Ronaldo Orgullu & Garante Primeiru Lugar ! Jogu 2, CR7 Seidauk Marka Golu

SAPNewsTL, Dili – Cristiano Ronaldo liu husi nia ID Facebook haktuir orgullu ho nia ekipa no garante katak Portugal sei hetan primeiru lugar iha grupu F, Kopa Euro tinan 2024.

“Apurados e primeiro lugar garantido, Orgulho nesta equipa, somos Portugal (Apuradu no garante primeiru lugar, orgullu ho ekipa ida ne’e, hamutuk ho Portugal)”. Hakerek Cristiano Ronaldo liu husi nia ID Facebook  Cristiano Ronaldo, loron 23/06/2024. SAPNewsTL Screenshot

Iha jogu daruak, Portugal enfrenta Nasaun Turkia ne’e Cristiano Ronaldo (CR7) la konsege marka golu maibe fo asisténdia ba Bruno Fernandes marka golu iha minutu 55.

Resultadu ne’e halo adeptus Portugal iha Timor-Leste ho laran ksolok no gratidaun selebra vitória ne’e ho komboiu hodi halae sidade Dili.

Iha komboiu refere, sidadaun Timor oan sira ho bandeira Portugal no Bandeira Timor-Leste la’o tuir dalan públiku hodi haksolok no haklalak hamutuk.

Iha oportunidade ne’e, adeptu sira dehan, “Viva Portugal, forsa Portugal, vamos Portugal”. Jornalista SAPNews akompanha iha terenu. Dili, 23/06/2024

Portugal konkista vitória hasoru Turkia ho skore 3-0 ohin madrugada, golu 3 ne’ebe Portugal hetan ne’e mai husi golu ida husi Bernardo Silva iha jogu parte dahuluk (minutu 21), OG iha jogu parte dahuluk (minutu 28) no golu ida Bruno Fernandes iha jogu parte daruak (minutu 55).

Entretantu, iha jogu tuir mai Portugal sei hasoru Nasaun Georgia iha loron 26 Junhu, antes ne’e rezultadu jogu entre Turki no Georgia hatudu Turki manan ho skore 3-1, Repúblika Ceko kontra Georgia ho skore 1-1 no portugal manan Repúblika Ceko ho skore 2-1.

Enkuantu, valor provizóriu husi Gropu F iha Kopa Euro maka Portugal hetan Valor 6 (Golu 5), Georgia hetan valor 1 (golu 2), Turkia hetan valor 3 (golu 3) no Repúblika Ceko hetan valo 1 (golu 2).

Jogu Kopa Euro 2024 ne’e abertura iha loron 14 Junhu no Jogu ne’e sei la’o durante fulan ida, tuir oráriu jogu ne’e sei finaliza iha fulan jullu nia klaran.

Jornalista : João Marito