+670 : Povu Hari’i, Governu Sobu ! Komunidade Hela Iha Ponte Okos
Imajem : Komunidade Rosalia da Silva iha Ponte Kofi Anan nia okos, Fomentu II, Comoro,07/01/2025. Foto : Clementino Bragança Machado
SAPNewsTL, Dili : Sekretariu Estadu Asuntu Toponomia no Organizasaun Urbana (SEATOU) Germano Santa Dias Brites ho ekipa hala’o despezu administrativa ba komunidade Fomentu II hamutuk Uma-Kain 288, eviksaun ne’e rezulta komunidade Uma-Kain 7 hela deit iha ponte Kofi Anan okos ho laran triste.
Komunidade Rosa da Silva sente triste no la aseita ho aktu SEATOU tanba governu hasai sira sein kria kondisaun ruma, nune’e obrigatóriu sira tenki hela deit iha ponte Kofi Anan nia okos ho labarik kiik no inan isin rua sira.
“Ami sente triste tanba governu hasai ami la ho kondisaun, haruka ami hodi husik hela fatin maibe la kria kondisaun ba ami, ami familia ida hamutuk na’in 9 tenki mai hela iha ponte okos tanba laiha fatin seluk ba ami hodi hela”. Tenik komunidade Rosalia da Silva ba SAPNews iha ponte Kofi Anan Fomentu II, 07/12/2024
Rosalia hatutan, uma ne’ebe sira konstrui mai hosi rendimentu pineira rai henek, mahon ne’e uza hodi buka moris no oan sira hela ba eskola.
“Ami hari’i uma ne’e liu hosi rendimentu suru rai henek no faan sasan, ami uza uma ne’e hodi hela, buka moris no oan sira ba eskola, iha loron 2 Janeiru governu mai haruka sai entaun ami uma kain 7 mak deside mai hela hamutuk ponte okos”.Nia informa
Rosalia da Silva
Rosalia deklara, sira prontu hodi husik hela fatin no fila fali ba munisipiu maibe governu presiza tulun no fasilita tanba sira laiha kbiit hodi fila ba rai moris fatin.
“Ami hakarak ba maibe ami husu governu hodi tulun netik ami iha situasaun ida ne’e”.
Iha fatin hanesan, Jose da Costa deklara sei la husik fatin wainhira governu la fasilita sira hodi fila ba munisipiu.
“Ami sei la hamamuk fatin ne’e, wainhira governu la lori ami ba munisipiu (Maliana-Bobonaru), iha munisipiu ami iha rai maibe tenki lori ami to’o fatin ne’ebe atu hela”. Nia deklara
Jose dos Santos
Jose husu ba governu hodi tau matan ba nia oan na’in rua ne’ebe estuda ona iha banku ensinu supeior tanba laiha ona fatin ba sira hodi hela ba eskola.
“Ha’u iha oan hamutuk na’in 5, na’in rua mak estuda ona iha universidade, tan ne’e ha’u husu ba governu hodi tau matan ba ha’u nia oan sira tanba laiha fatin ba sira hodi hela”. Nia husu
Ativista Rio Araujo konsidera governu liliu SEATOU kontra direitu ema nian tanba halo eviksaun sein kria kondisaun hodi halo labarik no inan feton sira hela no toba deit iha ponte okos.
“SEATOU viola direitus humanus tanba sidadaun iha direitu ba moris, hela fatin no direitu ba eskola, enkuantu halo eviksaun sein prepara kondisaun hodi husik hela labarik, inan feton no inan isin rua sira hela iha ponte okos, ho ita adopta konvensaun bar-barak husi internasional maibe ikus ita kontra nafatin”.
Entrevista Ativista Rio Araujo
Rio Araujo husu ba governu hodi tau matan no tulun komunidade afetadu sira hotu liliu komunidade sira ne’ebe hela iha ponte okos.
“Governu liliu SEATOU no MSSI presiza fo atensaun ba komunidade sira ne’ebe afetadu liliu sira ne’ebe oras ne’e hela iha ponte okos”. Nia husu
“Lei iha tanba povu, povu iha tanba lei, tanba ne’e governu liliu SEATOU hodi kordena ho MSSI tenki fo apoiu urugente ba sira molok kria kondisaun”.Rio subliña
Antes ne’e SEATOU Germano Santa Dias Brites hateten, governu fo hatene ona liu hosi halo dialogu ho komunidade hodi koopera no hamamuk fatin, nune’e bele hela dook hosi risku.
“Laos ohin deit mak ita foin mai, dezde tinan kotuk ita halo ona diálogu hamutuk ho komunidade sira, husu atu koopera hodi muda no hela do’ok hosi mota-ninin tanba fatin ne’e risku ba akontese inundasaun iha tempu udan”.
“Se mak lakohi koopera no ulun to’os lakohi muda sai, ne’e sira nia problema, problema ba ekipa mak atu salva sira hosi fatin risku ne’e, se mota tuun mai sobu, mota sei la husu atu halo diskusaun ba demokrasia iha mota laran, demokrasia diskute iha nia fatin, importante ba Ekipa mak atu salva imi nia vida. “Tenik Germano
Imajem : Uma Afetadu Despezu Administrativu Iha Aldeia Fomentu II, Suku Comoro, Dom Aleixo Munisipiu Dili.
Iha inísiu tinan foun, 01 Janeiru 2025, akontese tan inundasaun fó impaktu maka’as tebes ba bee tama uma laran no rai-halai hodi rejulta ai-rin uma tohar no monu-tun kauza hosi udan boot
“Ita husu sira tenki koopera ho ekipa konjunta SEATOU hodi hamamuk hela fatin no muda hosi fatin refere tanba sorte iha ne’e mota estraga de’it sasan”.
“Governu mós prepara karreta tula sira ba sira-nia nia fatin, se husi Munisípiu kareta tula hela sira ba”.
“Kompañia hadia moru protesaun para deit iha leten, tanba sira hela iha mota-ibun ne’e la kohi sai husi fatin, tanba ne’e mak ohin ekipa mai halo servisu, Ita husu obrigatoriamente, sira sai husi fatin ne’e, ohin ne’e ba oin, fatin sira tenki hamamuk, ita atu hadi’a fatin ne’e”.
Tuir dadus ne’ebe SAPNews asesu katak komunidade afetadu ba eviksaun no risku dezastre natural ne’ebe identifikadu hodi husik hela fatin iha area Fomentu II Suku Comoro hamutuk atus rua ualunulu resin-ualu (288) no Suku Bebonuk hamutuk 31.
Fo hanoin fali katak, asaun eviksaun ne’e mosu tanba iha loron 1 Fulan Janeiru 2025 udan boot rezulta mota tama uma komunidade ne’ebe hela iha fatin risku ka mota laran.
Tuir observasaun SAPNews iha terrenu nota katak despezu administrativa ne’e sobu uma mutin barak no uma andar hirak ne’ebé komunidade sira konstrui ho sira nia kasar-ween, sakrifisiu no dedikasaun tomak.
Komunidade sira arruma ona sira nia sasan no tula ba karreta hodi lori fila ba hela iha munisipiu no fatin ne’ebe sira rasik prepara ona inklui hela ho vizinu no kos.
Ekipa despezu administrativa ne’e lidera hosi Secretário de Estado dos Assuntos Toponímia e Organização Urbana (SEATOU), Germano Santa Brites Dias, akompaña hosi Diretora Geral Toponímia no Organizasaun Urbana (DG-TOU), Maria Odete Barros Florindo hamutuk ho Autoridade Munisípal Díli (AMD), Autoridade Protesaun Civil (APC), Ministerio Obras Públikas (MOP), IGEADI no hetan apoiu seguransa hosi Polisia Nasional Timor Leste (PNTL).
Jornalista : Ekipa Kobertura
