SEFOPE & AROMD Loke Formasaun Ba Kandidatu Kategoria Ingles Very Poor & Poor
Imajem : Reprezentante Diretor Diresaun Nasional Empregu Esterior (SEFOPE, sigla Portugés), Chefe Departamentu Integrasaun Internu Anjela Pires, iha Vila Verde, Sexta (02/08/2024).
SAPNewsTL, Dìli – Assosiasaun Ramelau Oan Moris Domin iha Timor-Leste (AROMD-TL) hala’o abertura kursu lian ingles durante fulan tolu (3), hodi hadia kualidade kandidatu ne’ebé la passa iha vaga online ho valor poor, very poor no sufisiente hamutuk-45.
Reprezentante Diretor Diresaun Nasional Empregu Esterior (SEFOPE, sigla Portugés), Chefe Departamentu Integrasaun Internu Anjela Pires hateten, sira nia parte agradese ba AROMD-TL ne’ebe servisu hamutuk ho SEFOPE hodi prepara joven sira liu husi formasaun kursu lian Inglés hodi hamenus numeru dezempregu iha Timor-Leste.
“Agradese ba AROMD-TL bele prepara joven sira liu husi formasaun no servisu hamutuk ho SEFOPE hodi hamenus númeru dezempregu iha Timor-Leste”. Dehan Chefe departamento integrasaun interno, Anjela Pires ba jornalista sira iha Vila Verde, Sexta (02/08/2024).
Chefe Departamentu Integrasaun Internu Anjela Pires garante formasaun refere bele eleva foinsa’e sira nia abilidade lingua no bele prepara joven sira hodi hatan ba merkadu de traballu iha futuru.
“Ohin mai ho objetivu hodi aprende no investe iha area oin-oin hodi prepara ba futuru no mós kontribui ba familia nia moris diak liu husi formasaun, fiar katak sentru formasaun sira mós prepara kursu ho fasilidade ne’ebe kualidade no forma foinsa’e sira sai forte, matenek no susesu iha futuru liliu bele ko’alia lingua estranjeiru”. Hateten Anjela Pires.
Reprezentante Diretor Diresaun Nasional Empregu Esterior (SEFOPE, sigla Portugés), Chefe Departamentu Integrasaun Internu Anjela Pires
“Ba servisu iha rai liur presija abilidade liuliu lingua, iha Autralia tenke hatene lian Inglés, Korea tenke hatene lian Korea no iha Japaun tenke hatene lian Japaun iha ita nia nasaun ida ne’e”. Nia hatutan.
Iha fatin hanesan, Diretor Jeral Assosiasaun Ramelau Oan Moris Domin iha Timor-Leste (AROMD-TL) Gaspar da Costa Pacheco akresenta, AROMD-TL sira halo parseria hamutuk ho SEFOPE, ho objetivu no estratejia hodi ajuda maluk joven sira no enkoraja nafatin Timor-oan hodi bele ba oin.
“AROMD-TL hamutuk ho SEFOPE mai ho objetivu no estratejia, ajuda malu iha parte hotu-hotu atu nune’e ita Timor bele moris diak, ami kontente tebes servisu hamutuk, bele kolabora hodi prepara ita nia maluk sira ba servisu iha rai liur, oinsa bele enkoraja nafatin Timor oan hodi hakat ba oin ho susesu”. Nia sublinha
Imajem : Reprezentante Diretor Diresaun Nasional Empregu Esterior (SEFOPE, sigla Portugés), Chefe Departamentu Integrasaun Internu Anjela Pires halo abertura ba formasaun lian ingles iha AROMD.
Diretor Jeral ne’e hateten, Timor-Leste Nasaun ne’ebe ki’ik iha rikusoin, povu mak sai hanesan rikusoin ne’ebe sempre aumenta kada tinan, nune’e presiza kolabora no servisu hamutuk hodi kuidadu rikusoin hirak ne’e.
“Timor-Leste nasaun ida ne’ebé ki’ik ba rikusoin, ita povu nu’udar rikusoin ne’ebe sempre aumenta kada tinan no kada loron, presija nafatin ita servisu no kolabora hamutuk atu bele kuidadu ita nia rikusoin hirak ne’e, oinsa bele hakbesik an ba sentru formasaun sira atu kapasita sira, loron ida sira bele hetan diak ba familia sira liu husi aprende siensia no lingua oioin”.
“Ita nia matenek nunka mais forte iha ita nia moris, manan ka lakon ita nia liman sei halo buat tolu (3) konesimentu, atitude no atividade estuda hodi halo mudansa ba ita nia an, AROMD- TL sevisu hamutuk ho SEFOPE tinan hirak liu ba to agora nafatin hamutuk no ita ida deit”. Nia hakotu.
Enkuantu, durasaun kursu lingua inglesh ne’e sei la’o durante fulan tolu nia laran, molok hetan sertifikadu kursu nian. Kursu ne’e realiza tanba AROMD-TL halo kolaborasaun servisu ho SEFOPE.
Jornalista: Dircia Baptista Belo
