Timor-Leste Derrota Kontra Cabo Verde Ho Eskor 4-0
Imajem : Ekipa Jogador Cabo Verde iha Estádiu Munisipal Dili, 22/07/2025. Foto : Conzita Mota
SAPNewsTL, Díli : Ekipa selesionadu Cabo Verde hatudu dominasaun total no halakon Timor-Leste ho eskor 4-0 iha jogu CPLP ne’ebé hala’o iha Estádium Munisípal Dili.
Ekipa Kobertura – SAP News TL
Partida ne’e mak parte husi kompetisaun CPLP (Comunidade dos Países de Língua Portuguesa), no durante jogu Cabo-Verde domina makas tempu hodi hatudu tatika jogu, indika Cabo-Verde ameasa makas hodi suta golu ba guarda rede Timor-Leste (TL) nian iha minutu neen (6) no kontinua suta golu ba guarda rede TL haleu iha minutu 12.
Ekipa vizitante ne’e halo presáun maka’as ba ekipa Timor-Leste no kontinua hatama golu hodi aumenta eskor 3-0 iha minutu 26, husi jogu refere defesa Timor-Leste laiha forsa hodi hapara ofensiva husi adversáriu sira ne’ebé hatudu esperiénsia Iha kampu.
Enkuantu, Cabo-Verde kontinua ameasa guarda rede TL liu husi suta makas husi jogadores numeru seti (7) Cabo-Verdiano, hodi hamihis guarda rede TL nia esperansa atu konkista vitoria kontra Cabo-Verde.
Tuir observasaun SAPNews nota iha terrenu katak ekipa iha jogu desportivu modalidade futeból entre Timor-Leste no Cabo-Verde, ekipa nasional Cabo-Verde hatudu dominasaun desde minutu inisiais hodi hatama golu taat ba guarda rede TL nian, halo adeptus husi Timor-Leste fuan taridu no laran triste.
Iha minutu 35, ekipa Timor-Leste iha oportunidade hodi suta bola falta hatudu ameasa ba guarda rede Cabo-Verde nian maibe la konsege hetan oportunidade atu hatama golu.
Jogu ne’e hatudu klaramente estratéjia agresivu husi ekipa Cabo-Verde hodi kontrola no kontinua hakat to’o faze primeiru remata iha minutu 45:00.
Hafoin intervalu durante minutu 15, ekipa rua kontinua jogu ho normal, nune’e ekipa Timor-Leste hetan oportunidade sobu defeza Cabo-Verde hodi hakat tama ba guarda Cabo-Verde nian maibé rezultadu hatudu Timor-Leste laiha golu.
Maske laran triste ho fuan taridu, ekipa nasional Timor-Leste kontinua esforsu maka’as hodi domina bola iha minutu balun nia laran, maibé ekipa Cabo-Verde halo presáun maka’as kontra ekipa TL, nune’e Timor-Leste laiha oportunidade atu hatama golu ba guarda rede Cabo-Verde.
Bainhira hakat ba minutu 75 ba leten, ekipa nasional Timor-Leste hetan oportunidade dala tolu (3) hodi hakas an sobu defeza ekipa Cabo-Verde nian, liu husi ameasa guarda rede Cabo-Verde maibe la konsege hatama golu.
Vitória Cabo-Verde hetan pontu tolu no Timor-Leste sei hakerek hela esperansa atu simu rezultadu diak iha partida sira seluk. Adeptus Timor-Leste iha estadium Dili hamutuk ho trenador no adeptus sira fó motivasaun ba jogador sira atu kontinua luta iha restu kompetisaun.
