Regista EhD Hamutuk 93.000 ! Xanana Konsidera EhD Merese Hetan Respeitu Aas
SAPNewsTL, Dili : Primeiru-Ministru Kay Rala Xanana Gusmão ofisialmente hala’o abertura ba Loron Mundiál Ema ho Defisiénsia (EhD) ho tema: Unidu iha Asaun hodi Salva no Alkansa Objetivu Dezenvolvimentu Sustentavel (ODS) ba Ema ho Defisiénsia.
Xefi Governu Kayrala Xanana Gusmão hatete, tuir dadus ne’ebé MSSI fó sai katak ema ho difisiénsia hamutuk rihun 93 maka iha Timor-Leste, tanba ne’e nia parte husu ema hotu hodi respeitu no proteje sira ho dignu ba futuru.
“Ema ho difisiénsia hamutuk rihun 27 maka iha Timor-Leste, ema ho difisiénsia atu la’o labele, labele haree mós, la rona mós, sira ema umana no merese hetan respeitu aas hosi família uma laran no sosiedade”. Tenik Primeiru Ministru Kayrala Xananna Gusmão durante partisipa iha selebrasaun loron Mundial ba EhD iha Centro Convenção de Dili, 01/12/2023
Iha fatin hanesan, Ministra Solidariedade Sosial no Inkluzaun (MSSI) Verónica das Dores fo agradese tebes tanba bele halibur ema hotu no akompaña ona maluk defisiente sira nia viajen hosi munisípiu hotu no RAEOA bele mai to’o Díli ho di’ak.
“Selebrasaun Loron Mundiál Ema ho Defisiénsia (EhD) ne’ebé sei monu iha dia 3 Dezembru 2023, MSSI ho Asosiasaun Defisiéntes Timor-Leste (ADTL) organiza atividade oioin durante loron tolu iha CCD (hahú dia 1-3 Dezembru) ne’ebé konvida no mobiliza reprezentante Ema ho Defisiénsia husi Munisípiu 12 no mós Rejiaun Administrativu Espesiál Oecusse Ambeno (RAEOA) hodi partisipa iha selebrasaun ne’e, Agradese tebes ba imi hotu”. MSSI Verónica das Dores sublinha
Guvernu mos kongratula ema ho defisiensia hotu iha territóriu nasionál ne’ebe selebra loron mundial ba EhD, nia husu atu ema hotu bele servisu hamutuk hodi trasmite sosiedade inkluzivu, prósperu, reziliente, sustentável no asesivél ba ema hotu
“Parabéns ba loron Mundiál Ema ho Defisiénsia, liuliu iha Timor-Leste. Mai, ita serbí hamutuk hodi alkansa mehi boot ba futuru mak sosiedade Timor – Leste ida-ne’ebé Inkluzivu, prósperu, reziliente, sustentável no asesível”. Ministra afirma
Diretor Ezekutivo ADTL Cezario da Silva haktuir ema ho Difisiensia iha Timor Leste tuir sensu 2022 hamutuk 93 mill ho ema Difisiensia iha Timor Leste, tan ne’e presiza asegura dezenvolvimentu ne’ebe inkluzivu ba ema hotu
“Asuntu Difisiensia issue ida ne’ebe uza setoral ami nia hanoin laos deit iha komunikasaun ida ne’e maibe ami hakarak ba setor hotu atu atu asegura setor dezenvolvimentu ida ne’ebe inkluzivu lolos”. Hateten Cezario da Silva
Ezekutivu EhD ne’e husu entidade hotu hodi fo atensaun sériu ba kondisaun ema ho defisiente sira honpolitika ne’ebe bele hari’i sosiedade inkluzivu, prósperu, reziliente, sustentável no asesivél ba ema hotu tanba konsidera seidauk to’o, nune’e presiza hadia ninia implementasaun sira ba futuru
Hafoin halo abertura m, iha biban refere Xefe Guvernu mos akompaña husi MSSI, Ministra Edukasaun, Parseiru sira no partisipante sira vizita fatin expozisaun sira no sosa mós sasan balun ne’ebe prodús husi ema ho difisiensia sira.
Partisipa iha selebrasaun Loron Mundiál Ema ho Defisiénsia (EhD) ne’ebé monu iha dia 3 Dezembru 2023, MSSI ho Asosiasaun Defisiéntes Timor-Leste (ADTL) organiza atividade oioin durante loron tolu iha CCD (hahú dia 1-3 Dezembru) ne’ebé konvida no organiza reprezentante Ema ho Defisiénsia husi Munisípiu 12 no mós Rejiaun Administrativu Espesiál Oecusse Ambeno (RAEOA).
Jornalista : Ermelinda Soares & Dircia Baptista Belo