Eis Professor Kontratadu Kontinua Husu ME Loke Diálogu
Imajem : Eis Professores Kontratadu sira iha Jardim 5 Maiu, 16/09/2024.
SAPNewsTL, Díli — Eis profesores kontratadu kontinua ezije Ministra Edukasaun (ME) Dulce de Jesus Soares, atu kria dialogu hodi fó solusaun ba problema profesores kontratadu sira ne’ebe la renova kontratu tuir lei estatutu kareira dos profesores.
Portavos Agustinho Pinto hateten, ekipa profesores kontratadu, kontinua ezije sira nia direitu ba Ministeriu Edukasaun no husu Ministra Dulce de Jesus Soares, atu iha vontade tur hamutuk ho profesor sira hodi buka solusaun ne’ebe justu.
“Ami Profesores sira nafatin hetan diskriminasaun ba injustisa ida ne’e, tuir dekretu lei regula profesor sira hatete momos katak professor iha direitu tomak tuir lei atu ba ona ingresu espesial no mos sira ne’ebe la prense rekejitus atu hetan kontratu indetermina tuir lei estatutu kareira dos profesores”.Dehan Portavos Agustinho Pinto liu husi Komunikadu Imprensa ne’ebe hala’o iha Jardin 5 de Maio (16/09/2024).
Nia salienta, profesores kontratadu sira ne’ebe la hetan renovasaun kontratu hato’o ona karta pedidu dialogu hodi husu Ministra Edukadaun atu iha vontade tur hamutuk ho profesor sira hodi buka solusaun ne’ebe justu tuir lei estatutu profesores.
“Ami mos kaer hela mensajen ne’ebe Lider karismatiku Kairala Xanana Gusmao, ne’ebe fo sai katak Povu mak terus, povu mak ukun, povu mak manan funu, inklui profesores balun mos fó votus ba ukun rasik’an tanba ne’e, hanoin katak profesores sira la merese hetan diskriminasaun iha rai da ne’e”. Nia sublinha
Aleinde ne’e mos (PN) Parlamento Nasional hasai ona rezolusaun ida atu resolve problema refere. Nune’e mos informasaun seluk husi parte Gabinete Primeiro Ministro (PM) katak iha ona desijaun no hato’o ona karta ida ba Ministra Edukasaun atu resolve problema ne’ebe profesores sira enfrenta”,Tenik nia.
Nia argumenta, karik pedidu refere la hetan resposta husi Ministra Edukasaun, maka profesores sira sei kontinua ejije problema refere ba Ministeriu Edukasaun atu loke dalan dialogu, karik la iha dalan dialogu nafatin maka profesores sei mobiliza malu, no sei konvida mos inan aman no Universidade sira hamutuk atu ejije ba Ministeriu Edukasaun atu bele resolve problema refere.
Enkuantu, eis professora kontratadu Domingas Ana Paula afirma, nia parte hahu kontribui ba Ministeiru Edukasaun hanesan profesores iha tinan 2012 to’o ohin loron, tamba ne’e nia parte husu ba Ministra valoriza kontribuisaun ne’ebe profesores sira kontribui ona.
“Iha tinan rihun rua sanulu resin rua to’o ohin loron, ha’u hanesan professora ida tanba ne’e husu ba Ministra Edukasaun atu valoriza netik profesores sira nia direitu nu’udar manorin, ne’ebe durante ne’e sakrifisiu tinan barak ona, no ami la’os mai atu halo problema maibe ezije ami nia direitu.”
Entretantu, profesores kontratadu hamutuk atus rua resin ne’ebe mai husi Munisípiu 13, la hetan renovasaun kontratu ameasa Ministra Edukasaun katak karik laiha solusaun ba problema refere, maka profesores kontratadu sira sei mobilija inan aman no Universidade sira hodi halo asaun pasifiku kontra Ministeriu Edukasaun.
Jornalista: Geronimo da Purificação