SEJD Lamenta FTTL La Fasilita Ana Ba Mexico, Presidente Gabriel Klarifika Ba Públiku

(Sap News TL) Dili-Prezidente Federasaun Taekwondo Timor-Leste (FTTL) Gabriel da Costa hatete, federasaun la konsege lori atleta Ana da Costa partisipa World Taekwondo Championship iha Mexico tanba orsamentu ne’ebe Sekretariu Estadu Juventude Desportu (SEJD) apoiu ho montante 4,000 USD la sufisiente hodi lori atleta to’o Mexico, Enkuantu SEJD  Abrão Saldanha lamenta tanba FTTL la fasilita Atleta ba Mexico

“Orsamentu ho montante 4,000 ne’ebe governu liu husi SEJD  apoiu mai atleta la inklui ofisial no treinador ne’e la sufisiente para lori Ana da Costa partisipa World Taekwondo Championship iha Mexico iha fulan novembru tinan ne’e, tan ne’e federasaun buka dalan hodi buka patrosinador maibe la  hetan entaun Atleta Ana da Costa ho treinador l konsege aranka ba Mexico”, dehan prezidente FTTL Gabriel da Costa ba jornalista sira iha edifisiu FTTL eis Koni Caicoli, Dili kinta (24/11)

Entretantu, Antes ne’e Atleta Ana da Costa partisipa iha Asian Taekwondo Open iha Pakistan hetan medalla osan mean, FTTL konsege hasai osan 10,000 USD ne’ebe mai husi SEJD no komite olimpiku internasional (IOC)  liu husi komite olimpiku nasional Timor-Leste (CONTL sigla portuges) nian ne’ebe kada fulan fo orsamentu ba Ana da Costa ho montante 1500 USD

Prezidente ne’e akresenta, orsamentu ba World Taekwondo Championship iha Mexico ne’e antes fulan ida  komisaun organizador  husu tiha ona FTTL para transfer orsamentu 8,000 USD para ba billete no komisaun prepara akomodasaun no transporte ba atleta ho treinador iha Mexico durante semana rua   maibe orsamentu la sufisiente entaun Ana da Costa ho treinador la konsege partisipa kompetisaun refere, governu sente triste entaun federasaun mos sente triste liu tan maibe eventu World Championship ne’e laos ida ne’e deit tinan oin sei iha ne’ebe karik governu ezizi FTTL prontu nafatin para rebolsu orsamentu 4,000 ba kofre estadu.

Nia informa, Antes ne’e FTTL hatama proposta ba SEJD ba kompetisaun world championship ne’e husu 20,000 maibe ikus SEJD apoiu 4,000 USD.

“Antes ne’e ami hatama proposta ba  SEJD  ami husu 20,000 USD ba atleta Ana da Costa, treinador, ofisial no membru ezekutivu atu ba partisipa World Taekwondo Championship iha Mexico ne’e tanba kompetisaun ne’e mundial nasaun hotu partisipa ne’ebe atleta, treinador no ofisial partisipa kompetisaun ne’e no membru ezekutivu tuir enkontru ba kompetisaun world championship sira tuir mai,  ami tuur hamutuk ho SEJD entaun parte governu aprova deit orsamentu 4,000 USD ba atleta tan orsamentu la sufisiente para atleta partisipa World Championship ne’e”, tenik Gabriel

Gabriel afirma, maski Ana da Costa la konsege partisipa World Taekwondo Championship ne’e maibe sira prepara nafatin atleta ba kompetisaun internasional sira tuir mai liuliu world Taekwondo Championship ne’e tanba bele hetan pontu ruma hodi prepara ba jogu olimpiade iha França tinan 2024.

Iha sorin seluk, antes ne’e tuir Sekretariu Estadu Juventude Desportu (SEJD) Abrão Saldanha haktuir antes ne’e FTTL simu ona osan 4.000.00 USD maibe la lori atleta Ana da Costa partisipa World Taekwondo Championship iha Mexico ne’ebe realiza iha fulan Novembru tinan 2022.

“Ha’u sente triste no lamenta tebes ba FTTL tanba sira husu governu hodi suporta orsamentu ne’ebe ami aprova ona orsamentu 4,000 USD ba FTTL hodi sosa billeti no akomodasau atu nune’e sira lori atleta Ana da Costa ba partisipa World Taekwondo Championship iha Mexico iha fulan Novembru tinan ne’e maibe ikus mai atleta ne’e la konsege partisipa World Taekwondo Championship ne’e”, dehan SEJD Abrão Saldanha ba jornalista sira iha nia knaar fatin Lecidere, Dili kuarta (23/11).

Abrão Informa, tanba sira mai argumenta ne’e oportunidade diak ba atleta Ana da Costa hetan wildcard hodi partisipa olimpiade iha França tinan 2024 tan ne’e atleta ne’e tenki tuir world championship ne’e dala rua ka tolu hodi hetan pontu no atleta ho nia treinador to’o tiha ona nasaun Kazakistan ne’ebe sira hein orsamentu maibe federasaun la transfere entaun sira la konsege ba to’o Mexico hodi partisipa kompetisaun ne’e

Sekretariu Estadu hatete, orsamentu sira aprova tiha no tama ba konta bankaria FTTL atu nune’e FTTL lori atleta to’o Mexico hodi partisipa kompetisaun ne’e maibe la konsege entaun SEJD sei parte FTTL hodi halo klarifikasaun karik federasaun halo falla ruma iha organizasaun governu sei foti medida ruma.

“Orsamentu ami aprova tiha ona no tama ba konta bankaria FTTL iha loron 14 fulan Novembru 2022 ne’ebe osan ne’e mos ami halo ho urjensia tanba ami la prevee iha planu orsamentu SEJD maibe ami halo ezersisiu interna hodi suporta atleta ne’e bele partisipa World Taekwondo Championship ne’e maibe atleta la partisipa, nune’e, parte SEJD sei bolu FTTL halo klarifikasaun ka esplikasaun tanba sa la partisipa, bainhira falla iha federasaun, ami sei foti medida balun ba federasaun no orsamentu la ezekuta fila fali mai kofre estadu”, tenik Abrão

Enkuantu, Atleta Ana da Costa la ba partisipa iha World Taekwondo Championship Iha Mexico tanba Guvernu liu husi SEJD haruka deit osan 4.000.00 USD, enkuantu antes FTTL husu osan 20.000.00 USD, Portantu Atleta TL infelizmente la partisipa tanba osamentu la sufusiente hodi fasilita Treinador, Ofisial no Ezekutivu hodi akompanha atleta ba Mexico

Reportajen: Augusto dos Santos

Editor         : Ekipa Editorial