Tulun Labarik Na’in 4 ! Korrente Mota Lori Lakon Agostu Iha Afabubo
Imagem : Ekipa konjunta buka tuir Agostu Madeira ne’ebe mota lori lakon iha Afabubo-Luro, 03/05/2025. Foto : Média APC
SAPNewsTL, Lautém : Relasiona ho udan boot ne’ebe akontese iha Postu Administrativu Luro, Munisípiu Lautém resulta korrente mota lori lakon sidadaun Agostu Madeira, wainhira fasilita labarik na’in haat hakur mota.
Tuir informasaun ne’ebe SAPNews asesu liu hosi Pajina Autoridade Protesaun Civil (APC) haktuir katak insidente mota lori ema na’in ida (1) ho naran Agostu Madeira, tinan 55 ne’e akontese iha loron, 03 fulan Maio, tinan 2025, iha meiu-dia oras tuku 13:25 OTL.
“Kronolójia ba akontesimentu ne’ebe APC asesu husi sasin sira ne’ebé la’o hamutuk ho vítima Agostu Madeira katak, altura ne’eba vítima ajuda hela labarik na’in haat (4) hodi hakur mota atu fila ba uma, entre labarik na’in haat (4) ne’e, nain tolu (3) mak vítima konsege ajuda ona lori ba iha mota sorin”.
“Labarik ida ikus ne’ebé vítima hakarak ajuda, maibé korrente mota ne’ebé bo’ot halo vítima Agostu Madeira monu hamutuk ho labarik ne’e, maibe labarik ne’e bele nani hodi salva-aan, entretantu vítima Agosto Madeira labele salva-aan no mota lori kedas, to’o oras ne’e ekipa ne’ebé halo buska seidauk hetan vítima refere”.Sita Ildefonso Soares, Média APC Lautém iha Pajina APC, Lautém, 05/05/2025
Imagem : Agostu Madeira
Bainhira Autoridade Protesaun Sivíl (APC) Munisípiu Lautém simu informasaun direta via-telefónika husi autoridade lokál suku Afabubo, ekipa APC imediatu halo intervensaun hodi buka vítima ne’ebé mota lori, hamutuk PNTL Eskuadra Postu Administrativu Luro, Autoridade Lokál, inklui komunidade sira.
Ekipa ne’ebé buka kompostu husi APC Munisípiu Lautém, PNTL, autoridade lokál hamutuk komunidade sira, buka tuir ona vítima Agusto Madeira, durante loron rua ona (hahú data; 03-04 Maiu) maibe to’o oras ne’e seidauk hetan.
Nune’e, liu husi koordenasaun servisu entre ekipa konjuntu kompostu husi APC, PNTL, autoridade lokál hamutuk komunidade sira deside hodi mantein buka tuir vítima ne’ebé mota lori.
Jornalista : Sergio Delekuar