Reitor UNTL Apresia Fakuldade Engenharia Sai Ezemplu Diak

SAPNewsTL, Dili : Hafoin Partisipa iha Serimónia lansamentu Timorese Academic Journal Science and Technology (TAJST), Reitor UNTL João Soares Martins konsidera Fakuldade Engenharia sai ezemplu ba Fakuldade sira seluk iha UNTL

Magnifiku Reitor UNTL saran lia hirak ne’e, durante Partisipa iha Serimónia lansamentu Timorese Academic Journal Science and Technology (TAJST), Iha Fakuldade Engenharia Ciensia no Teknolojia, Universidade Nasionàl Timor Lorosa’e (UNTL) iha Auditorium Hera, 12/10/2023

Reitor UNTL João Soares Martins apresia no kongratula Fakuldade Engenharia Ciensia no Teknolojia tanba bele halo peskija, hakerek no produz Jornal Akadémika kada tinan, tinan ne’e produz ona to’o volume VI, ne’e sai ezemplu ba Fakuldade sira seluk

“Ha’u nia apresiasaun no kongratula ba Fakuldade Engenharia Ciensia no Teknolojia, hamutuk ho komisaun organizador ne’ebe bele produz Jornal Akadémika ba volume VI, Fakuldade Engenharia sai ezemplu ba Fakuldade sira seluk iha UNTL.” Tenik Magnífiku Reitor UNTL João Soares Martins liu husi nia diskursu abertura iha Auditorium Fakuldade Engenharia Hera, 12/10/2023

Reitor UNTL ne’e hatutan, peskija refere importante tebes presiza kontinua ba oin, involve mos estudante sira para bele kaderniza sira iha prosesu peskija, hakerek no produz

“Peskija ne’e di’ak teb-tebes, presiza kontinua ba oin, se bele involve mos estudante sira hodi kaderniza sira ba futuru”. Reitor UNTL João Soares Martins hateten

Iha fatin hanesan, Presidente Komisaun Organizadora ba Semináriu Nasionàl ne’e haktuir, Fakuldade Engenharia Ciensia no Teknolojia UNTL realiza semináriu ne’e kada tinan, iha ne’ebé tinan ne’e halo ba dala VI tanba hetan apoia husi JICA

“Fakuldade Engenharia Ciensia no Teknolojia UNTL kada tinan realiza semináriu ne’e hodi apresenta rezultadu peskija tanba hetan suporta makaas husi JICA Timor Leste, ita produz ona to’o iha volume VI”. Informa Presidente Komisaun Organizadora Domingos de Sousa

Enkuantu, Semináriu Nasional ne’e Reitor UNTL lansa ofisial Timorese Academic Journal Science and Technology ba volume VI refere no entrega ofisialmente ba JICA, Reprezentante Ministériu Edukasaun Ensinu Superior Siénsia no Kultura, Reprezentante Reitor UNITAL, Presidente EDTL, ANAAS,I.P, inklui konvidadu sira seluk

Semináriu Nasionàl refere realiza hodi selebra mos existênsia UNTL ba dala XXIII ne’ebe sei Selebra iha loron 17 Fulan tinan ne’e, Semináriu ne’e la’o durante loron 2 (12-13/10/2023), semináriu ne’e hetan partisipasaun maksimu husi Estudante UNTL inklui konvidadu sira husi Instituisaun Estadu nian

 

Fo hanoin mos katak, Fakuldade Engenharia Ciensia no Teknolojia mos dizitaliza ona sira nia sistema ne’ebe hanaran SIA (Sytem Information Administration), sistema ne’e uza ba registu semestral, tau valor estudante, tau ba planifikasaun estudante no asegura estudante sira nia Dasia.

 

Sistema SIA ne’e mos UNTL hahu introduz no expanda ona ba Fakuldade 8 seluk iha UNTL, Daudaun ne’e mos Ministériu Edukasaun Ensinu Superior Siénsia no Kultura mak uza ona sistema ne’e hodi aktualiza dadus sira Guvernu nian

Jornalista: Marcela Mery da Costa