Udan Boot Rezulta Estrada Ligasaun Manatutu Ba Soibada Kotu
Imajem : Estrada Ligasaun postu administrativu Soibada iha area Suku Leo-Haat, 29/12/2024. Foto : Sosial Média
SAPNewsTL, Manatutu : Relasiona ho udan boot ne’ebé akontese orseik loron 28 Fulan Dezembru tinan 2024, rezulta estrada ligasaun Manatutu Villa ba Postu Administrativu Soibada kotu tanba mosu erozaun.
Tuir informasaun ne’ebé SAPNews asesu liu hosi Guilhermino Ramos informa katak estrada diresaun Postu Soibada mai Manatutu Villa, Munisípiu Manatutu kotu tanba kauza hosi udan boot no rai monu iha area Fatu-Manau, Suku Leo-Haat, postu administrativu Soibada.
“Estrada diresaun Soibada ba Munisípiu Manatutu kotu tanba kauza hosi udan boot no rai monu iha Area Fatu-Manau, Suku Leo-Haat, postu Soibada”. Informa Guilhermino Ramos ba SAPNews iha Manatutu,29/12/2024.
Estrada aat ne’e implika movimentasaun transporte públiku no privadu sira hodi asesu ka halo viajem hosi Soibada mai Munisípiu Manatutu no Kapitál Dili.
Entretantu, parte autoridade postu Soibada hamutuk ho seguransa mós halo ona observasaun no idenfikasaun ba dezastre natural ne’ebé mosu hodi halo destruisaun ba estrada refere.
Hafoin notísia ne’e publika SAPNews seidauk halo komfirmasaun ho parte Ministériu Obras Públika (MOP) ligadu ho dezastre natural ne’e tanba loron feriadu.
Nune’e, SAPNews sei kontinua rekolla informasaun liga ho asuntu ne’e, hafoin sei publika iha tempu badak.
Jornalista : Daniel Da Silva
