𝗛𝗮𝗹𝗮𝗸𝗼𝗻 𝗔𝗿𝗺𝗲𝗻𝗶𝗮, 𝗣𝗼𝗿𝘁𝘂𝗴𝗮𝗹 Kualifika Ba Taxa Kopa Mundial 2026
Imajem : Jogador João Neves & Bruno Fernandes iha Porto, 16/11/2025. Foto : Seleção de Portugal
SAP News, Portu : Portugál kualifika ba Tasa Mundiál 2026 iha loron-domingu ne’e, hafoin halakon Arménia ho skore 9 a 1, iha jogu ne’e jogador Bruno Fernandes no João Neves halo hat-tricks.
Jogador João Neves sente orgulhosu ho resultadu ne’e tanba konsege halo golu tolu no kualifika Portugal hakat ba taxa kopa mundial 2026.
“Buat ne’ebé importante liu maka kualifikasaun ba Mundiál. Ba ha’u, hanesan ha’u hatete beibeik, ekipa sempre mai antes individuál”.
“Ha’u kontente tebes tanba marka ha’u nia golu dahuluk ba selesaun, no ha’u nia golu daruak no datoluk mós. Ha’u kontente tanba bele fahe kampu ho jogadór sira ne’ebé di’ak no ekipa ne’ebé di’ak tebes.” Hateten João Neves ba RTP iha Portugal, 16/11/2025. Sita Reuters
Portugál halo skore ida bainhira defeza Renato Veiga marka golu ida ho kabesa iha minutu hitu maibé sira hakfodak bainhira Eduard Spertsyan konverte kruzamentu hosi Grant-Leon Ranos iha minutu 11.
Ne’e hanesan golu datoluk Arménia nian iha grupu kualifikasaun tanba la konsege marka iha jogu tolu anteriór.
Maibé, esperansa ba vitória ne’e lakon lalais tanba Ramos restaura ho golu ida, enkuantu Neves aumenta golu rua antes intervalu.
Tuir mai, Bruno Fernandes konverte penalti ida iha tempu adisionál iha primeira parte hodi halo 5-1, molok deskansa.
Iha segunda parte kontinua ho padraun hanesan, maske iha substituisaun lubuk ida maibé presaun Portugal nian nunka para no sira hetan tan penalidade ida, nune’e Bruno Fernandes kompleta ho hat-trick. Tuir mai, João Neves aumenta nia golu datoluk iha jogu parte daruak, no Francisco Conceição mós hatama golu ida ba Armenia.
Treinador Arménia, Yegishe Melikyan rekunhese frakeza ne’ebe ekipa iha no optimista katak liu hosi jogu ne’e ekipa bele forte liu tan iha futuru.
“Ami iha ekipa joven ida no ami seidauk prontu atu joga hasoru ekipa sira ne’ebé maka’as hanesan Portugal. Hafoin jogu sira hanesan ne’e, ami sei sai forte liu iha futuru”, hatete hosi treinadór Arménia nian, Yegishe Melikyan.
“Ami halo sala sira ne’ebé maka estraga ami nia ekipa no ami la hein sala sira ne’ebé maka akontese ba golu daruak no datoluk Portugál nian. Ami seidauk preparadu mentalmente ba jogu sira hanesan ne’e.”
Irlanda remata iha segundu lugar iha grupu ho pontu 10 hodi hetan fatin iha playoff hafoin sira halakon Hungaria ho 3-2 ho golu ikus iha minutu neen hosi tempu adisionál.