UNTL : FFCH Uza Sala 2 Ba Ensinu, FAGRI Uza Haris-Fatin Ba Administrasaun

Imajem : Senadu Estudantil hala’o komunikadu imprensa hodi denúnsia probema UNTL ba públiku iha Kampus Sentral, 24/09/2024. 

SAPNewsTL, Dili : Assosiasaun Akadémika Estudantil (AAE) Universidade Nasional Timor Lorosa’e (UNTL), kestiona problema supra no infraestrutura  iha UNTL tanba to’o ohin loron dezenvolvimentu UNTL sei hakdasak.

Estudante sira mós preokupa ba problema supra no infraestrutura liliu Fakuldade Filosofia Siénsia Humanu uza deit sala rua ba ensinu aprendijajem, edifísiu agrikultura ne’ebé seidauk uza, fakuldade agrikultura uza haris fatin ba servisu administrasaun.

Porta-voz Jenia Filomena Lobo hateten, problema infraestrutura ne’ebe durante ne’e estudante sira enfrenta, liu-liu sala aula ne’ebe la sufisiente ba Fakuldade Filosofia Siénsia Umanus (FFCH)  uza deit sala aula rua (2) hodi akumula estudante hotu-hotu.

“Sala aula la sufisiente, problema ida ne’e akontese iha Fakuldade Filosofia Ciencia Humana, desde inisiu fakuldade eziste to’o agora iha sala de aula rua deit hodi akumula estudante hotu-hotu iha fakuldade filosofia, situasaun ida ne’e perturba tebes funsionamentu aula iha fakuldade”. Dehan Porta-voz Jenia Filomena Lobo ba Jornalista sira iha Kampus sentral UNTL, (24/09/2024).

Estudante UNTL ne’e informa, kazu sala aula la sufisiente hodi la garante funsionamentu aula ho efetivu, akontese mos iha fakuldade sira seluk hanesan Fakuldade Siénsia Sosiais no Edukasaun Artes no Umanidades.

“Kazu mak hanesan akontese mos iha Fakuldade Siensia Sosiais no Faculdade Edukasaun Artes no Umanidades, iha ne’ebe sala aula la sufisiente no la garante funsionamentu aula ho efetivu”.

Jenia Filomena Lobo salienta,  problema laiha edifisiu própriu iha ne’e difikulta Fakuldade Turizmu hodi hala’o funsionamentu aula no atividade Assosiasaun Akadémika Fakuldade nian. Situasaun ne’e akontese mos iha Fakuldade Siensia Ezatas.

“La iha edifisiu propriu, problema ne’e  enfrenta husi Faculdade Turizmu, situasaun ida ne’e difikulta tebes funsionamentu aula no atividade asosiasaun akademika Faculdade Turizmu. Situasaun mak hanesan akontese mós iha Faculdade Siencia Ezatas, ne’ebe daudaun ne’e uza hela INFORDEPE”.

Porta-voz Jenia hateten, edifisiu Faculdade Agricultura ne’ebe lokaliza iha Hera ladauk funsiona maske halo ona inaugurasaun husi orgaun universidade, no edifisiu ne’e seidauk kompleta fasilidade ensinu no prátika.

“Edifisiu Faculdade Agricultura neʼebé lokaliza iha Hera ladauk funsiona maske edifisiu ne’e rasik hetan ona inaugurasaun husi orgaun universidade maibe to’o agora ladauk funsiona, no iha parte seluk assosiasaun akademika haree katak edifisiu ne’e rasik mos ladauk kompleta fasilidade ensinu no pratika”.Nia informa

Estudante sira liu husi Porta-voz Jenia Filomena Lobo preokupa mos edifisiu departamentu laiha, iha Fakuldade Agrikultura hodi difikulta funsionamentu administrasaun nune’e obriga estrutura hodi okupa casa de banho sai servisu administrasaun.

“Edifisiu ba departamentu la iha, situasaun ida ne’e akontese iha faculdade agricultura iha departamentu Siencia do Solo, Floresta no Agro Pecuaria iha ne’ebe la iha fatin ba funsionamentu administrasaun nian, nune’e obriga estrutura hodi okupa kaza de bañu ba servisu administrasaun, kazu ida ne’e hatudu katak jestaun iha universidade la’o hakdasak no presiza tebes apoiu no intervensaun husi públiku”.

Laiha projetor iha universidade hodi difikulta prosesu aprendizajen, nune’e profesor sira obriga estudante halo kontribuisaun hodi hola projetor.

“La iha projetor iha universidade difikulta tebes prosesu aprendizajen liu-liu materia sira ne’ebe presiza utiliza projetor, kazu ida ne’e halo profesor obriga estudante hodi halo kontribuisaun liu husi meius (kobransa ilegal) hodi hola projetor”.

Estudante UNTL preokupa mos ho odamatan haris fatin ne’ebe ladi’ak iha universidade maibe ladauk rezolvidu no abandonadu.

“Odamatan casa de banho ladi’ak, situasaun ida ne’e akontese iha universidade no to’o agora universidade ladauk resolve no husik abandonadu, maski estudante sira kontribui ona osan liu husi kaixa UNTL”. Nia hakotu.

Enkuantu, fontes osan ba UNTL mai hosi osamentu jeral estadu no kontribuisaun estudante, enkuantu kontribuisaun estudante kompostu  hosi kaixa UNTL ne’ebé mai hosi  osamentu rejistu, osan orientasaun, kontribuisaun graduasaun, kontribuisaun ba edifísiu kada semester, osamentu peskiza, no seluk tan.

Assosiasaun estudantil husu ba Ministériu Ensinu Superior Siénsia no Kultura (MESSK), Comição Anti Corupção (CAC), no Parlamentu Nasionál hodi toma atensaun ba problema ne’ebé estudante hasoru iha UNTL.

Enkuantu, MESSK José Honório husu ba Magnífiku Reitor UNTL João Soares Martins hodi toma atensaun ba preokupasaun ne’ebé estudante sira kestiona iha UNTL.

Ligadu ho preokupasaun refere, SAPNews tenta atu entrevista  ho Magnífiku Reitor UNTL maibé la konsege tanba lider UNTL ne’e okupadu ho servisu seluk.

Jornalista : Daniel Soares & Marciana da Conceição