KHUNTO Deklara Tenki Tau Aas Interese Povu & Nasaun
SAPNewsTL, Dili- Presidente Partidu Kmanek Haburas Unidade Nasional Timor oan (KHUNTO) Armanda Berta iha kongresu nasional Partidu nian deklara katak tenki tau aas interese povu no Nasaun Nian.
Presidente Partidu KHUNTO Amanda Berta hatete kongresu Partidu KHUNTO maka atu diskute programa no hili fali Líder Partidu ne’ebé representa duni povu.
“Partidu KHUNTO nu’udar forsa Polítika iha Nasaun Ida ne’e, ohin loron ita iha ne’e hodi diskute programa no eleje fali Partidu Nia Líder ne’ebé onestu hodi sai Matan no tilun ba povu”. dehan Armanda Berta iha diskursu Sábadu 20/04/2024, Salaun Delta Nova Comoro Dili.
Berta mós espera katak militantes no kuadru sira sei diskute klean problema povu no nasaun nian.
“Ha’u nia esperansa mak kuadru sira sei diskute makaas ba problema ne’ebé povu enfrenta hanesan saude, edukasaun, servisu sosial, halakon malnutrisaun, infraestrutura, ambiente, agricultura, turismu no haforsa mós instituisaun sira hotu, hametin relasaun ho país hotu iha mundu” dehan Berta.
Presidente Partidu ne’e sublina katak diak liu maka tau interese komum povu no nasaun ne’e nian maske iha krítika barak.
“Diak liu maka ita tau interese komum ba povu no ba nasaun nia diak, maske simu trata, nega no julga maibé kritiku ne’ebé positivu, ita simu maibé negativu ita husik ba”. sublina Presidente Partidu KHUNTO.
Nia enkoraja mos Líder Partidu no kongresista sira hotu atu la bele lakon vontade hodi luta ba vitoria partidu nian.
“Maske ho dezafiu no obstakulu ne’ebé barak hanesan anin boot, mota boot no laloran ne’ebé boot maibé nunka hamihis ita hotu nia vontade hodi luta ba vitoria Partidu no Vitoria povu nian” Tenik Nia.
Nia mós aproveita oportunidade hodi agradese ba konfiansa povu nian ho votu 65.289 Iha tinan 2022.
“Iha Timor laran tomak ne’ebé fo konfiansa hodi fo votus ba ha’u Iha tinan 2022, agradese ba votus konfiansa povu nian ba ha’u-nia kandidatura hamutuk 56.289” Nia agradese.
Iha fatin hanesan Líder Supremu Partidu KHUNTO José dos Santos Naimori Bucar mos afirma katak polítiku laos deit koalia iha palku leten.
“Iha politika ne’e, ita hakarak koalia deit iha palku maibé palku okos ita la halo ne’e la’os Polítiku” afirma Nia.
Naimori husu atu servisu hamutuk ho diplomátika sira hanesan Australia no Amerika.
“Ba diplomátika polítiku sira hot-hotu husi Rai Liur no Rai laran, hanesan mos ita-nia embasador husi America, husi Australia ne’ebé mak nain rua iha ne’e, Ami Partidu KHUNTO hakarak halo parseira diak ida ho ita-boot sira liu husi ami-nia politika ida.” Dehan Naimori.
Líder Supremu ne’e mós hatutan tan katak luta hodi hari’i Partidu tanba atu halo desenvolvimentu nasaun nian.
“Ita luta halo Partidu tanba atu halo desenvolvimentu Laos ba Partidu A Ka Partidu B Iha politika ne’e, ita tenki pasensia, rona malu tanba atu hametin dame, partidu, povu no nasaun ne’e sei la nakdoko” Nia hatutan.
Naimori mos rekuñese katak desenvolvimentu nasaun tenki garante unidade nasional uluk.
“Unidade Nasional mak bele Lori desenvolvimentu, se lae governu ida sa’e sobu, ida sa’e tan sobu tan to’o lakon hotu ita-nia osan” Naimori rekuñese.
Kongresu Partidu Kmanek Haburas Unidade Nasional Timor oan (KHUNTO) realiza kongresu dahuluk iha 2011, daruak iha 2015, datoluk iha 2020 no 2024 mak realiza ona ba dahaat nian.
Kongresu nasional ba dahaat ne’e partisipa husi Presidente da Repúblika Jose Ramos Horta, Embaixador nain rua, representante Partidu Demokrátiku, Presidente CNE Agustinho Belo inklui kuadru sira Partidu KHUNTO nian husi 14 munisipiu inklui RAEOA.
Journalista: Estanislau Moreira