Rezeita Atu Hamutuk ! Alkatiri Konsidera Governu Dasia Dodok Ona

SAPNewsTL, Díli – Durante komemora Loron Konsulta Popular ba dala XXV, Loron FALINTIL no OPMT ba dala XLIX. Sekretáriu Jeral Partidu Frenti Revolusionario Timor-Leste Independente (FRETILIN) Mari Bin Amude Alkatiri, konsidera Governasaun dasia ne’ebe lidera husi Primeiru-Ministru Kay Rala Xanana Gusmão dodok ona tanba ne’e nia rezeita atu hamutuk, se la rekunhese erru no asume erru ne’ebe halo iha passadu.

Iha diskursu Sekretáriu Jeral Partidu FRETILIN Mari Bin Amude Alkatiri hateten nia parte rezeita atu hamutuk, se ida-idak lakohi atu rekunhese no asume ba erru ne’ebe komete iha passadu, ema hotu tenki aprende husi erru hodi hateke ba oin.

“Ha’u rezeita tomak, kuandu kamarada sira dehan imi leten tenki hamutuk, dalan ne’ebé liu ba ne’e la hanesan ho sira seluk nian, ita bele hamutuk agora, se ida-idak tenki arrepende no asume nia passadu para hakuak malu fali, labele tau passadu ba kotuk atu haluha fali, aprende hosi erru no asume hosi erru sira, hamutuk para ita hateke ba oin”.Dehan Sekretariu Jeral Partidu FRETILIN Mari Alkatiri liu husi nia diskursu iha CCF Fatuhada, (31/08/2024).

Mari Bin Amude Alkatiri hateten, nia parte senti emosaun, tanba iha ambitu selebrasaun konsulta popular ba dala XXV Governasaun dasia manipula historia Timor-Leste hodi prioritiza bandeira CNRT rezistensia dada iha fatin-fatin.

“Bandeira CNRT ita hotu nian, ita hotu uluk liu hosi dala ida ne’e mak ba vota, labele iha ema ida manipula ida ne’e, FRETILIN laiha, Laiha FALINTIL, laiha 20 Agustu no 30 Agustu, FRETILIN laiha, laiha 15 Agustu Ressurreisaun jeral armada, FALINTIL moris iha Aileu, fundador ba FALINTIL mak Nicolau Lobato, Marí Alkatiri, Lere Anan Timur no Alarico Fernandes, laiha tan ema seluk ne’ebe lalika inventa, istória tenki tau iha fatin”.

“Hori-kalan (30/08) ita asiste negasaun ba istória, manipulasaun ba istória, enkuantu ha’u sei moris, ha’u sei ko’alia nafatin, ha’u husu ba sentru leste atu labele manipula istória, kapitál simbóliku ba independénsia rai ida ne’e iha rua mak FRETILIN no FALINTIL”. Alkatiri deklara

Fundador FALINTIL Mari Bin Amude Alkatiri, konsidera Governasaun dasia ne’ebe lidera husi Primeiru-Ministru Kay Rala Xanana Gusmão dodok ona tanba ne’e nia rezeita atu hamutuk, se la rekunhese erru no asume erru ne’ebe iha passadu.

“Kamarada sira hakarak ga lakohi Governasaun ida agora ne’e dodok ona, ne’e ha’u mak dehan, ne’e mak aproveita Santu Padre nia vizita hodi sobak buat hotu-hotu, atu manipula buat hotu, ha’u bele dehan aproveita vizita Papa Fransisco nian para papar tudo. 150 mihoens dolar iha ajustu direta, afinal vizita Papa Francisco nian sai fali emerjénsia, maske la’os kalamidade maibé ita transforma buat ne’e ba kalamidade”. Dehan Sekretariu Jeral Partidu FRETILIN

Eis Prezidente Autoridade Região Administrativa Espesiál Oe-Cusse Ambenu ne’e fundamenta, Governasaun dasia halo ajustu diretu husi Tutuala to’o Oe-Cusse ajustu direitu akontese hotu maibé Papa Francisco nia vizita pastoral no estadu la to’o iha munisipiu sira, maibé Governu kria ajustu diretu akontese iha munisipiu, uza 150 milhoens.

“Governasaun dodok ona, ita atu hamutuk para dodok ga oinsa, ita atu dodok ga ita atu tasak. se ita ba hamutuk ho ai-fuan ida ne’ebe dodok, ita mós sei dodok hotu, se ita lakoi sai dodok entaun ita tenki tasak” Tenik nia.

Eis Primeiru-Ministru Mari Alkatiri fundamenta prátika governasaun dasia prioritiza asuntu oi-oin hodi halo ajustu diretu akontese iha fati-fatin, povu mak sei kore nia an, FRETILIN sei hamutuk ho povu hodi lori naroman ba povu.

“Ita tenki hatene iha povu nia le’et, hamutuk ho povu, povu mak sei kore nia an, hamutuk ho povu lori povu ba naroman, ne’e mak ita nia funsaun, se povu kore nia an, ita mós sei kore ita nia an, tamba iha mudansa ba mentalidade ne’e mak iha prosesu lori moris diak ba povu, ita hamutuk ho povu para hasai povu husi kiak no mukit, laos lulun povu no sobu povu nia uma, tanba atu halo estrada oi-oin”. Nia sublinha

Entretantu, iha serimónia komemorasaun 49⁰ anos OPMT no FALINTIL inklui selebrasaun aniversáriu konsulta popular ba dala 25⁰ ne’e partisipa husi Presidente Partidu FRETILIN Fransisco Guterres Luolo, Sekretáriu Jeral Mari Bin Amude Alkatiri, Tanente Jenderal reformadu Lere Anan Timor, kuadrus no militantes sira.

Jornalista : Marciana da Conceição & Conzita Mota