Lansa Suku Digital, Komunidade Bemori Fo Agradese Ba SEKomS & Husu Asegura Nia Sestentabilidade
Imajem : Edital
SAPNewsTL, Díli – Komunidade Suku Bemori, Postu Administrativu Nain Feto, Munisípiu Díli, manifesta sira-nia ksolok no agradesimentu ba Sekretaria Estadu Komunikasaun Sosiál (SEKOMS) tanba organiza formasaun no lansa Plataforma Suku Dijital hodi hasa’e asesu ba informasaun no servisu públiku liuhusi teknolojia dijital.
Sekretáriu Estadu Komunikasaun Sosiál(SEKOMS), Expedito Loro Diaz hateten, programa ne’e realiza tuir pedidu husi lideransa no komunidade Suku Bemori, no sai parte husi programa Governu atu dezenvolve Sentru Informasaun iha suku sira.
”Ha’u hakarak fó parabéns ba Xefe Suku Bemori. Tuir pedidu komunidade, IX Governu Konstitusionál liuhusi SEKOMS mai lansa Plataforma Suku Dijital ne’ebé tama iha programa Sentru Informasaun.” dehan Sekretáriu Estadu Komunikasaun Sosiál ba jornalista sira iha Suku Bemori, sexta-feira 17/07/2026.
SEKOMS hatutan, Suku Bemori sai parte ida iha kapitál Díli ne’ebé hetan Plataforma Suku Dijital, no Governu kontinua expanda programa ne’e ba suku seluk iha futuru.
”Suku Bemori tama mós iha lista suku sira iha Díli, ne’ebé hetan Plataforma Suku Dijital. Tuir planu Governu, ami hakarak expanda programa ne’e ba suku atus ida, (100), no to’o ohin ami lansa ona iha suku sanulu resin lima(15).”
Sekretáriu Estadu haktuir lansamentu ne’e hetan apoiu husi autoridade munisípiu, Postu Administrativu Nain Feto, Komandante Polísia Eskuadra, xefe aldeia sira no komunidade, tanba teknolojia bele fasilita komunikasaun no asesu ba informasaun.
”Lansamentu ne’e hetan apoiu husi autoridade munisípiu, Postu Administrativu Nain Feto, Komandante Polísia Eskuadra, xefe aldeia sira no komunidade. Agora daudaun, lideransa suku la presiza halo avizu ho maneira tradisionál de’it. Liuhusi Plataforma Suku Dijital, sira bele fó sai informasaun kona-ba dezenvolvimentu suku ba komunidade ho lalais.”
Nia esplika, plataforma ne’e la’ós de’it fó informasaun, maibé mós fasilita sidadaun sira asesu ba servisu administrativu hanesan deklarasaun, dokumentu no númeru kontaktu importante sira.
”Objetivu husi programa ida ne’e mak atu fasilita komunidade asesu ba servisu administrativu hanesan deklarasaun, dokumentu no númeru kontaktu importante sira, liuhusi Plataforma Suku Dijital.”
Molok hala’o lansamentu, SEKOMS organiza formasaun durante loron haat ba joven sira ne’ebé sei halo jestaun plataforma dijital iha suku. Iha loron ikus, partisipante sira simu sertifikadu hanesan rekonesimentu ba sira-nia partisipasaun.
SEKOMS mós informa, Governu servisu hamutuk ho Ministériu Transportes no Komunikasaun, Ministériu Edukasaun no operadór telekomunikasaun hodi promove literasia dijital no dezenvolvimentu jornal parede dijital iha eskola no komunidade sira.
Nia mos husu komunidade atu uza media sosiál no plataforma dijital ho étika, moral no responsabilidade atu evita konflitu no informasaun sala.
Iha fatin hanesan, representante partisipante formasaun, Castro Afonso, apresia programa ne’e no husu atu governu aumenta durasaun formasaun atu joven sira bele aprofunda koñesimentu kona-ba teknolojia dijital.
”Ami Apresia programa ne’e maibe ami husu atu formasaun hanesan ida ne’e bele hala’o naruk liu tan, atu joven sira bele aumenta sira-nia kapasidade iha área dijital.”
Xefe Suku Bemori, Francisco Siqueira, agradese ba SEKOMS tanba hili Suku Bemori sai fatin lansamentu Plataforma Suku Dijital.
”Komunidade simu programa ida ne’e ho kontente. Agora ami bele uza Plataforma Suku Dijital atu fó sai informasaun kona-ba atividade no dezenvolvimentu iha suku, programa ne’e sei ajuda komunidade asesu ba informasaun no promove transparénsia iha administrasaun suku.”
Siqueira hatutan, rekursu umanu sei sai dezafiu boot, tan ne’e nia parte husu SEKOMS atu kontinua organiza formasaun ba jestor sira kona-ba Plataforma Suku Dijital iha futuru.
”Ami husu nafatin atu bele iha formasaun tan kona-ba jestaun Plataforma Suku Dijital, tanba rekursu umanu importante atu garante programa ida ne’e la’o di’ak.”
