Reitor UNTL Husu Estandariza Lian Tetun Ba Jerasaun Foun Sira

Imajem : Magnifiku Reitor Universidade Nasional Timor Lorosa’e (MR-UNTL) Professor, Dr. João Soares Martins iha Kampus FEAH Liseu, Dili, 15/04/2024.

SAPNews TL, Dili: Magnifiku Reitor Universidade Nasional Timor Lorosa’e (MR-UNTL) Professor, Dr. João Soares Martins parabeniza INL no Departamentu Dalen Tetun ne’ebe selebra aniversáriu ho semináriu nasionál.

Serimónia ne’e realiza hodi selebra aniversariu Instituto Nacional de Linguistica (INL) nian ba dala-XX no Departamentu Dalen Tetun nian ba dala-X.

Magnifiku Reitor UNTL fó Parabéns ba INL ne’ebé halo aniversariu ba dala-20 no hetan dekretu lei iha tinan 2004, no mos ba Departamentu Língua Tetun ne’ebé halo aniversariu ba dala-10.

“Agradese tanba Instituto Nacional de Linguistica (INL) bele dezafia Fakuldade hodi, produz Departamentu Língua Tetun, ne’e hanesan ejizensia ida atu bele sustenta Língua Tetun ba oin, entaun laos apenas peskijador deit, maibe ita mos tenke hanoin oinsa bele fó formasaun ba futuru gerasaun tuir mai”.

“Departamentu Língua língua Tetun ne’e importante no esensial tebes atu bele kontribui hodi bele forma tan ita nia linguistiku atu sira bele servisu barak liu no konsentra iha INL no ba nasaun tomak, dala ita tan parabéns ba INL no departamentu língua Tetun”. Tenik Magnifiku Reitor Universidade Nasional Timor Lorosa’e (UNTL) ba Jornalista sira iha kampus liseu, 15/04/2024.

Magnifiku Reitor João Soares Martins hateten, Língua Tetun importante tebes hanesan identidade nasaun nian ne’ebé hatur mos iha Konstituisaun Republika Demokratika de Timor Leste (RDTL) hanesan língua oficial Timor, Tetun no Portugés.

Nia hatutan, entaun responsabilidade dever konstitusional, dever moral no dever ba ema ida-idak atu bele dezenvolve língua Tetun ba jerasaun foun sira labele lakon identidade Timor nian, oinsa bele estandariza entre INL, DIT no Igreja Katólika nian.

“Orgullu tanba ita nia nasaun opta bilíngual, Tetun no Portugés, labele hakfodak tanba laos Timor-Leste deit maka iha língua rua, maibe iha país barak ne’ebé multi lingual, purezemplu iha Suiça iha língua tolu ka haat, iha Belgica iha língua haat, iha Singapora língua haat, no sei iha tan nasaun sira seluk”.

“Entaun ne’e laos Timor deit mak opta língua rua, ho nunee ita tenke orgullu no agradese ba nai ulun sira liuliu ita nia asembleia konstituente ne’ebe hakerek konstituisaun da republika hatur kedas língua Tetun no língua Portugés nu’udar língua ofisial Timor-Leste nian, oinsa bele estandariza entre INL, DIT no Igreja Katólika nian”. Nia husu

Lider UNTL ne’e akresenta dever atu dezenvolve língua rua ne’e responsabilidade sidadaun hotu nian, knar INL laos deit dezenvolve língua Tetun maibe língua nasionais ne’ebe maka iha Timor laran tomak hahu hosi Fataluku, Naueti, Makasae, Mambae, Kemak, Bunak, Galolen no seluk tan.

“Ita orgullu tanba rai ida kikoan, ita bele iha ema barak ne’ebe koalia lian barak, aumenta diversidade etnolinguistika Timor nian. Maibe nu’udar nasaun ida ita mos tenke dezenvolve língua ne’ebe sai hanesan padraun nasional hanoin ida ne’e maka papel INL nian”.

Reitor UNTL ne’e sente orgullu tanba UNTL bele simu knaar atu bele hamahon INL iha knua UNTL.

“Sente orgullu no diak teb-tebes, ne’e sai hanesan onra ida katak nasaun fó responsabilidade ida ba UNTL atraves hosi INL atu dezenvolve língua tetun no lian lokal sira ba futuru”.Nia dehan.

Reitor UNTL mos husu atu INL bele iha estatutu rasik ne’ebe bele transforma husi Diretor Nasional ba Diretor Jeral ne’ebe haree luan liu tan, oinsa bele dezenvolve lian iha Timor-Leste.

Jornalista : Conzita Mota & Marciana da Conceição