RL Orienta Halo Estrada, Ponte, Monta Rede Starlink, Postu Saúde, UPF & Eskola
Imagem : Presidente Autoridade RAEOA Rogério Tiago Lobato iha Naktuka, Bene-Ufe, 16/04/2025
SAPNewsTL, RAEOA : Durante diálogu ho komunidade Naktuka iha suku Bene-Ufe, Presidente Autoridade RAEOA Rogério Lobato afirma nia parte sei orienta halo normalizasaun ba estrada, halo ponte Noelbesi, apoia solar panel, rede starlink, monta postu saúde, UPF no eskola iha Naktuka.
Presidente Autoridade Rejiaun Administrativa Espesial Oe-Cusse Ambeno (RAEOA) Rogério Lobato deklara nia parte sei halo ponte Noelbesi no normaliza estrada ligasaun Bene-Ufe
“Ohin mai iha ne’e atu observa mota, ponte iha Laleia ne’ebé sei sobu no mota fali iha Noelbesi, iha sábadu liu ba, Maun Boot Primeiru Ministru mak fo ordem atu sobu tanba ponte sei diak”.
“Ita só halo desmantelamentu para lori mai monta iha ne’e, monta iha Naktuka, Pássabe (mota kiik ida atu fasilita asesu saúde) no Maunabe (estrada foun ne’ebé foun ne’ebé foin loke)”. Tenik PA-RAEOA Rogério Lobato iha Naktuka,16/04/2025
Rogério hatutan, Autoridade RAEOA sei prevê osan hodi finansia, wainhira iha ona Build of Quantity (BOQ) no desizaun ikus tanba Primeiru Ministru sei ba haree ponte Noelbesi.
“Karik la to’o, ita sei sosa besi foun hodi monta, ita agora komesa sobu ona ne’ebé bele liu fulan ida, Primeiru Ministru no Ministru Planeamentu Investimentu Estratéjiku (MPIE) sei mai haree, sira konkorda ona, prontu ita bele komesa halo. Ha’u fo oportunidade ba Bene-Ufe oan hodi bele kaer projetu emerjénsia, ita sei halo ateru mós ba estrada”.
Prezidente Autoridade ne’e’ rekunhese komunidade sira iha Bene-Ufe no Naktuka presiza buat barak liliu servisu saúde, agrikultura, administrasaun no infraestrutura.
“Komunidade presiza buat barak hanesan parte saúde, agrikultura no administrasaun tanba ne’e sei resposta iha tempu badak, ita sei monta postu saúde, eskola no Unidade Polísia Fronteira iha Naktuka ho provizóriu, depois ita haree fatin definitivu”.
Lobato informa katak ezekutivu RAEOA mós apoia nesesidade báziku ba komunidade sira iha Naktuka ne’ebé kompostu hosi uma-kain 74 ho total populasaun 338.
“Ohin fo nesesidade báziku ba ferik no katuas sira ne’ebé kbiit laek liu, ita mós sei fo solar panel ba komunidade sira ho lailais no fasilita rede starlink haat ba komunidade sira”. Nia hakotu
Iha fatin hanesan, Administrador Postu Administrativu Nítibe Agostinho Afulit fo agradesimentu ba Presidente Autoridade RAEOA ho ekipa tanba bele to’o iha Bene-Ufe hodi haree kondisaun atual no fo solusaun balun kona-ba problema saúde, edukasaun, infra-estruturas no halo klarifikasaun ba polémika Naktuka.
“Agradese ba Presidente Autoridade RAEOA tanba bele to’o mai iha ami nia fatin hodi rona ami nia preokupasaun no halo klarifikasaun ba problema Naktuka”. Agostinho dehan
Hafoin hala’o dialogu, Prezidente Autoridade ne’e kontinua hala’o observasaun direta ba normalizasaun estrada iha postu administrativu Nítibe to’o Suku Taiboko Postu Pante Macassar.
Durante observasaun, Rogério Lobato afirma nia parte sei orienta hodi nahe semente hodi asegura no garante movimentasaun transporte sira komunidade nian iha area rural.
Jornalista : Ekipa Kobertura