𝗧𝗲𝗹𝗸𝗼𝗺𝗰𝗲𝗹 𝗧𝘂𝗹𝘂𝗻 𝗙𝗮𝗺𝗶𝗹𝗶𝗮 𝗨𝗺𝗮 𝗞𝗮𝗶𝗻 𝟮 & 𝗢𝗿𝗳𝗮𝗻𝗮𝘁𝘂 𝗗𝗼𝗺 𝗚𝗮𝗯𝗿𝗶𝗲𝗹

Imajem : Telkomcel apoia nesesidade báziku ba orfanatu no vulnerável sira iha Likisa, 23/09/2025

SAP News TL, Liquiça : Iha ambitu komerasaun tinan 13 eziste Telkomcel iha Timor-Leste hala’o asaun karidade no fó apoiu nesesidade bazika ba familia uma kain rua (2) no Orfanatu Dom Gabriel ne’ebe lokaliza iha Suku Maumeta no Dato, Postu Administrativu Likisa Vila Munisipiu Likisa.

Daniel da Silva – SAPNewsTL

Tuir reprezentante Kompañia Telkomcel Antonio Expostu hateten, atividade ne’e hanesan parte husi programa solidariedade sosial ne’ebé sempre realiza kada tinan nu’udar selebrasaun aniversáriu kompañia nian.

“Ami husi Telkomsel hakarak ajuda oituan ba família kiik rua ne’ebé ami identifika iha Munisípiu Likisá inklui mós orfanatu Dom Gabriel Likisá. Ami halo asaun karidade ida ne’e ami sempre halo kada tinan dala ida hodi selebra aniversáriu Telkomcel ninian,” Dehan, Tersa-feira, (23/09/2025)

Iha fatin hanesan, representante Xefe Suku Dato, Patricio da Costa Soares, hato’o agradesimentu ba operdor Telkomcel tanba bele fó apoiu ba familia uma kain ida ne’ebe lokaliza iha bairu Kaimeo Suku Dato.

“Ha’u reprezenta, Bairu Kaimeo vila hakarak hato’o agradese wain ba Telkomsel tanba bele ajuda ona maluk sira ho kbiit ne’ebé naton maske ho sasán ne’ebé oituan maibé ami nafatin agradese ba Telkomsel, nune’e ba futuru nafatin ajuda maluk sira seluk ne’ebé seidauk identifika.”

Nia fundamenta, asaun karidade ne’e mostra kompromisu Telkomcel atu kontinua fó kontribuisaun ba komunidade, liu-liu ba sira ne’ebé iha nesesidade urgente.

Enkuantu Benefisiáriu programa ne’e, Carmelita Boavida, hato’o agradesimentu profundu ba apoiu Telkomcel, tanba ajuda ne’e fó esperansa ba família sira iha momentu difisil.

“Ha’u sente kontente wainhira hetan apoiu husi Telkomcel tanba haree netik ami-nia nesesidade maske la barak. Wainhira iha tempu udan, ami sente triste tanba kondisaun uma ladiak kalen mós aat hotu no tempu udan ha’u ho oan nain haat feto rua mane rua sempre lori baxia tau iha fatin ne’ebe udan-ben turuk, tanba kondisaun uma ladiak halo ami sente susar tebes.”

Aleinde ne’e, responsavel Orfanatu Dom Gabriel, Madre Maria Suzana, mós kontente tebes ba kompañia Telkomcel tanba iha inisiativa hodj fó apoiu ba familia vuneravel no orfanatu sira.

“Ami agradese tebes ba Telkomcel bele loke matan ba orfanatu ida ne’e tanba ami iha labarik orfanatu sira barak maske dala barak ami sente difisil maibé ohin loron ami sente kontente tebes tanba bele hetan ajuda oituan hodi apoiu labarik sira-nia nesesidade, ami husu nafatin ita-nia apoiu malu tanba ami madre mesak de’it mós labele” Tenik Nia.

Madre Suzana, fundamenta apoiu refere bele tulun nesesidade labarik orfanatu sira ne’ebe hela iha rezisténsia orfanatu Dom Gabriel Liquiça hodi buka matenek.

“Ami ho esperansa tomak akumula alin sira husi Munisípiu hotu-hotu iha orfanatu ida ne’e hamutuk 32 iha ne’e mós ami sempre hanorin sira ho língua hanesan ingles, Melayu no lian sira seluk. Ami sei la ko’alia barak maibé ami hakarak hato’o de’it agradese wain tebes ba Telkomsel” Madre Hakotu.

Asaun karidade ne’ebé operador telekomunikasaun Telkomcel halo ne’e hodi selebra ninia ezisténsia ba dala XIII iha Timor-Leste, apoia ne’e halo ba komunidade sira iha Munisipiu Baucau, Likisa no Dili.