12 Novembru ! Bispu Leandro Husu Jovens Hases An Hosi Violénsia

Imajem : Entrevista Bispu Dioseze Baukau Dom Leandro Maria Alves iha Luro,12/11/2024.

SAPNewsTL, Lautém – Iha ámbitu selebrasaun loron masakre santa kruz no loron nasionál juventude, Amu Bispu Dioseze Baucau Dom Leandro Maria Alves  husu joven sira buka relembra juventude loriku aswain ne’ebe ho aten-barani luta hasoru inimigu no oferese aan ba mate hodi Timor  hetan ukun rasik aan.

Amu Bispu Dioseze Baucau Dom Leandro Maria Alves  hateten, iha momentu akontesimentu masakre santa kruz joven barak mak involve hodi oferese sira nia aan atu liberta nasaun ne’e hosi kolonializmu sira.

“Ohin selebra loron juventude no masakre santa kruz, tamba masakre santa kruz joven barak mak involve aan, nune’e joven sira uluk ne’e buka estratejia no oferese sira nia aan atu liberta ita nia nasaun husi maluk sira ne’ebe mai atu ukun ita”. Dehan Bispu Dioseze Baucau Dom Leandro Maria Alves  ba SAPNews iha Luro, 12/11/2024.

Bispu Dioseze Baucau ne’e husu ba joven sira hodi relembra loriku aswain no joven sira nia hahalok ne’ebe ho aten-barani hodi ko’alia katak loron ida Timor sei ukun rasik aan. Timor haketak aan ona ho inimigu sira, nune’e buka oinsa bele priense ukun rasik aan ne’e ho oportunidade no hahalok ne’ebe maka diak.

“Agora ita mos buka atu iha ita nia moris loron-loron hanesan joven, buka relembra ita nia loriku aswain no joven sira nian hahalok ne’ebe maka ho aten-barani tebtebes hodi dehan katak loron ida ita sei hetan ukun rasik an”. Bispu Dom Leandro husu.

“Agora ita hetan ukun rasik aan ona, buka atu oinsa bele priense ukun rasik aan ne’e ho oportunidade no hahalok ne’ebe maka diak. Hanesan joven buka atu hases hosi violénsia sira tanba ita nia maluk sira uluk sira husik hela mai ita hodi buka hadomi paz no moris iha hakmatek nia laran”. Nia hatutan

Biaspu Dom Leandro Maria Alves

Dom Leandro nafatin husu ba joven sira hodi kria espiritu nasionálismu liu hosi hari’i paz, hatudu hahalok domin nian no haree malu hanesan maun alin hosi rai Timor-Leste.

“Husu ba joven sira hotu buka atu kria espiritu nasionálismu, maibe atu hadomi ita nia nasaun ne’e liu hosi saida? Liu hosi hari paz, hahalok ne’ebe maka diak, hahalok donin nian, haree malu hanesan maun alin no oan hosi rai ida ne’e”. Nia subliña.

Joven mak esperansa nasaun nian, nune’e tau esperansa iha joven sira no hein katak sira buka hodi priense oportunidade independénsia ho hahalok ne’ebe diak no buka estuda hodi hariku sira nia an ho matenek hodi nune’e iha futuru mai bele ukun nasaun Timor-Leste ho diak.

“Joven sira maka ita nia esperansa no nasaun nia esperansa, nune’e ita tau esperansa iha joven sira no hein katak sira atu buka prense oportunidade independensia ida ne’e ho hahalok ne’ebe maka diak ho matenek, buka atu estuda hodi hariku sira nia an ho matenek atu aban bairua bele ukun ita nia rai ho diak”. Nia akresenta.

Ligadu ho prezensa Madre Kogregasaun Irmã Santa Ana iha Parokia Luro, Bispu Dom Leandro konsidera prezensa madre sai hanesan grasa ida iha sarani sira nia leet.

“Hanesan iha leitura fó hanoin ona mai ita no ita hatene katak prezensa madre sira nian ne’e sai hanesan grasa ida mai iha ita leet, buka hodi kolabora no aproveita grasa ne’ebe Maromak haraik mai ita liu hosi Madre sira nia prezensa, buka atu prense oinsa? Buka atu prense ho matenek ne’ebe maka Maromak haraik mai ita liu hosi sira”.Nia dehan

Nune’e buka hodi kolabora no aproveita grasa ne’ebe Maromak haraik ona liu hosi Madre sira nia prezensa. Buka oinsa bele servisu hamutuk hodi apoiu sira hala’o knaar ho diak hodi tulun sarani sira liu hosi servi nasaun no igreza.

“Buka hodi kolabora no servisu hamutuk no apoiu sira atu hala’o knaar ho diak hodi tulun ita servi duni ba Nasaun no igreza”. Bispu Dom Leandro do Amaral hakotu

Bispu Baukau ne’e inaugura Konventu Kongregasaun Irmã Santa Ana ne’ebé medida 33 x 11, konventu ne’e hari’i ho orsamentu hamutuk rihun $ 259. 800 resin ne’ebé kompleta ho kuartu, salaun, kapela, biblioteka, dapur no baranda.

Jornalista : Denília Soares