RENETIL Realiza Kongresu Ba Dala VIII, Saky Konsidera Timor Leste Seida’uk Metin

Imajen Kongressu Nasional Resistensia Nasional Estudante Timor Leste (RENETIL) ba dala VIII

SAPNewsTL, Dili – Iha Kongressu Nasional Resistensia Nasional Estudante Timor Leste (RENETIL) ba dala VIII ne’ebe realiza iha Sentru Konvensaun Dili ho tema “Hametin RENETIL kontribui ba Hametin Estadu”, Presidente Konsellu Sentral Resistensia Nasional do Estudante de Timor leste (RENETIL) Carlos da Silva Lopes Saky haktuir buat barak seidauk la’o diak tanba ne’e sira hili tema refere hodi tulun no hametin estadu ida ne’e

“Ami hili tema “Hametin RENETIL Kontribui Ba Hametin Estadu”, tanba ita nia rai buat barak mak seidauk la’o diak, instituisaun governu sira seidauk metin didiak tanba ne’e hanesan organizasaun apartidade ida oinsa mak ami atu tulun no hametin estadu ida ne’e, Renetil liu husi partidu politiku sira ne’ebe mak ami nia membru espalha ba, nune’e mos hanesan organizasaun ami sempre halo intervensaun ba publiku, halo komunikasaun kontaktu ho Presidente da Republika, Primeiru Ministru, Presidente Parlamentu, para ami hato’o prekupasaun Sira ne’ebe mak ita nia povu hasoru hodi rezolve problema nune’e bele hametin estadu.” Dehan Presidente Konsellu Sentral RENETIL iha nia diskursu, iha CCD Kaikoli Sexta(02/12/2022)

Imajen intervista Presidente Konsellu Sentral RENETIL Carlos da Silva Lopes Saky

Presidente ne’e akrsenta maske partidu politiku barak ho ideia la hanesan maibe banhira partidu politiku sira tau hanoin hamutuk bele desenvolve povu nia moris
“Ita iha partidu politiku sira barak lahalimar, tan ne’e mak ha’u husu nafatin ba sira tau hanoin hamutuk para hodi resolve ita nia Problema ne’ebe ita nia povu hasoru, maibe ida-idak dada tuir fali ninia interese lolos ne’e ita partidu barak laiha buat ida, tanba ita nia sosiedade susar tebes, maibe ita bele buka konsensu no intende, ita nia hanoin lahanesan, hanoin sira ita tau hamutuk para ita bele hodi rai ne’e ba oin”. Tenik nia

Iha fatin hanesan Presidente Parlamentu Nasional (PPN) Aniceto Guterres konsidera tematiku ne’ebe Renetil foti ne’e provoka ema hotu tanba bele nakloke katak Renetil sei metin nafatin hanesan uluk to’o agora ka lae ? Republika metin ona nu’udar estadu iha aspeitu ekonomiku, sosial hodi hametin estadu ne’e ka lae ? saida mak renetil sei halo  no oinsa hametin estadu de direitu demokratiku

“Oinsa hametin estadu de direitu demokratiku, Ha’u Militante Renetil, kunhese diak no hetan experiensia barak husi Renetil, ho experiensia ida ne’e lori ha’u to’o mai asume kargu politika sira hotu to’o ohin loron. Ha’u apela ba kuadrus no membrus Renetil sira hotu atu hatudu sensibilidade tomak hodi hasoru dejafiu sira ne’ebe estadu hasoru, Renetil presiza halo politika ho kualidade patriotiku liu tan, wainhira halo desizaun politika, oinsa hodi hametin Timor Leste nu’udar estadu direitu no demokratiku”. haktuir PPN Aniceto Guterres iha nia Diskursu, Iha CCD, 02/12/2022

Entretantu, Presidenti Konsellu Kombate Libertasaun Nasional (CCNL) Vidal De Jesus Riak Leman,konsidera RENETIL hanesan organizasaun resistensia ne’ebe hola parte iha historia luta Timor- Leste nian.
“Ha’u husu ba Membru RENETIL tomak nafatin asegura Organizasaun ida ne’e no resistensia sira seluk, tanba uluk iha tempu funu hamutuk luta ba ukun aan to’o ona tempo atu hamutuk luta ba povu nia moris, esperansa ba kongresu RENETIL nian mak ida ne’e, kongresu hotu halibur malu unidade tenki Metin, hotu-hotu hamutuk ho konsellu kontribui ba paz, estabilidade no dezenvolvimentu iha ita nia rai Timor-Leste”. Dehan Riak Leman iha nia Diskursu

Iha serimonia abertura kongresu renetil ba dala VIII refere partisipa husi Presidente Parlamentu Nasional Aniceto Guterres, Tenente Jeneral Falur Rate Laek, Sekretariu Geral Fretilin Mari Alkatiri, Presidente Konsellu Kombate Libertasaun Nasional (CCNL) Vidal De Jesus Riak Leman, kuadrus no membru sira RENETIL nian

Enkuantu, Iha Kongresu Refere RENETIL Produz ninia planu estratejia ba tinan lima inklui hili lideransa ba mandatu durante tinan liman mai (2022-2027), Iha ne’ebe Joaquim Fonseca Russuo re-eleitu ba Sekretariu Geral RENETIL, Metodio Caetano Moniz Lalatak Sai Vise I Sekretariu Jeral no Glenda Carvalho Ina Mori sai Vise II Sekretariu Jeral, hafoin liu husi eleisaun ne’ebe livre, demokratiku no sekreto husi pakote A, B, no C, Iha ne’ebe Pakote A hetan votus 121, Pokote B hetan Votus 199 no Pakote C hetan votus 72. nune’e pakote manan sai vensedor hodi lidera ba peridu ida mai

Jornalista : Ermelinda Soares & Anina Gama

Editor        : Ekipa Editorial