Sentru Kadi Kakutak Fó Formasaun Inglés Ba Joven 500 Resin
![](https://sapnewstl.com/wp-content/uploads/2024/08/IMG-20240812-WA0071.jpg)
Imajem : Formandu Sentru Formasaun Kadi- Kakutak ( SFKK), iha Delta Nova, Segunda (12/08/2024). Foto : Dircia Belo
SAPNewsTL, Dìli – Sekretáriu Estadu Formasaun Profisionál no Empregu (SEFOPE), Forum ONG Timor-Leste (FONGTIL), Gabinete Apoio Sosiedade Sivíl (GASC), ofisialmente abertura kursu lian inglés Australia nian iha Sentru Formasaun Kadi- Kakutak ( SFKK), kursu ne’e ba kandidatu sira ne’ebé la passa no hetan valor very poor, poor, no sufisiente.
Diretor Nasional Formasaun Profisional Leandro Vernando Pereira Vicente fó agradese ba Sentru Formasaun Kadi- Kakutak tanba bele oferese formasaun lian ingleza ba kandidatu sira ne’ebe la passa iha teste vaga online.
“Sentru Formasaun Kadi- Kakutak (SFKK) konsege loke ona fatin ida hodi simu kadidatu ne’ebé laliu iha teste eskrita, iha oportunidade ida ne’e aprende hodi hasa’e sira nia koñesimentu no abilidade ba língua Inglés, orgullu ba parte governu no agradese ba Sentru Formasaun Kadi-Kakutak (CFKK) konsege loke ona kursu ida ne’e hodi bele fasilita ita nia joven sira hodi aprende língua di’ak liu tan hodi kompete merkadu de traballu”. Dehan Diretor Nasional Formasaun Profisional no Empregu, Leandro Vernando Pereira Vicente ba jornalista sira iha Delta Nova, Segunda (12/08/2024).
Leandro Vernando Pereira Vicente informa kandidatu hirak ne’ebe iha preokupasaun eskola no servisu, bele tuir kursu ne’ebe hetan ona akreditasaun iha Dili.
![](https://sapnewstl.com/wp-content/uploads/2024/08/IMG-20240812-WA0081.jpg)
Diretor Nasional Formasaun Profisional no Empregu, Leandro Vernando Pereira Vicente
“Informasaun antes ne’e fo no sira ne’ebé tuir teste iha munisípiu tenke tuir fila fali iha idak-idak nian munisípiu, maibe tanba preokupasaun ba eskola, servisu no atividade iha Díli labele husik ne’e sai prekupasaun bo’ot ida, ami anota no ko’alia hodi bele responde ba kandidatu ne’ebé enfrenta hela”. Nia informa.
“SEFOPE kada tinan fo sai avizu ba Sentru formasaun sira atu nune’e submete proposta kada tinan iha programa tolu (3) ne’ebe sentru formasaun atu aplika maka formasaun regular, movel, no reforsa, instituisional programa tolu ne’e sentru sira bele aplika hodi fó formasaun ba joven sira”.
Iha fatin hanesan, Prezidente Sentru Formasaun Kadi-Kakuta Aquelino Soares Fereirra subliña, CFKK mai ho misaun, vizaun no objetivu hodi transforma foinsa’e sira ba futuru, sai ajente ba dezenvolvimentu.
“Assosiasaun kadi-kakutak ne’e mai ho misaun, visaun no objetivu ida atu transforma foinsa’e sira ba futuru sai ajente ba desenvolvimentu hodi dezenvolve ita nia rai, tanba ne’e ami halibur foinsa’e sira hodi fahe koñesimentu ho objetivu atu bele prepara sira kompete iha kampu de traballu”.
Sentru formasaun kadi-kakutak simu ona kandidatu traballador hamutuk atus lima resin (500 ital), formasaun refere sei la’o durante fulan tolu (3), hafoin formandu sira sei aprezenta sira nia sertitikadu ba SEFOPE.
Jornalista : Dircia Baptista Belo