Alkatiri Konsidera Governu Sai Kampiaun Ba Festa, Desenvolvimentu La La’o

Imagem : Eis Primeiru Ministru, Sekretariu Jeral Partidu FRETILIN Marí Alkatiri. Foto : SAPNews

SAPNewsTL, Dili : Eis Primeiru Ministru Mari Alkatiri konsidera dezenvolvimentu iha rai laran la la’o, guvernu sai deit kampiaun hodi organiza festa iha Timor-Leste.

Eis Primeiru Ministru Mari Alkatiri deklara konseitu dezenvolvimentu tuir nia laos deit kona-ba estrada diak no uma ne’ebé diak, maibe oinsa mak maka povu bele moris diak.

“Ha’u nia konseitu dezenvolvimentu ne’e povu nia moris, la’os estrada bobot no uma bobot, ne’e hola parte dezenvolvimentu bainhira povu moris diak ona, enkuantu povu seidauk moris diak ne’e hanesan rai rahun atu nafatin soe ba povu nia matan”. Dehan Sekretariu Jeral Partidu FRETILIN Mari Alkatiri iha Farol, 27/08/2025.

Nia husu atu governante sira hateke dalan ida deit, nune’e bele hadia nasaun Timor-Leste sai jardim ba timoroan hotu. Tanba nia konsidera dezenvolvimentu la la’o no ekonómia seidauk sustentável.

“Ita hotu tenke hateke dalan ida deit, rai ne’e atu sai jardin ba timoroan tomak labele iha violasaun konstituisaun, violasaun ba lei, labele iha ditadura poder polítiku no ditadura da maioria”.

“Tuir ha’u-nia konseitu dezenvolvimentu, seidauk iha dezenvolvimentu, edukasaun no saúde la lao, ekonomia povu nian laiha”.

Sekretariu Jeral FRETILIN konsidera Vise Primeiru-Ministru Calbuadi Lay hanesan kampiaun hodi organiza festa no hanesan turista ida.

“Uluk ami sei ko’alia ba malu, ha’u dehan ba nia, “o ne’e ministru turismu ka turista”, la’o ba, la’o mai la para”.

“Ha’u koñese nia, organiza festa ne’e nia kampiaun maibe jeitu tebes, ita koñese malu hela, nia uluk FRETILIN, sai husi FRETILIN tanba la konsege sa’e to’o ministru”. Dehan Sekretariu Jeral Partidu FRETILIN Mari Alkatiri liu hosi konferénsia imprensa

Eis Primeiru Ministru Mari Alkatiri afirma, presiza rezolve sistema saúde ho diak, nune’e bele rezolve turista sira iha momentu emerjensia saúde.

“Ita seidauk rezolve saneamentu baziku no sistma saúde ho diak, turista sira atu mai ne’e hanoin dala rua, dala tolu tanba bainhira nia moras derepente atu ba ne’ebé? Buka matan dook ka?”.

Sekretariu Jeral Partidu FRETILIN ne’e mós preokupa kona ba problema setor justiça liliu Presidente Tribunal Rekursu Afonso Carmona ne’ebe ilegal maibe kontinua hala’o knar lidera orgaun soberanu ida.

Antes ne’e, Vise Primeiru Ministru Asuntu Ekonomia, Ministru Turismu no Ambiente Francisco Kalbuadi Lay hateten IX Governu ne’ebe lidera hosi Primeiru Ministru Kay Rala Xanana Gusmão konsege halo ona buat barak iha tinan rua liliu halo estrada, no organiza serimonia boot sira hanesan lori Timor-Leste tama ba Organizasaun Mundial Komersiu no organiza visita Papa Francisco iha Timor-Leste.

Governu konsege organiza jogu Comunidade dos Países da Língua Portuguesa (CPLP) ba dala 12 iha Timor-Leste, halo relasaun bilateral no halo vizita ba nasaun oioin iha mundu.