Traballador 111 Ba Korea do Sul, PR Horta : Aproveita Tempu Didiak Estuda Online
SAPNewsTL, Dili- Sekretaria Estadu Formasaun Profisional no Empregu (SEFOPE), liuhusi Diresaun Nasional Empregu Exterior (DNEE), ohin loron realiza serimonia despedida ba traballador Timor oan nain 111 ne’ebe atu ba serbisu iha Korea do Sul.
“SEFOPE sei haruka tan Traballador Timor oan Nain 111 ba Servisu iha Korea do Sul, iha loron 18 fulan Jullu tinan ne’e, ohin ita halo despedida ba alin sira atu ba servisu iha Korea do Sul, tanba ne’e ohin ami konvida Prezidente Republika, José Manuel Ramos Horta, hodi hato’o mensajen ba ita-nia Traballador sira ba servisu iha rai liur,” dehan Sekretaria Estadu Formasaun Profisional no Empregu (SEFOPE), Alarico de Rosario ba jornalista hafoin remata serimónia ne’e iha Timor Lodge, Comoro, Dili Sexta (05/07/2022).
Nia hatete sira mos konvida Prezidente Republika (PR), atu partisipa, tanba ema hotu-hotu hatene katak, husi esforsu sira ne’e, atu buka dalan ho diplomata sira ne’ebe servisu iha rai liur, no Korea do Sul prontu simu traballador timoroan sira tuir baze legal ne’ebe mak akordu ona husi Guvernu ho Guvernu.
“Tanba ne’e ohin ita-nia Traballador Timor oan nain 111 ne’e sei ba servisu iha rai Korea do Sul, kompostu mos husi Traballador nain 88, sei ba servisu iha area peskas nian, no nain 23 ba iha area fábrika no industria,” tenik nia.
Enkuantu Sekretariu ne’e husu ba Traballador Timor oan nain hirak ne’e, atu kumpre lei Korea, no servisu la halai sees husi sistema, no mos atu respeita Kultura Korea nian.
lha biban hanesan Prezidente Republika, Jose Manuel Ramos Horta, afirma Traballador ba rai liur ne’e normal, iha onra, iha dignidade nu’udar traballador, no nia mos koñese Korea diak iha tempu oin mai sei hala’o vizita ba Korea do Sul hodi hametin liutan relasaun entre Timor-Leste no Korea do Sul.
“Boa viajen, servisu diak ba imi hotu, hau nia mensajen mak imi ba iha ne’eba kumpre lei no kultura Korea do Sul nian no dixiplina iha servisu hotu aproveita tempu ho didiak, lalika gasta osan arbiru, labele gasta osan hodi joga, maibe rai didiak osan hadia ekonomia familia, selu oan sira-nia eskola, imi ne’ebe sei joven ba iha ne’eba se bele aproveita estuda online, tanba iha ne’eba estuda online diak loos,” nia hatete.
Horta hatutan, sei kontinua apoiu ba SEFOPE hodi tau orsamentu oinsa kapasita joven sira iha formasaun tekniku hodi prepara ba servisu iha rai seluk, tanba traballador Timoroan ba servisu iha rai liur ne’e normal hodi bele hadia ekonomia familia no nasaun.
“Timor oan barak mak agora sai hotu ba servisu iha rai liur ema dehan ne’e ladiak, maibe ha’u hanoin ida ne’e normal ba servisu iha rai liur hanesan imi atu ba Korea do Sul. Tanba fenomenu iha mundu ema juta ba juta iha mundu tomak ba rai seluk hala’o servisu ne’ebe hatama osan bo’ot ba ekonomia,” Katak nia.
Nia dehan tanba ne’e, presiza apoiu joven sira, maibe ba liur tenke organizadu liuhosi SEFOPE ka ajensia sira ne’ebe kopera ho SEFOPE, nune’e ikus labele mosu problema i difikuldade oioin no oinsa garante seguransa vida.
“Korea do Sul nasaun ida ha’u kuñese diak, to’o aproxima simpatia ha’u koalia ho sira konsege haruka traballador Timoroan dahuluk ema nain 50 no to’o ohin loron aumenta atus ba atus. Nune’e, iha tempu diak, tinan ne’e nia laran ha’u sei ba vizita Korea do Sul buka hametin liutan relasaun Timor-Leste ho Korea do Sul, ko’alia oinsa instituisaun Korea mai iha ne’e no komersiu produtu Koreanu mai iha ne’e no ema Korea barak mai iha ne’e,” tenik nia.
Laureadu Novel ba Paz ne’e hateten sempre apoiu SEFOPE tau osan formasaun tekniku iha Timor, hodi ajuda eskola formasaun tekniku, hanesan Fatumaka no sentru formasaun sira no Kurikulu presiza tuir nivel ho internasional hanesan Korea do Sul ka Australia.
Jornalista : Antonio Altamirando & Delfina Babo