𝗞𝗮𝗻𝗱𝗶𝗱𝗮𝘁𝘂 𝗙𝗼𝘂𝗻 𝗣𝗡𝗧𝗟 𝟭𝟮.𝟵𝟵𝟲 𝗦𝗲𝗶 𝗧𝗲𝘀𝘁𝗲 𝗔𝗽𝘁𝗶𝗱𝗮𝘂𝗻 𝗙𝗶𝘀𝗶𝗸𝗮, 𝗣𝘀𝗶𝗸𝗼𝗹𝗼𝗸𝗷𝗶𝗮 & 𝗜𝗻𝘁𝗲𝗿𝘃𝗶𝘀𝘁𝗮

Imajen : Komisaun rekrutamentu PNTL halo konferensia imprensa iha Comoro, 29/10/2025. Foto : Média PNTL

SAP News TL, Díli : Sekretáriadu rekrutamentu Polisia Nasional Timor-Leste (PNTL) denúnsia ba públiku katak kandidatu kadetes foun PNTL 12.996 sei tuir teste prova aptidaun fisika, intervista profisional no prova psikolojia iha loron 6 Novembru to’o 31 Dezembru 2025.

Guilhermino Ramos da Cruz – SAPNewsTL

Tuir Portavós Komisaun Rekrutamentu Ajente Polísia Nasional Timor-Leste (PNTL) 2025, Superintendente António da Luz hateten, Bazeia ba alterasaun dahuluk ba diploma ministerial no. 17/2025, loron 25 de Junhu ba diploma ministerial no. 37/2025, loron 10 Outobru ne’ebe halo alterasaun kona-ba rezultadu teste eliminatoriu ba fali akumulativu hodi define katak kandidatu sira ne’ebe tuir ona prova kultural aplika aptu no la aptu ba kandidatu sira, hafoin tuir teste intervista profisional no prova psikolojia.

“Bazeia ba alterasaun dahuluk ba diploma ministerial no. 17/2025, loron 25 de Junhu ba diploma ministerial no. 37/2025, loron 10 Outobru, husu ba kandidatu sira ne’ebe partisipa ona prova kultural nian atu mai tuir prova aptidaun fisiku intervista profisional no prova psikolojia iha Centru Formasaun PNTL (CFP) Comoro tuir orariu ne’ebe ami mensiona” Dehan Portavós PNTL Superintendente Polisia António da Luz, iha sala komferensia CFP, Comoro, Quarta-Feira, (29/10/2025)

Nia esplika, kandidatu sira ne’ebe tuir prova aptidaun fisiku, intervista profisional no prova psikolojia, kada loron ema nain atus tolu (300) sei tuir teste bazeia ba oráriu ne’ebe Gabinete Komunikasaun Relasaun Publika PNTL estabelese ona.

Dader kandidatu 150 hahu oras 07:30 – 12:30 OTL, lokraik kandidatu 150 hahu oras 14:30 – 17:30

1. Kandidatu ne’ebe tuir ona prova aptidaun iha dader, sei kontínua ho intervista profisional iha parte lorokraik, no dader sei kontinua kedas ho teste psikolojia
2. Kandidatu ne’ebe tuir ona prova aptidaun fisiku iha lokraik, sei kontinua ho intervista profisional iha loron tuir mai no sei kontinua kedas ho teste psikolojia nian.

Dokumentu no material ne’ebe mak

presija kandidatu sira lori mak hanesan.

1. Kartaun eleitoral original ou Billeti Identidade (BI) Original.
2. Resivu prova kultural nian.
3. Kandidatu ida-idak sei lori nia hahan ho be rasik durante teste
4. Ba prova aptidaun fisiku husu ba kandidatu sira atu lori.
5. Sepatu Kest/Olah-raga
6. Kalsa badak ou training
7. Kamizola ou Kaus
8. Ba intervista Profisional no teste psikolojia kandidatu sira tenki uza
9. Sepatu
10. Kalsa naruk
11. Faru liman badak ou naruk tenki mós

Proividu ka Bandu:

1. Sei la autoriza hasai foto durante prova aptidaun fisiku, intervista profisional no prova psikolojia.
2. Sei la autoriza aman ou inan ka familia atu akompaña kandidatu sira tama iha fatin prova nian.

Entretantu, teste sei hala’o tuir munisípiu.

1. Munisipiu Aileu sei hahu teste iha loron neen (6) too loron ualu ( fulan novembru.
2. Atauro sei hahu iha loron ualu, hafoin teste kandidatu munisipiu Aileu remata.
3. Munisipiu Ainaro sei hahu iha loron 10-13,
4. Munisipiu Baucau sei hahu iha loron14-17,
5. Bobonaro iha loron 18-20,

6.Munisipiu Covalima 21-22,

7. Dili 24-09 dezembru,

8.Ermera 10-12,

9.Lautem sei hahu iha loron 13-15,

10. Liquiça 16-18,

11.Manatuto 19-20,

12. Manufahi 22-23,

13.Oe-Cusse 26 to’o 27,

14.Viqueque sei hala’o iha loron rua nulu resin sia to’o tolu nulu 29-30 Dezembru.

Prova aptidaun Fisiku, Intervista Professional no Psikolojia, komisaun rekrutamentu sei halo atendimentu ba kadidatu sira loron ida ema nain atus tolu (300), maibe fahe fahe tuir orariu kada Munisipiu inklui AREOA no Atauro.