Riak Deklara Laiha Intensaun Fahe Povu Ba Loromonu & Lorosa’e

SAPNewsTL, Dili : Presidente Konsellu Kombatentes Libertasaun Nasionál (CCLN) Vidal de Jesus Riak Leman deklara nia parte laiha intensaun ho fahe povu ba loromonu no lorosa’e.

Lia hirak ne’e Presidente CCLN fo sai liu hosi komunikadu imprensa ne’ebé hala’o iha loron 6 fulan Marsu tinan 2025, iha Sede Conselho dos Combatentes da Libertação Nacional, Comoro – Dili.

Tuir textu komunikadu imprensa ne’ebé SAPNews asesu katak Estrutura Nacional CCLN foti desizaun hodi fó sai ba publiku kona ba hanoin balun hosi deklarasaun Major Jeneral Calisto dos Santos “Koliati” nian iha komunikadu imprensa, nia halo iha edificio Gabinete Ministro Assunto dos Combatentes da Libertação Nacional Komoro iha loron kinta feira 27 de Fevereiro 2025 katak :

1. Konsellu Kombatentes Libertasaun Nasional ho estrutura tomak fó sai katak Presidente Konsellu Kombatentes Libertasaun Nasionál ho kualidade Guerrilheiro 24 anos no nu’udar mos Secretário da Região 4, la iha intensaun fahe povu Timor-Leste ba rua Loron Monu ho Lorosa’e, Tamba Presidente Konsellu nia entrevista ne’ebe fó sai iha media fulan liu ba, ne’e sublina kona ba realidade wainhira base de apoiu rahun total iha Dezembro 1978, FALINTIL sira ho kuadros inferiores, médios ho superiors balun mak sei moris iha parte Lorosa’e.

Ho realidade ida ne’e mak lider sira iha tempu ne’eba konsegue halibur Grupo bolso de Guerrilha sira hotu hodi reorganiza funu no fahe Região Funu nian ba parte tolu iha CRRN nia mahon mak Região Funu Sei Nafatin, lidera husi Komandante Lere Anan Timur; Região Nakroma, Lidera husi Saudozu Saki Neri, Região Haksolok lidera husi Saudozu Ma’huno Bulerek Karatayhano; no ikus liu habelar Região Frente Armada ba haat sura ho Região Autonóma Dili to’o Referendo iha Agosto 1999.

2. Husu ba estrutura kúpula rezistênsia nian tomak hakbesik ba sede kada CMCLN iha Município sanulu resin rua inklui RAEOA ho maneira diak hodi tur hamutuk koalia hodi hato’o mai Nacional atu fo solusaun ba Kombatentes ho Veteranos sira nia problema;

3. Kombatentes ho Veteranus hotu hotu iha direitu no obrigasaun atu halo kontestasaun hasoru ema hirak ne’ebe falsifika dados la merese atu sai kombatente, ho faktus tuir prosedimentu legais hodi entrega ba sekretariadu kada CMCLN atu enkaminha ba Departamento Base de Dados MACLN nian;

4. Konsellu Kombatentes Libertasaun Nasional, la deskrimina ninia maluk kombatentes ida, tamba ne’e husu ba maluk ne’ebe sente diskriminadu, bele halo reklamasaun ho lolos atu hadía.

5. Konsellu Kombatentes Libertasaun Nasional, husu ba kombatentes ho veteranus hotu hotu liuliu maluk sira ne’ebe registu iha 2009, iha direitu tomak atu halo reklamasaun ho kontestasaun tuir prazu to’o 14 de Março 2025.

Antes ne’e, Ministru Asuntu Kombatetens Libertasaun Nasionál Gil da Costa Oan Soru hateten liafuan loromonu no lorosa’e ne’ebe Presidente CCLN Riak Leman dehan ne’e imposivel atu hafahe povu, maibe uza linguagem ne’e hodi esplika buat ruma.

“Dala ruma uza liafuan ne’e hodi esplika ba públiku maibe ida ne’e imposivel atu hamosu loromonu no lorosa’e”. Hateten Gil da Costa Oan Soru iha PCM, Dili,28/02/2025

Fo hanoin fali katak, ligadu ho lista edital segundu registu 2009 ne’ebé fonsai iha loron 15 fulan Janeiru, oras ne’e parte komisaun rejista ona reklamantes no kontentasaun hamutuk rihun sanulu resin ida resin, data reklamasaun sei termina iha loron 14 fulan Marsu 2025

Jornalista : Marciana Da Conceição