Aleinde Apoia Sosa Karreta ! Adolmando : “PR Sai Kada Fulan, Investidor Hira Mak Mai ?”
Imajem : Presidente Repúblika José Ramos Horta & Reitor UNPAZ Adolmando Amaral iha Dili, 01/09/2025.
SAPNewsTL, Dili : Reitor Universidade da Paz (UNPAZ) Adolmando Soares Amaral hatete Presidente Repúblika José Ramos Horta apoiu sosa viatura foun ba deputadu tanba fulan-fulan Parlamentu Nasional aprova osan ba Presidente viajen ba rai-liur.
“Presidente Repúblika apoiu parlamentu para atu sosa kareta ba deputadu, Prezidente tenke konkorda tanba fulan-fulan nia sai hela deit, karik nia la konkorda maka deputadu sira sei la hatan Presidente ba liur, tanba ne’e Presidente tenke konkorda para nia fulan-fulan halo viajen ba rai liur”. Dehan Reitor UNPAZ Adolmando Amaral ba jornalista sira iha Resintu UNPAZ, Tersa-Feira (02/09/2025).
Adolmando Amaral mós kestiona Presidente Repúblika José Manuel Ramos Horta nia viajem ba estranjeiru tanba viajem ne’e gasta osan povu nian.
“Viagem Presidente Repúblika sai ne’e investor hira maka tama ona mai halo investimentu iha ne’e, ida ne’e mos kontribui gasta Orsamentu Jeral Estadu nian hotu”. Reitor kestiona
Reitor hatutan, deklarasaun Presidente Repúblika nian katak “karreta hirak ne’e laos ba sira-nia individu maibe ba instituisaun no sei la lori fila, maibe iha tinan rua ikus ne’e ita presiza karreta prado, nusá tinan rua ne’e sira tau atensaun ba povu ne’ebe besik ona ba risku”.
Adolmando Amaral sublinha, “Presidente Repúblika fulan-fulan sai hela de’it tanba hetan hela autorizasaun husi parlamento nasional tanba ne’e mak prezidente reforsa tan parlamento hola kareta para depois fulan sai fali karik bele hetan autorizasaun husi Parlamentu Nasional”.
Reitor UNPAZ ne’e deklara kamada sosial no intelektual sira hotu sei halo demonstrasaun hasoru Parlamentu Nasional wainhira la anula desizaun sosa karreta ba deputadu sira.
“Agora ne’e ita haree deit, se sira obriga mak kamada intelektual no sosiedade sivil sei organiza atu foti asuan hasoru sira, agora iha fase reuniaun intensivu, ita sei haree buat sira ne’e hotu maibe hakarak manifestasaun ida ne’ebe Pasífiku, kontribui ba paz no estabilidade”.
Referênsia hatudu ona katak patrimónia estadu nian ne’ebe depois remata sira-nia mandatu, sira leilaun tiha, tuir fali mai pajero mos sira leilaun hela, pajero sport ne’e mak sira seidauk lelaun, agora mak sira hola prado, entaun pajero sport ne’e sira sei lelaun.
“Referênsia hatudu hela ba ita dehan patrimoniu estadu nian, ne’e sira-nia politika deit, ikus mai mandatu hotu, sira sei la entrega”. Nia hakotu
Antes ne’e Presidente Repúblika José Manuel Ramos Horta deklara ninia apoia ba Parlamentu Nasional sosa karreta instituisaun, enkuantu la sosa ba individu sira ka deputadu sira.
Iha sorin seluk, Sekretariu Jeral Partidu FRETILIN Marí Alkatiri hatete nia parte apoia sosa viatura ba deputadu sira ba halo servisu instituisaun nian.