Lamenta Uza Logo Partidu Ba Deklarasaun Privadu ! CNRT Solidariza AMA & Suspende João Hosi Sekretariu Ezekutivu

Imajem : Estrutura Partidu CNRT Munisípiu Aileu realiza Konferénsia Imprensa iha Aileu, 20/07/2026.

SAPNewsTL, Aileu – Koordenadór Partidu CNRT Munisípiu Aileu, Rogério Araújo Mendonça, lamenta utilizasaun logo no atributu Partidu CNRT, inklui asinatura husi kuadru polítiku partidu, iha karta deklarasaun pesoál entre João Bosco dos Santos no Alda Maria Alves.

‎‎“Ho situasaun ne’ebé akontese resentemente, ne’ebé envolve utilizasaun logo Partidu CNRT nian no asinatura husi kuadru polítiku Partidu CNRT ba iha karta deklarasaun pesoál entre Sr. João Bosco dos Santos ho Sra. Alda Maria Alves, ha’u konsidera situasaun ne’e lamentável tebes.” dehan Koordenadór CNRT Munisípiu Aileu, Rogério Araújo Mendonça, ba jornalista sira liu husi Komunikado Imprensa iha Sede CNRT Aileu Segunda-feira 20/07/2026.

‎‎Rogério hatutan, deklarasaun entre JBS & AMA konsidera asuntu privadu no la iha relasaun ho Partidu CNRT,  no la iha koñesimentu kona-ba asuntu refere.

‎‎“Deklarasaun entre Sr. João Bosco dos Santos ho Sra. Alda Maria Alves konsidera asuntu privadu no la involve Partidu CNRT. Ha’u rasik, nu’udar Koordenadór Partidu CNRT Munisípiu Aileu, laiha koñesimentu kona-ba asuntu refere.” Nia Informa

‎‎Koordenadór CNRT Munisípiu Aileu sublina, utilizasaun atributu no logo partidu ba interese pesoál konsidera kontra Estatutu Partidu CNRT. Tanba ne’e, bainhira sira rona no simu keixa husi Alda Maria Alves, estrutura CNRT Munisípiu Aileu deside hodi realiza Komunikado Imprensa.

‎‎“Partidu CNRT Munisípiu Aileu observa katak utilizasaun atributu ka logo Partidu CNRT nian ba interese pesoál kontra tebes Estatutu Partidu CNRT. Tan ne’e, depois rona no simu keixa husi vítima, ami hola desizaun atu estrutura CNRT Munisípiu Aileu hamutuk ho estrutura iha Postu Administrativu haat (4) deside hala’o konferénsia imprensa.”

‎‎Partidu CNRT rekoñese partisipasaun feto nu’udar elementu importante ba dezenvolvimentu nasionál, igualdade jéneru no prosesu foti desizaun, tantu iha estrutura partidu nia laran no iha setór oioin iha sosiedade.

‎‎“CNRT nu’udar partidu polítiku ida ne’ebé rekoñese katak partisipasaun feto esensiál tebes ba dezenvolvimentu nasionál no sosiedade ne’ebé justu liu, hodi promove igualdade jéneru no partisipasaun ativu feto nian iha prosesu foti desizaun, tantu iha estrutura partidu nia laran no iha setór oioin iha sosiedade.” nia subliña.

‎‎CNRT Munisípiu Aileu, solidariza ho situasaun ne’ebé Alda Maria Alves enfrenta no prontu atu akompaña prosesu refere.

‎‎“Ho estrutura Partidu CNRT Munisípiu Aileu nia naran, ami solidariza ho situasaun ne’ebé Sra. Alda Maria Alves enfrenta no ami komprometidu atu akompaña ho besik liután situasaun ida-ne’e.” Nia afirma.

‎‎Koordenadór ne’e salienta estrutura partidu sei enkaminha keixa husi Alda Maria Alves ba Komisaun Polítika Nasionál (CPN) no Komisaun Juridisaun Partidu CNRT iha nivel nasionál, atu loke prosesu tuir Estatutu Partidu.

‎‎“Ha’u hakarak subliña liután katak ami sei aprezenta situasaun refere, inklui enkaminha keixa husi vítima ba Komisaun Polítika Nasionál (CPN) no Komisaun Juridisaun Partidu CNRT iha nivel nasionál, atu loke prosesu bazeia ba Estatutu Partidu CNRT nian.”

‎‎Rogério mós refere ba Artigu 18, alínea 1, Estatutu Partidu CNRT kona-ba sansaun, ne’ebé regula katak membru partidu bele hetan sansaun ka kastigu disiplína, se halo hahalok ne’ebé prejudika ka viola prinsipiu sira Partidu CNRT nian.

‎‎Partidu CNRT Munisípiu Aileu hamutuk ho estrutura iha Postu Administrativu haat (4) deside suspende João Bosco dos Santos husi pozisaun nu’udar Sekretáriu Ezekutivu Munisípiu Aileu, enkuantu hein prosesu investigasaun husi Komisaun Jurisdisaun Partidu CNRT.

‎“Estrutura Partidu CNRT Munisípiu Aileu hola desizaun hodi suspende Kompañeiru João Bosco dos Santos husi pozisaun nu’udar Sekretáriu Ezekutivu Munisípiu Aileu, hodi loke prosesu investigasaun husi Komisaun Jurisdisaun. Durante períodu suspensaun bandu, atu la hola parte iha atividade Partidu CNRT nian, enkuantu hein desizaun husi Komisaun Polítika Nasionál (KPN).”