Alkatiri Apresia Traballador Timoroan Iha Inglaterra, Apoia Ekipamentu Ba SAPNews

Imajem : Eis Primeiru Ministru Marí Alkatiri entrega sertifikadu apresiasaun ba familia Franzelino da Conceição ne’ebe apoia ekipamentu ba media SAPNews iha Salaun Balide, 26/02/2025. Foto : Jufer Guterres

SAPNewsTL, Dili : Eis Primeiru Ministru Marí Bin Amude Alkatiri apresia Francelino da Conceição hanesan traballador timoroan iha United of Kingdom ne’ebé apoiu ekipamentu live streaming ba SAPNews.

Hafoin família entrega ba SAPNews Liu hosi Sekretariu Estadu Komunikasaun Sosial (SEKOMS) Expedito Dias Ximenes, Eis Primeiru Ministru Marí Alkatiri entrega sertifikadu apresiasaun hosi SAPNews ba família doador Franzelino da Conceição.

Mídia SAPNews nu’udar plataforma online ida ne’ebé harí husi estudante universitáriu no formandu jornalizmu, mai ho nia natureza ne’ebé úniku, hoi ispiritu nasionalizmu no voluntarizmu. Tinan ne’e SAPNews mai ho tema, “Renova Komprimísiu! Hamriik Ain Leten, SAPNews ba Profesionál”.

Iha diskursu, Eis Primeiru Ministru Mari Bin Amude Alkatiri fo agradese no apresiasaun ba Franzelino da Conceição tanba bele iha hanoin diak hodi apoia joven sira iha SAPNews.

“Média mosu tanba iha kauza ida, hanesan uluk ami iha 1974-1975, ami hamrik ho FRETILIN tanba iha kauza ida, ohin ha’u nia oan sira iha SAPNews halo ida ne’e, imi halo tinan tolu, imi foku ba setor saúde, edukasaun no dezenvolvimentu sustentável”.

“Apresia tebes ba família sira, traballador timoroan ida ne’ebé servisu iha Inglaterra hodi apoia SAPNews, apoia foinsa’e sira ne’e diak tebes, parabens ba imi hotu”. Tenik Eis Primeiru Ministru, Atual Sekretáriu Jeral Partidu FRETILIN iha Salaun Institutu Supeior Cristal Balide,26/02/2025

Imajem : Presidente SAPNews Clementino Bragança Machado

Iha fatin hanesan, Prezidente SAPNews sente gratitude no agradese ba traballador timoroan Franzelino da Conceição tanba bele tulun no tau matan ba SAPNews liu hosi apoia ekipamentu live streaming.

Desde tinan 2022, SAPNews hala’o atividades kobertura ho de’it telefone no limitasaun iha buat oioin em termos ekipamentus no finanseira. Maibé hirak ne’e hotu nu’udár prosesu teste ida ba SAPNews.

“Tinan ida ne’e felizmente Família boot mídia SAPNews konsidera nu’udár tinan grasa nian, ne’ebé hetan apoia doasaun pakote ekipamentus live streaming nian husi Família boot Francelino da Conceição ne’ebé ho laran luak no laran kmaus, hodi apoia SAPNews”.

“Maske ho kuantidade ne’ebé ki’ik mas ami konsidera ida ne’e nu’udár grasa boot ida mai husi Nai Maromak atravéz Francelino da Conceição, Traballadór Timoroan ida ne’ebé ho nia kosar been rasik iha boa vontade hodi apoia ami. Ami nia agradesimentu no orasaun mais klean ba ita ho Família, dezeju bom traballu ba ita boot Nai Maromak Haraik bensaun ba ita”. Clementino Bragança Machado sublinha

SAPNews hola papel importante hodi rekolla no publika informasaun sira, nu’udar fontes informasaun ida atu hato’o ba makaer ukun sira hodi haree no rona povu ninia halerik no opiniaun ba desizaun polítika ne’ebe hatan ba interese povu no nasaun nian.

Nune’e selebrasaun ezisténsia ba dala tolu ida ne’e,  SAPNews sei garantia liberdade imprensa no espresaun iha mundu espesialmente iha rai doben Timor Leste. SAPNews sei sai profesionál, independente, imparsialidade no balansu iha ninia kobertura no publikasaun ba informasaun hotu-hotu tuir kondisoins mak iha.

“Ami komprimitidu sei hala’o serbisu ida ne’e ho neutru, independente, edukativu, inspirativu no profisionál tuir Konsituisaun RDTL, Lei Komunikasaun Sosial no Kódigu Étika Jornalista”.

Lider foinsa’e ne’e mós husu ba SEKOMS hodi fo atensaun ba média hothotu ho hanesan no garantia sustentabilidade mídia iha Timor-Leste.

“Ami husu ba SEKOMS hodi kontinua fo atensaun ba Media hothotu ho igual no apoia, nune’e bele garante kualidade informasaun, sustentabilidade orgaun komunikasaun no liberdade informasaun ba sidadaun ida-idak iha territóriu nasionál”.

“Husu mós ba konsellu imprensa hodi regulariza no monitoriza nafatin orgaun komunikasaun sosial hotu inklui kontinua fasilita formasaun ba jornalista sira hodi hadia kapasidade intelektual, tékniku no profisional tuir lei inan no lei oan sira”.

Serimonia entrega ekipamentu ne’e hetan akompanhamentu hosi parte governu liliu Sekretáriu Estadu Komunikasaun Sosial (SEKOMS) Espedito Dias Ximenes, Prezidente Konsellu Imprensa Otelio Ote no konvidadu sira.

Jornalista : Ekipa Kobertura