaun ne’ebe SAP News TL asesu liu husi intervista ho Alvina dos Santos haktuir, Sidadaun Aleixo ba halo natar mak mosu udan udan boot, nune’e teki-teki derepente rai lakan tarutu hodi hamate Aleixo Oliveira iha oras 3:00 loraik (Luro, 24/12/2023).
“Matebean Aleixo Oliveira loraik maiz ou menuz tuku 03:00 halo natar iha natar fatin, hafoin mosu udan boot, derepente rai-lakan tarutu derepente, rai-lakan ne’e tarutu ho lian makaas tebes inklui anin huu makaas, ikus mai hamate Aleixo ho kondisaun laiha kedas iis”. Tenik Sidadaun Alvina dos Santos ba SAPNewsTL iha Luro, 24/12/2023
Alvina hatutan, hafoin situasaun moruk ne’e mosu familia to’o iha fatin ho hanoin atu salva maibe infelizmente la konsege tanba Aleixo nia iis laiha ona
“Hafoin situasaun ne’e mosu, familia to’o kedas iha fatin akontesimentu, ho hanoin atu salva maibe infelizmente la konsege salva nia vida tanba grave liu ona”. Nia informa
Enkuantu, tuir planu Matebean Aleixo Oliveira atu tuir sakramentu kaben iha semana ne’e, maibe Maromak nia planu oin seluk, Matebean Aleixo mate husik hela feen hamutuk ho oan na’in tolu iha mundu ne’e.
Daudaun ne’e, Mate isin matebean Aleixo Oliveira iha hela nia rezidensia, Suku Kotamutu, familia sira kontinua ba hala’o nia serimonia fúnebre tuir tradisaun familia nian.
Matebean Aleixo Oliveira moris iha aldeia Boanomar, Suku Cotamuto, Postu Administrativu Luro, Munisipiu Lautem
Jornalista : Luis Pailofo