19 Jullu, Abertura Jogu CPLP ! PNTL Husu Jovens Kontribui Ba Paz
Imajem : Koordenador Komisaun Organizador Jorge Cristovão iha CCD, 09/07/2025
SAPNewsTL, Dili: Polisia Nasional Timor-Leste (PNTL) husu ba joven sira kontribui paz ba jogu CPLP iha Timor-Leste tanba PNTL sei garante seguransa masimu hodi asegura jogu la’o diak to’o remata.
Augusto dos Santos – SAPNewsTL
“Jogu CPLP ne’e espesialmente ba povu Timor-Leste atu asegura relasaun ho nasaun sira seluk iha CPLP, tan ne’e husu ba lider komunitariu sira hotu espesial ba joven sira hotu-hotu atu kontribui paz no estabilidade ba eventu internasional entre nasaun CPLP. ” dehan Komandante Operasaun PNTL Justino Menezes ba jornalista sira iha CCD Merkadu Lama, Dili kuarta (09/07/2025).
Komandante ne’e husu ba lider komunitariu sira atu informa ba sira-nia joven sira bainhira jogu CPLP la’o, sira mai hare’e ho dixiplina, kumpri regra sira ne’ebe PNTL sei utiliza iha fatin eventu sira.
“Nune’e labele hamosu problema ka krime sira hodi hatudu katak Timor-Leste seidauk bele sai uma nain ba jogu internasional sira tanba la kleur tan Timor-Leste mos sai membru ba ASEAN, hein katak eventu ida ne’e bele hatudu Timor-Leste nia maturidade sai nu’udar nasaun indenpendente ida ne’ebe bele ona”.
“Ita prepara ona membru lubuk asegura jogu CPLP, ita servisu hamutuk ho parte F-FDTL, Saude, bombeiru, seguransa sivil sei kontribui para asegura jogu ne’e, iha sabadu no domingu ita sei halo simulasaun ba fatin eventu nian, tan ne’e PNTL garante situasaun sei la’o diak” tenik Justino
Nia Salienta tan, jogu CPLP rasik abertura iha loron 19 to’o loron 26 fulan jullu 2025 maibe delegasaun husi nasaun neen mai Timor-Leste hahu iha loron 14 fulan jullu 2025. Tan ne’e PNTL prepara ona planu ba seguransa nian mak ohin enkontru ho parte komisaun hodi atualiza fatin no orariu atu bele halo junta operasaun ba tarefa forsa PNTL nian ba fatin hotu-hotu ne’ebe eventu sei la’o.
Iha fatin hanesan, koordenador komisaun organizador Jorge Cristovão hatete, ohin sira halo enkontru ho parte PNTL liu husi segundu komisáriu no komandante operasaun ko’alia ba seguransa ba jogu CPLP iha Timor-Leste.
“Ohin, ami halo enkontru ho parte PNTL liu husi segundu komisariu no komandante operasaun ko’alia seguransa ba jogu CPLP iha Timor-Leste tanba ohin loron ita foin hatene total delegasaun husi nasaun hitu inklui Timor-Leste nain-520 sei partisipa iha jogu CPLP ne’e”, Jorge dehan
Jorge afirma tan, ohin mos halo diskusaun ho parte PNTL, oinsa sira halo seguransa durante jogu la’o tanba abertura sei realiza iha tempu kalan.
Nasaun hitu Partisipa iha jogu CPLP 2025 maka Timor-Leste, Moçambique, Cabo Verde, São Tome e Principe, Cabo Verde, Angola no Portugal.