𝗞𝗼𝗺𝘂𝗻𝗶𝗱𝗮𝗱𝗲 𝗟𝗮𝘂𝘁𝗲𝗺 𝟰.𝟬𝟬𝟬 𝗦𝗲𝗶 𝗔𝘀𝗲𝘀𝘂 𝗕𝗲𝗲-𝗠𝗼𝗼𝘀 𝗛𝗼 𝗞𝘂𝗮𝗹𝗶𝗱𝗮𝗱𝗲
Imajem : Ministru Obras Públicas (MOP) assina kontratu ho kompanha kontraktor kona-ba fornesimentu bee-moos iha Lautém, 31/10/2025
SAP NewsTL, Lautém : Bee Timor-Leste, Empreza Publika (BTL, E.P) asina ona kontratu implementasaun ba projetu melloramentu sistema bee-moos iha Munisípiu Lautém ho osan montante liu $17.1 Miliaun Dolares Amerikanu.
Daniel da Silva – Mídia Sapnews
Projetu ho durasaun tinan tolu (3) ne’e finansia hosi Empréstimu Banku Dezenvolvimentu Islámiku (IDB) ho valór boot liu $17.1 Miliaun Dolares Amerikanu.
“Tuir planu, projetu ne’e sei garante asesu bee mo’os ho kualidade ba konsumu durante oras 24 (ruanulu-resin-haat) ba loron hitu (7) iha semana ida, hodi benefisia uma kain besik 4,000 iha Lautém”. Dehan Presidente BTL.EP Gustavo Da Cruz ba jornalista sira iha Lautem sexta,31/10/2025.
Servisu implementasaun projetu ne’e sei hala’o hosi kompañia Beching Urban Constructions, no supervizaun ba kualidade no progresu hetan apoia hosi Konsultór Internasionál hosi Koreia ne’ebé halo joint venture ho kompañia nasionál Donsions.
”Ba komunidade iha Munisípiu Lautém, sira sei hahú loke torneira iha uma laran hodi hemu bee. Iha fontanáriu públiku sira mós bele hemu bee direitamente, tanba bee ne’e ita halo tratamentu ba bee hemu nian. Ba kapitál munisípiu sira, ita dezenha ona atu bee ne’ebé fornese sai bee hemu hotu,” dehan Prezidente BTL, E.P.
Projetu ne’e estimasaun sei benefisia uma kain hamutuk 3,915 (ka besik 4,000 uma kain) ho populasaun totál 39,873 iha kapitál munisípiu Lautém. Ho estimativa ida, durasaun sustentabilidade ba kualidade bee ne’e sei bele sustenta populasaun to’o tinan 2040.
BTL sei garante fornesimentu bee ne’ebé sufisiente no kualidade, be’e matan sei mai hosi Bee PAPAPA, no mós halo backup ho perfurasaun bee rai okos hamutuk posu hitu (7), ho kapasidade totál besik 99 litru kada segundu.
”Projetu ida-ne’e mos ita sei instala Sistema SCADA, katak bainhira ita-nia nasaun tomak seidauk iha sistema ne’e no halo kontrolu manuál de’it. Ho Sistema SCADA, sei iha Kontrolu Room ida atu haree bee iha parte ne’ebé mak presaun tun, nune’e bele kontrola de’it husi Kontrolu Room,” esplika
Iha konstrusaun ne’e, sei harii Reservatóriu (Tanke) hamutuk lima (5) ho totál kapasidade 4,400 metrus kúbiku, no sei instala kanu transmisaun ho tipu kanu rua (kanu HDPE no kanu Daktai Aéro) ho naruk besik 94 kilómeter iha sidade laran.
Nia hatutan, ”Projetu iha Munisípiu Lautém ne’e di’ak, tanba ita hetan ona lisensamentu husi ANLA hotu, liga ba ai-horis no komunidade sira. Komunidade uma kain neen (6) mak hetan afeta, maibé BTL rezolve hotu ona, nune’e projetu ne’e prontu ona ba implementasaun,” nia hateten.
Tuir planu BTL iha planu atu kontinua dezenvolvimentu iha territóriu nasionál inklui halo planu lansamentu iha Munisípiu Manufahi no halo inaugurasaun iha kapitál postu administrativu sira hanesan Ossu, Zumalai no seluk tan.
”Governu foin primeira vez investe iha setór bee ba iha kapitál munisípiu Lautém ho Munisípiu Manufahi. Ba munisípiu sira seluk, inklui Kapitál Dili, sei iha prosesu preparasaun hodi ba implementasaun,” afirma Prezidente BTL, E.P.
Prezidente BTL ne’e sublinha katak meta tuir Planu Estratéjia Dezenvolvimentu Nasionál 2011-2030 (PEDN 2030) mak atu garante komunidade tomak asesu ba bee hemu to’o tinan 2030.
”Hahú agora, Governu tau ona osan atu bele investe, BTL hahú halo nia dezenvolvimentu komesa mellora iha kapitál postu sira, ita abranje hotu kapitál postu sira, depois ita ba fali iha suku no aldeia sira,” nia hateten.
Nia mós husu ba komunidade Lautém atu hatudu kooperasaun ne’ebé di’ak ho kompanha sira hodi fo susesu ba projetu bee-moos iha munisipiu.
”Husu ba komunidade Lautém atu kopera nafatin ho empreza ne’ebé implementa projetu no tékniku sira. Kuandu sistema la’o no iha interrupsaun ruma, favor labele fura arbiru. Fó hatene ba ami-nia kordenadór no tékniku iha munisípiu atu sira ba haree. Labele bee la mai, ida-idak sobu de’it nia dalan,” Nia apela