Rede HASATIL Louva Agrikultor TL, Tinan 20 Osamentu Ba Produsaun Iha Munisipiu Mínimu
Imajen Komunikadu Imprensa Rede HASATIL no Rede Koligasaun Agrikultura
SAPNewsTL, Dili : Rede HASATIL no Koligasaun Agrikultura Selebra Loron Mundial ba Ai-Han iha Timor-Leste, Rede HASATIL louva agrikultór no parte sira ne’ebé servisu maka’as hodi garantia ema hotu iha Timor-Leste hetan asesu ba ai-han nutritivu ne’ebé adekuadu ba sira nia moris loro-loron.
Tuir Rede HASATIL Gil Horasio Boavida Hateten Populasaun barak mak labele konsumu ai-han ho nutrisaun nato’on , Tuir dadus ofisiál sira, 36% husi populasaun sei hasoru problema inseguransa ai-han króniku, 47% labarik ho idade menus husi tinan lima mak sofre ra’es badak no 8% mak sofre isin krekas, no populasaun 46% sofre falta nutrisaun.
“Falta kuantidade no kualidade nutritivu produtu ai-han ne’ebé konsumu lori impaktu negativu, governu ho ajénsia dezenvolvimentu durante tinan 20 resin hodi hadi’ak situasaun ai-han ho nutrisaun husi produsaun, agrikultura, hasa’e komunidade sira nia rendimentu, no produtu.”Dehan ba Jornalista sira iha Sexta Feira (14/10/22).
Entretantu, Gil husu Governu, Sosiedade Sivil, Parseiru Dezenvolvimentu, Grupu joven produtivu, feto no ema ho defisiensia servisu hamutuk hodi garantia Soberania Ai-han no Soberania ekonomia, nune’e Timor oan bele konsumu ai-han lokal ne’ebé fresku ho nutrisaun di’ak.
Iha fatin hanesan, Deviana Viegas Sarmento deklara HASATIL ho Rede Koligasaun Agrikultura Timor-Leste rekomenda ba Governu kria ambiente ne’ebé favoravel ba produsaun, distribuisaun no konsumu ai-han ne’ebé nutritivu
“Hametin servisu agrikultura iha munisipiu ho kapasidade no fasilidade nato’on hodi responde ba problema ne’ebe agrikultór no produtór ai-han sira hasoru iha baze, liga ba produsaun ai-han , orsamentu estadu ba setór agrikultura gasta barak iha servisu administrasaun iha Dili duke atividade produsaun iha munisipiu .” Dehan Deviana
Enkuantu, nia mos husu ba Governu hodi hadi’ak estrada rural no estrada sira ne’ebé liga munisipiu sira, tanba estrada rural ne’ebé diak liu sei dinamiza liu tan ekonomia iha munisipiu.
Jornalista : Antonio Tilman
Editor : Ekipa Editorial