Akampamentu Loron 7 ! ADTL Halibur EhD Fahe Experiênsia Iha Aileu
Imajem : Abertura akampamentu EhD iha Aileu, 25/08/2025.
SAPNewsTL, Aileu : Assosiasaun Difisiénsia Timor-Leste (ADTL) organiza akampamentu durante semana ida, iha Suku Seloi-Kraik Postu Administrativu Aileu Vila, Munisípiu Aileu, akampamentu ne’e ho objetivu atu fó oportunidade ba ema ho difisiénsia (EhD) hodi koalia kona-ba sira-nia direitu, partilla esperiênsia no motiva malu.
Dircia Baptista Belo – SAP News TL
Diretor ADTL, Cezario da Silva hatete, objetivu prinsipal husi akampamentu ida ne’e atu haklean relasaun amizade entre
joven difisiénsia sira husi munisípiu Aileu no joventude difisiénsia iha territoriu nasional, atu partilla koinesementu no esperiênsia ba maluk defisiente sira iha area rurais.
“Ami hakarak lori sira hamutuk atu aprende, fahe esperiênsia no motiva malu,” Dehan Diretor ADTL, Cezario da Silva, ba jornalista sira iha Suku Seloi-Kraik, Segunda, (25/08/2025)
Diretor Ezekutivu ADTL salienta, atividade akampamentu ne’e organiza husi ADTL hodi mobiliza juventude defisiente timoroan husi munisípiu sira, konsentra hamutuk aprende no motiva malu
“Ita-nia maluk ema ho difisiensia sira hetan oportunidade ne’ebe menus, ADTL hakarak organiza no lori difisiensia mai hamutuk iha ne’e hodi aprende no motiva malu, tanba joven difisiénsia barak iha munisipiu no area rurais sira senti katak laiha ona oportunidade ba sira” Dehan Nia.
Cezario hatutan, atividade ne’e fó espasu ba maluk defisiente sira, nune’e bele koalia kona-ba sira-nia direitu, iha nivel suku, mentaliza maluk defisiente sira atu ko’alia pontu importante ne’ebe relasiona ho direitu ema ho defisiente nian.
Iha fatin hanesan, Prezidente Autoridade Munisípiu Aileu, (PAM), João Bosco dos Santos fundamenta, atividade akampamentu ne’e fó oportunidade ba maluk defisiente sira tanba ema ho defisiente laiha diferente ho komunidade ne’ebe ho fisika normal.
“Ema ho difisiensia la diferente ho ema joventude sira ne’ebe bele iha halo buat ruma maibé ema difisiensia sira hetan moras iha liman no ain, sira-nia kakutak la defisiente, sira iha direitu atu asesu ba edukasaun, justisa no obra públiku area rurais, maibé ita tenki fo prioridade ne’ebe ba sira liu husi kria kondisaun diak ba sira no fasilita sira atu hala’o buat hotu, tuir sira nia kbiit”.
PAM Aileu hatutan, atividade importante ne’ebe ADTL sira realiza kabe ba programa governu nian, oinsa enkoraja governu apoiu atividade ne’ebe organizasaun ADTL realiza ona iha Timor-Leste.
“Oinsa maka atu kria fatin ne’ebe dignu iha munisípiu, nune’e konsentra sira atu halo formasaun no halo refelsaun”.
Entretantu, atividade akampamentu ADTL ne’e, realiza durante loron hitu (7) hahu husi loron 25-30 fulan agostu tinan 2025,
iha Area Lakbou, Aldeia Leobraudu, Suku Seloi-Kraik Postu Administrativu Aileu Vila Munisípiu Aileu.
Atividade ne’e ofisialmente abertura direita husi Primeiru-Ministru (PM) Kay Rala Xanana Gusmão.